Isa 65 | TyvTUV | STEP | «Мени айтырбаан улуска ажыттынган мен; Менче чүткүвээн улус Мени тып алган. Мээң адым адап, кыйгырбаан чонга: „Мында мен, мында!“

‏ Isaiah 65

Бурганның эки, бак улусту ылгай көөрү

1 «Мени айтырбаан улуска ажыттынган мен; Менче чүткүвээн улус Мени тып алган.
Мээң адым адап, кыйгырбаан чонга: „Мында мен, мында!“– деп чугааладым.
2 Мен хүннү бадыр чагырга билбес чонче,
боттарының бодал-сагыжын эдерип,
бак оруктар-биле чоруп турар улусче холум сунуп турдум ^a.
3 Олар Мени үргүлчү арнымга-ла дорамчылап турар,
дүрзү-бурганнарга ыдыктыг дээн сесерликтеринге ^b өргүл салып,
оларга тууйбудан кылган бедигээштерге артыш кыпсып турар,
4 дүне чевег-куйларда, чажыт черлерде караң көрнүп турар,
хаван эъди чиир ^c,
савазынга арыг эвес быдаа хайындырып, кудуп ижер,
5 өске улуска: „Менден ырадыр тур,
оон башка мээң ыдыктыым сенче шилчий бээр“– дээр улус-тур.
Олар, ыжы карак өер өшпестээн от дег,
Мени хорададып турар.

6 – 7 Оларның шииткелин Мээң мурнумда бижип каан ^d.
Ыыттавайн барбас мен, оларның боттарының бачыттары дээш
база ада-өгбезиниң бачыттары дээш, оларга кеземче онаар мен ^e – деп,
Дээрги-Чаяакчы чугаалаан. –
Олар дагларга айдызаар өргүл кылып,
тейлерге Мени бужар байдалга таварыштырып турган болгай!
Биеэги үүлгедиглери дээш,
Мен оларга бүрүнү-биле кеземче хемчээп бээр мен!»

8 Дээрги-Чаяакчы мынча дээн:
«Виноград салбаанда чулук артып калган болза,
улус: „Аңаа хора чедирбе, ол ам-даа ачы-дузалыг-дыр“– дээр.
Мен база ынчаар кылыр мен:
Бодумнуң чалчаларымны бодааш,
чонумну бүрүнү-биле узуткавас мен ^f.
9 Мен Израильден үре-салгалды өстүрер мен,
Иудеяны – Мээң даглыг чуртумну ээлээр салгакчылар артып каар;
ону Мээң шилип алган улузум салгап алыр,
аңаа Мээң чалчаларым чурттаар.
10 Менче чүткүп турар чонумга
Шарон оргулаажы ^g – хойлар оъттаар одар-белчиир,
Ахор шынаа ^h – бода мал дыштанып чыдар чер болур ⁱ.

11 А силерниң – Дээрги-Чаяакчыдан ойталаан,
Мээң ыдыктыг даамны уттупкан,
салым-чол бурганынга аъш-чем белеткеп салып,
арагалыг дашка сунуп турар улустуң –
12 салым-чолуңарны Мен тодарадып каан мен:
хылыш силерни өлүрүп каар,
силер шупту дискек кырынга олура, кыра шаштырып аар силер!
Чүге дээрге Мен кыйгырып турдум, а силер харыылавадыңар,
Мен чугаалап турдум, а силер дыңнавадыңар ^j.
Мээң бузуттуг деп санаарым чүве үүлгедип,
Мээң сеткилимге кирбес чүве шилип алдыңар».

13 Ынчангаш Дээрги-Бурган-Чаяакчы мынча дээн:
«Мээң чалчаларым чемненир, а силер аштаар силер;
Мээң чалчаларым ижер, а силер кагып-суксаар силер ^k;
14 Мээң чалчаларым өөрүүр, а силер бак атка кирер силер!
Мээң чалчаларым өөрүп-байырлаар,
оларның чүректерин хөглээшкин бүргээр,
а силер чүрээңерде качыгдалга алзып, човууртаар силер,
аажок муңгарааш, ыглап-сыктаар силер ^l.
15 Силерниң аттарыңар Мээң шилип алган улузумга
каргыш бооп артар ^m.
Дээрги-Бурган-Чаяакчы силерни өлүмге хүлээдир,
а Бодунуң чалчаларынга өске ат тыпсыр ⁿ.
16 Ынчан чер кырында алгаг-йөрээшкин кылып турар кижи бүрүзү
сөзүнге шынчы Бурганның адын ажыглаар;
чер кырында даңгырак берген кижи бүрүзү
сөзүнге шынчы Бурганның ады-биле даңгыраглаар ^o.
Чүге дээрге биеэги качыгдалдар уттундурган,
олар ам Мээң көрүжүм мурнунда артпаан-дыр.

Бурганның чаа чаяалгазы

17 Көрүңер, Мен чаа дээр биле чаа черни чаяар деп тур мен ^p,
биеэде турган чүве моон соңгаар сагышка артпас, угаанга кирбес ^q.
18 Мээң чаяар чүүлдерим дээш өөрүп-байырлаңар,
кезээ мөңгеде хөглеңер!
Мээң чаяарым Иерусалимни байырлал долар,
ооң чонун – өөрүшкү бүргээр.
19 Мен Иерусалим дээш өөрүп-хөглээр мен,
чонум дээш өөрүп-байырлаар мен;
аңаа ам кажан-даа ыы-сыы, уё-човуур дыңналбас ^r.
20 Аңаа моон соңгаар чаш ажы-төл өлүп кырылбас,
бодунуң назынын бүрүнү-биле чурттаваан шаанда,
чаңгыс-даа кырган кижи өлбес.
Кайы-бир кижи чүс харлыында өлүп калган болза,
аныяанда калган деп санаттырар,
а чүс хар чедир чурттаваан кижини каргаттырган деп санаар ^{▼▼ Азы: «А чүс харлыг бачыттыг кижи каргаттырар».}.

21 Улус-чон бажыңнар тудуп алгаш, аңаа боттары чурттаар.
Олар тарып алган чимизин боттары чиир ^t.
22 Оларның тудуп каан бажыңнарынга хары улус
чурттаар деп чүве моон соңгаар турбас.
Оларның тарып каан ыяштарының чимизин хары улус
чиир деп чүве турбас.
Мээң чонум ыяштар дег үр чурттаар ^u.
Мээң шилип алган улузум холу-биле кылган бүгү чүвезин
боттары үр үеде ажыглаар.
23 Олар үре-түңнел чок ажылдавас,
оларның ажы-төлү төрүттүнгеш, айыыл-халапка алыспас ^v.
Олар Дээрги-Чаяакчының ачы-буянын алган чон болур –
олар боттары, оларның үре-салгалы-даа! ^w
24 Олар Мени кыйгырар мурнунда-ла, Мен харыылаар мен;
олар чугаазын төндүрбээнде-ле, Мен дыңнап кааптар мен ^x.
25 Бөрү биле хураган кады оъттаар,
арзылаң шары ышкаш сиген чиир ^y,
а чыланның чеми довурак-доозун бооп артар ^z.
Мээң бүгү ыдыктыг даамга кым-даа узуткаашкын кылбас,
хора чедирбес апаар ^aa».

Дээрги-Чаяакчының чугаалаан чүвези ол-дур.