Isaiah 59
Бачыттың Бурган биле чонну аңгылааны
1Дээрги-Чаяакчының холу чолдая бербээн a, ол камгалап шыдаар, Ооң кулаа кадый бербээн – дыңнап турар.2Ынчалза-даа кем-бурууңар силерни Бурганыңардан аңгылады b,
бачыттарыңар дээш, Ол силерден хая көрнү берип, силерни дыңнавайн тур c.
3Силерниң холуңар ханга борашкан, салааларыңар бачытка борашкан,
аксыңар меге чүве чугаалаар, дылыңар бак чүве чулчуруур-дур d.
4Кым-даа шииткел черинге чөптүг чорукче кыйгырбайн турар,
кым-даа шынныы-биле чаргылдашпайн турар:
улус хоозун барымдааларга ынанып, меге чүве чугаалап,
хай-бачыт ботталдырып, бузут-бак төрүп турар e.
5Олар чуургаларын чазылгыже баскан чыланнар дег,
дузаан аргаан ээремчиктер дег – ол чуургаларны чипкен кижи өлүп каар,
а бир эвес чуура базыпкан болза – шагар чылан союп үнүп кээр.
6Оларның ээремчииниң дузаандан хеп аргыттынмас f,
олар кылып алган чүвези-биле бодун шып шыдавас.
Оларның ажыл-херектери – кем-буруулуг,
оларның холдары күчүлел кылып турар.
7Оларның буттары бузут үүлгедир дээнде – дүрген,
буруу чок кижиниң ханын төгер дээнде – далаш g;
оларның сагыжы кара,
оларның эрткен оруктарынга хоозурал биле өлүм-чидим артып каар.
8Олар тайбың деп чүве билбес,
оларның оруктарында чөптүг чорук чок;
оларның оруу ыргак-дагыр,
олап чоруп турар бүгү улус амыр-тайбың билбес.
9Ынчангаш шын шииткел бистен ырак-тыр,
чөптүг чорук биске четпээн-дир.
Чырып кээрин манап турдувус, ынчалза-даа кайда-даа дүмбей караңгы-дыр,
чырыкты манап турдувус, ынчалза-даа караңгыда улчуп чор бис.
10Согурлар дег, хана суйбап чоруп тур бис,
караа көрбес улус дег, суйбаттынып, орук дилеп чор бис h.
Дүъште, имиртиңде дег, илдигер-дир бис,
кадык-шыырак улус аразында өлүглер дег-дир бис.
11Бис шупту адыглар дег алгырар-дыр бис,
көге-бугалар дег човууртаар-дыр бис i.
Чөптүг шииткелди манап турдувус, а ол чок-тур,
камгалалды манап турдувус – а ол бистен ырак-тыр.
12Чүге дээрге Сээң мурнуңга кем-буруувус хөй санныг,
бачыттарывыс бисти сойгалап турар.
Кем-буруувус үргүлчү бис-биле кады,
бузудувусту билир бис –
13Дээрги-Чаяакчыга өскерлип, Ооң мурнунга үймээн үндүрүп турдувус,
Бурганывысты эдереринден ойталадывыс,
дарлаашкын биле тура халыышкын кылып,
меге чүве бодап ап база чугаалап турдувус.
14Шын шииткел үндүр кыстырткан,
чөптүг чорук ыракта турар.
Алыс шын төп шөлде тептиге берген,
шынчы чорук чедип кээп шыдавас.
15Алыс шын бисте чок-тур,
бузуттан чайлай берген кижи үптеттирип аар-дыр.
Дээрги-Чаяакчы чөптүг чорук чогун көрүп кааш, таарзынмайн барган.
16Ол көөрге, ындыг байдалды өскертир дээн кым-даа чок боорга j,
кайгап-харай берген. Ындыг болганда,
Ооң Бодунуң күчү-күжү Аңаа тиилелгени шаңнаар k,
Ооң чөптүг чоруу Аңаа деткимче болур l.
17Ол чөптүг-шынныг чорукту, куяк хеп дег, кедип алыр,
бажынга камгалалдың куяк бөргүн кедип алыр m;
Ол өжээн негээшкининиң хевин кедип,
хорадаан сагыжы-биле, тон-биле дег, шугланып алыр.
18Улустуң ажыл-херектерин ёзугаар Ол кеземче онаар:
дайзыннарынче Ооң килеңи халдаар,
өжээтеннерин Ооң өжээн негээшкини манап турар,
ырак ортулуктарның чурттакчыларынга Ол чогуур кеземче онаар! n
19Барыын чүкте улус Дээрги-Чаяакчының адындан коргар,
чөөн чүкте улус алдарлыг Ону хүндүлээр.
Бир эвес дайзын хем дег хөме кээр болза,
Дээрги-Чаяакчының тыныжы ону сывырып чорудуптар.
20«Сионга, бачыдын билинген Иаковтуң салгалынга Камгалакчы
чедип кээр o – деп, Дээрги-Чаяакчы медеглээн. –
21Мээң силер-биле чарар чагыг-керээм бо-дур p – деп, Дээрги-Чаяакчы чугаалаан. –
Мээң Сүлдем кезээде силерниң араңарга турар;
силерни чугаалаар кылып кааным Мээң сөстерим амдыгааштан эгелээш,
кезээ мөңгеде аксыңардан черле дүшпезин,
силерниң ажы-төлүңерниң, оларның үре-салгалының аксындан база дүшпезин!»
Дээрги-Чаяакчының чугаалаан чүвези ол-дур.
Copyright information for
TyvTUV