Isa 6 | TyvTUV | STEP | Озия хаанның мөчээн чылында өрү көдүрүлген бедик дүжүлгеде саадаан Дээргини көрген мен . Ооң хевиниң эдектери Бурганның өргээзин бүргей ап турган.

‏ Isaiah 6

Бурганның өргээзинге көстүүшкүн

1 Озия хаанның мөчээн чылында ^a өрү көдүрүлген бедик дүжүлгеде саадаан Дээргини көрген мен ^b. Ооң хевиниң эдектери Бурганның өргээзин бүргей ап турган. 2 Ону долгандыр серафимнер ^{▼▼ Серафимнер – Бурганның төлээлериниң бир хевири. Бо сөстү дорт очулдурарга, «Өрттедип турар амытаннар» дээн.} турду. Серафим бүрүзү алды чалгынныг: олар ийи чалгыны-биле арнын дуглаар, өске ийизи-биле буттарын шывар, арткан ийизи-биле ужар болду ^d. 3 Олар бот-боттарынга: «Аг-шериглиг Дээрги-Чаяакчы ыдык, ыдык, ыдык! Бүгү чер-делегейни Ооң алдары бүргээн! ^e» – деп ыыткыр чугаалап турду.

4 Оларның алгырган үнүнден хаалгаларның үндезиннери божаңайнып, Бурганның өргээзин ыш бүргеп алды ^f. 5 «Ат болдум! – дидим. – Арыг эвес аас-сөстүг боорда, арыг эвес аас-сөстүг чон аразында чурттап турар кижи-дир мен. А ам Хаанны, Аг-шериглиг Дээрги-Чаяакчыны караам-биле көрдүм! Өлдүм-не!»

6 Ынчан серафимнерниң бирээзи менче ужуп келди, ооң холунда өргүл салыр бедигээштен кыскаш-биле кыстырып алганы оттуг кезек бар болду. 7 Ол оозун мээң аксымга дээскеш ^g: «Көрдүң бе, бо оттуг кезек аксыңга деггеш, кем-бурууңну чайлатты, бачыдың ам арыглаттына берген» – деп чугаалады.

8 Ооң соонда мен Дээргиниң: «Кымны айбылап чорудайн? Бистиң өмүнээвистен кым баарыл?» – дээн үнүн дыңнап кагдым.

«Мен! Мени айбылап чорудуп көрем!» – дидим. 9 Ол ынчан мынча дээн: «Барып, бо чонга:

„Дыңнааш-даа, угаап билбес-тир силер,
көргеш-даа, билип албас-тыр силер“– деп чугаала ^h.
10 Бо чоннуң чүрээ дашталып калган,
кулаан кумнап, караан хаптап алган –
оон башка олар караа-биле көрүп, кулаа-биле дыңнап ⁱ,
чүрээ-биле угаап билиптер турган ийик;
оон башка олар Менче эглип кээп,
экирий бээр турган ийик ^j».

11 Мен ынчан: «Кажанга чедир ындыг болурул, Дээрги?» – деп айтырдым.

Ол меңээ: «Хоорайлар ээнзиреп, чурттакчы чок арткыжеге чедир, бажыңнар октаттына бергижеге, шөлдер ээнзиреп, хоозурап калгыжеге чедир; 12 Дээрги-Чаяакчы бүгү улусту үндүр сывырыптарга, бо чер шуут кагдына бергижеге чедир – деп харыылаан. – 13 Чуртка чоннуң чүгле оннуң бир кезээ-даа артып каар болза, ол артынчыны база катап хоозурадыр! Ынчалза-даа быжыг ыяштарны кезип кааптарга, дазылы артып каары дег, ыдыктыг чон ^k база дазылдыг болур».