Isaiah 62
Иерусалимниң чаа ады
1«Сионну бодааш, ыыттавайн барбас мен, Иерусалимни бодааш, оожургавас мен!Ооң алган агартыышкыны хаяа ышкаш,
ооң камгалалы – чырыткы ышкаш
чырып келбээн шаанда, оожургавас мен!
2Бүгү чоннар сээң агартыышкыныңны,
хааннар шупту сээң каас-чаражыңны көрүп каар;
сен чаа ат-биле адаттырар сен,
Дээрги-Чаяакчы Боду сеңээ ол атты тыпсыр a.
3Дээрги-Чаяакчының холунда каас-чараш одага,
Бурганыңның холунда – хаанның оваадайы апаар сен b.
4Улус ам сени „Кагдырган“деп адавас c,
сээң чериңни „Ээнзирээн“дивес.
Харын сени „Тааланчыг“дээр,
а сээң чериңни „Ээленген“дээр d,
чүге дээрге сен Дээрги-Чаяакчыга тааланчыг-дыр сен,
сээң чериң ээ чок артпас-тыр.
5Аныяк оолдуң аныяк кыс-биле өгленчип,
өгнүң ээзи апаары дег,
сээң чонуң база сени ээлеп алыр.
Душтук оолдуң душтуу кыс дээш өөрүүрү дег,
сээң Бурганың сен дээш өөрүүр e.
6Иерусалим, сээң ханаларыңга Мен таңныылдарны тургузуп каар мен,
хүндүс-даа, дүне-даа оларның ыыды дыңналыр».
Дээрги-Чаяакчының адын кыйгырып турар улус,
ыыт чок барбаңар!
7Иерусалимни Ол катап үндезилеп тургузуп,
ону чер-делегейге алдаржыдып кагбаан шаанда,
Аңаа амыр-дыш бербеңер!
8Дээрги-Чаяакчы Бодунуң оң холун,
Бодунуң күчүлүг холун көдүргеш:
«Моон соңгаар сээң дайзыннарыңга далган-тарааңны чиртпес мен f,
даштыкы улус сээң бүдүрүп алган арагаңны ишпес!
9Дүжүт ажаап турган улус боттары оозун чип,
Дээрги-Чаяакчыны алгап-мактаар, виноград ажаап турган улус
арагазын боттары Мээң ыдыктыг өргээмниң мурнунга ижер» – деп даңгыраглаан.
10Хаалга таварып үнүңер-ле, үнүңер,
чонга оруктан белеткеңер!
Орукту дескилеп, ажыдыңар, даштарны чайладыңар,
аймактарга туктан көдүрүңер! g
11Дыңнаңар, Дээрги-Чаяакчы чер-делегейниң ужу-кыдыынга чедир:
«Сион-кыска: „Камгалакчың кел чыдыр!
Көр даан, Ооң хайырлаар шаңналы холунда-дыр! h“– деп чугаалаңар» – деп чарлап тур.
12Сээң улузуңну «Ыдыктыг чон»,
«Дээрги-Чаяакчы хостаан улус» деп адаар.
А сени «Күзенчиг» деп, «Кагдынмаан хоорай» деп адаар.
Copyright information for
TyvTUV