‏ Isaiah 54

Израильди Өөнүң ээзи дедир хүлээп аар

1«Үре-төл чок, божуп көрбээн херээжен, өөрүп-байырла! Дыңзыдыр ырла, өөрүшкүлүг алгыр, эъди аарып көрбээн херээжен!
Ашактыг херээженге көөрде,
кагдырыпкан херээженниң ажы-төлү хөй боор-дур! ^a – деп,
Дээрги-Чаяакчы чугаалаан. –
2Чадырыңның турар черин калбартып ал,
чурттаар чериңниң шывыгларын херип ал;
бодуңну кызагдава, хендирлерни узадыр шөйүп,
өргеннерни быжыглап ал!
3Сээң ээлээн черлериң оң-даа, солагай-даа талаже шөйлүр,
сээң үре-салгалың өске чоннарның черлерин эжелеп ап,
ээн кагдынган хоорайларынга чурттай бээр.
4Кортпайн көр, бак атка кирбес сен;
сүрээдевейн көр, дорамчылатпас сен!
Аныяк шааңда адың баксырап турганын уттуптар сен,
дулгуяк туруңда, адың бужартаанын сагынмас сен! ^b
5Чүге дээрге сээң Чаяакчың – сээң Өөң ээзи-дир ^c,
Ооң ады – Аг-шериглиг Дээрги-Чаяакчы!
Ол, Израильдиң ыдыктыг Бурганы – сээң Камгалакчың-дыр,
Ооң ады – бүгү чер-делегейниң Бурганы.
6Дээрги-Чаяакчы сени, кагдырган, сагыш-сеткили муңгараан кадайын дег,
аныяанда ап алгаш, оон каапкан кадайын дег ^d, кыйгырып аар –
деп, Бурганың чугаалаан. –
7Мен сени хензиг үеде каапкан мен,
оон өндүр улуг кээргелим-биле дедир хүлээп аар мен ^e.
8Килеңим кыптыгарга, Мен сенден хензиг када хая көрнү берген мен,
ынчалза-даа мөңге энерелим-биле өршээр мен ^f – деп,
Дээрги-Чаяакчы, сээң Камгалакчың чугаалаан. –
9Бо чүүл болза Нойнуң үезинде болганы дег чүүл-дүр:
Нойнуң суг халавы чер-делегейже дедир келбес деп даңгыраглаан мен ^g,
а ам сенче моон соңгаар килеңневезимни,
моон соңгаар сеңээ кыжанмазымны даңгыраглап тур мен.
10Даглар-даа туружундан шимчей бээр, тейлер-даа божаңнай бээр,
а Мээң энерелим кажан-даа сенден адырылбас,
Мээң сээң-биле чарганым эп-найырал керээзи ^h
кажан-даа божаңнавас – деп, сени кээргеп турар Дээрги-Чаяакчы чугаалаан. –

11О, бастыртып алган, шуурганнарга силгиткен, аргалал чок хоорай!
Көр даан, Мен сээң даштарыңны бирюзага,
сээң үндезиниңни – сапфирлерге салыр мен.
12Сээң суургаларыңны рубиннерден,
сээң хаалгаңны – бериллден,
сээң бүгү ханаларыңны – эртине даштардан кылыр мен.
13Сээң бүгү чурттакчыларың Дээрги-Чаяакчыдан өөредиг алыр ⁱ,
оларны өндүр улуг-чаагай чорук манап турар.
14Сен чөптүг-шынныг чорукка үндезилеттинер сен;
дарлал деп чүве билбес боор сен – коргар чүвең чок боор.
Коргуушкун көрбес сен – ол сенче чагдавас.
15Бир эвес кандыг-бир кижи сенче халдаар болза,
ол Мээң ыткан кижим эвес боор;
сенче халдаан кижи сеңээ аштырып аар.
16Көстерни чалбыышталдыр үрүп, бодунуң сорулгазын чедип аар дээш
ок-чепсек соп кылып турар дарганны Мен чаяап кагдым.
Хоозурал эккээр узуткакчыны база Мен чаяап кагдым.
17Ынчалза-даа сенче углаан кандыг-даа ок-чепсек тиилелгеге чедирбес,
шииткел черинге сени буруудаткан кижи бүрүзүнүң шынныг эвезин көргүзер сен ^j.
Дээрги-Чаяакчының чалчаларының алыр үлүү ындыг болур.
Мен оларны Бодум агартыр мен!»

Дээрги-Чаяакчының медеглээн чүвези ол-дур.