Isaiah 55
Кижиниң сеткил ханыышкыны – Бурганда
1«Кагып-суксаан бүгү улус, сугга чедип келиңер! a Акша-мөңгүнүңер чок-даа болза,чедип келгеш, тараадан ап алыңар, чиңер!
Келгеш, арага биле сүттен ап алыңар –
акша-мөңгүн төлевейн, халаска алыңар!
2Аъш-чем боор харык чок чүве дээш
чүге акша-мөңгүн төлеп турар силер?
Кижи тоттурбас чүве дээш
чүге күш-ажылыңар төлевирин берип турар силер?
Мени топтап дыңнаңар, ынчан эки аъш-чем чиир силер,
чаагай чемге сеткилиңер ханар b.
3Кулааңар ээктирип, Меңээ чедип келиңер,
амы-тынныг артар дээш дыңнаңар.
Мен силер-биле мөңге чагыг-керээ чарар мен c,
Давид хаанга аазаан Мээң ынаныштыг энерелимни
силерге хайырлаар мен d.
4Давидти чоннарга херечи база чоннарның
баштыңы болгаш чагырыкчызы кылып кагдым.
5Билбезиң чоннарны сен бодуңга кыйгырып аар сен,
сени билбес турган чоннар сенче далаш-биле чедип кээр e.
Олар Дээрги-Чаяакчы Бурганың дээш,
Израильдиң ыдыктыг Бурганы дээш чедип кээр,
чүге дээрге Ол сени алдаржыдар».
6Дээрги-Чаяакчыны амдыызында дилеп тып ап болур турда,
Олче чүткүңер! f
Ол амдыызында чоок турда, Ону кыйгырып алыңар!
7Бузуттуг кижи бодунуң оруундан,
бачыттыг кижи – бодунуң кара сагыжындан ойталазын;
олар Дээрги-Чаяакчыже ээлзиннер – Ол оларны кээргээр,
Бурганывысче ээлзиннер – Ооң өршээли элбек болгай.
8«Мээң бодалдарым – силерниң бодалдарыңар эвес,
силерниң оруктарыңар – Мээң оруктарым эвес – деп,
Дээрги-Чаяакчы медеглээн. –
9Дээрниң черден кайы хире бедии дег,
Мээң оруктарым биле бодалдарым
силерниң оруктарыңар биле бодалдарыңардан ол хире бедик g.
10Дээрден баткан чаъс биле хар дедир ээлбейн,
чажар үрезин, чиир далган-тараа берзин дээш,
черни суггарып, ол чер үнүштү төрүп
база өстүрүп шыдаар кылып каары дег,
11Мээң аксымдан үнген сөс база күүсеттинмээн шаанда h,
Менче дедир ээлбес.
Ол сөс Мээң күзел-соруумну күүседир,
Мээң кылзын дээш айбылап чорудупканым бүгү чүүлдү боттандырар.
12Мээң чонум, өөрүшкүлүг үнүп чоруптар силер,
амыр-тайбың-биле силерни салып чорудуптар.
Даглар, тейлер силерниң мурнуңарга ырлап хөглээр,
хову-шөлде бүгү ыяштар силерге адыш часкаар i.
13Тенниг чадаң үнүш орнунга чойганнар өзүп үнер,
шагар-оът орнунга – шивилер өзүп үнер j.
Ол бүгү Дээрги-Чаяакчыны алдаржыдары-биле болур,
мөңге, чиде бербес бадыткал демдээ апаар».
Copyright information for
TyvTUV