Isa 66 | TyvTUV | STEP | Дээрги-Чаяакчы мынча дээн: «Дээр – Мээң дүжүлгем, чер – бут салыр ширтээм! Меңээ кандыг өргээ тудуп берип шыдаар силер , Мээң дыштаныр черим каяа туруп боорул?

‏ Isaiah 66

Шииткел болгаш идегел

1 Дээрги-Чаяакчы мынча дээн: «Дээр – Мээң дүжүлгем, чер – бут салыр ширтээм! ^a
Меңээ кандыг өргээ тудуп берип шыдаар силер ^b,
Мээң дыштаныр черим каяа туруп боорул? ^c
2 Ол бүгүнү Мээң холум чаяап кылган,
ол бүгү ынчаар тыптып келген – деп, Дээрги-Чаяакчы медеглээн. –
Мээң ээ көрнүр улузум бо-дур:
томаараан, сагыш-сеткили муңгагдаан болгаш
Мээң сөзүмден сүрээдеп турар улус ^d.
3 А бузуттуг боду-ла ^{▼▼ Өске бурунгу сөзүглелде «Бузуттуг боду-ла» деп сөстер таварышпайн турар.}, шары өргүп турар кижи –
кижи өлүрүп турар кижиге дөмей,
хураган дөгергеш, өргүп турар кижи –
ыт мойну сыйып турар кижиге дөмей,
далган-тараа өргүлү кылып турар кижи –
хаван ханы өргүп турар кижиге дөмей,
чаагай чыттыг чүүлдер кыпсып турар кижи –
дүрзү-бурганга мөргүп турар кижиге дөмей ^f.
Ындыглар – оруктарын боттары шилип алган,
боттарының чүдек-бужар чүүлдеринге ынак улус-тур.
4 Мен база Бодумнуң шилилгем кылыр мен:
оларны хилинчекке таварыштырып,
оларже коргар чүвезин ыдар мен ^g.
Чүге дээрге Мен кыйгырып турумда, кым-даа харыылавады,
Мен чугаалап турумда, кым-даа дыңнавады ^h.
Олар Мээң бузуттуг деп санаарым чүве үүлгедип,
Мээң сеткилимге кирбес чүве шилип алдылар».

5 Дээрги-Чаяакчының сөзүнден сүрээдеп турар улус, Ооң сөзүн дыңнаңар:
«Силерни көөр хөңнү чок
база силерни Мээң адым ужун үндүр сывырып турар ха-дуңмаңар:
„Дээрги-Чаяакчы Бодун алдаржытсын, Ол силерни өөртсүн, а бис көрээли!“– дээн.
Ынчалза-даа олар бак атка кирер.
6 Дыңнаңар, хоорайда шимээн үнүп,
Бурганның өргээзинде дааш-шимээн дыңналып тур!
Дээрги-Чаяакчы Бодунуң дайзыннарынга чогуур кеземче онаап, шимээргеп тур.
7 Божуушкун хилинчээ көрбейн чыткаш-ла, Иерусалим божуп алган,
эъди аарываан хирезинде-ле, оол божуп алган ⁱ.
8 Кым ындыг чүве дугайында дыңнааныл, ындыг чүвени көргенил?
Чурт чаңгыс хүн дургузунда төрүттүнер бе,
чон хензиг үе иштинде чырык черге көстүп кээр бе?
А Сион-кыс эъди аарып эгелээн дораан-на, оолдарын божуп алды!
9 Божуурунга чедиргеш, божуттурбайн баар мен бе? – деп,
Дээрги-Чаяакчы чугаалап тур. –
Таанда-ла Мен божуур күштү хайырлааш,
херээжен кижиниң хырнын дуглап каар мен бе? – деп,
Бурганың чугаалаан. –
10 Иерусалимге ынак бүгү улус, ооң-биле кады хөглеңер,
ол дээш өөрүп-байырлаңар!
Ооң ажыын ажып ыглап турган бүгү улус,
ам ооң-биле кады өөрүңер!
11 Силер ооң аргалал бээр эмиглерин ээп, тодар силер,
ооң сүткүр эмиглерин таалал-биле ээп, чемненир силер».

12 Дээрги-Чаяакчы: «Мен Иерусалимге
чаагай чорукту хем ышкаш чорудуп бээр мен,
өске чоннарның байлаа, терең суг дег, ону хөме алыр!
Иерусалим ам силерни эмиглери-биле чемгерер ^j,
холунга көдүрүп чоруур, хойнунга олурткаш, чассыдар.
13 Мен силерни, ие кижиниң чаш төлүн аргалааны дег, аргалаар мен,
Иерусалимге аргалал алыр силер! ^k» – дээн.

14 Ону көрүп кааш, чүректериңер өөрүүр,
чаа үнген оът-сиген ышкаш чечектелир силер.
Дээрги-Чаяакчының күчү-күжү Ооң чалчаларынга ажыттынар,
а килеңи дайзыннарынга удур кыптыгар.
15 Дээрги-Чаяакчы отка бүргедипкен чедип кээр ^l,
Ооң дайынчы тергелери казыргы дег боор ^m.
Ооң өжээн негээшкини килеңниг, Ооң түрлүг кыйгызы оттуң чалбыыжы-ла!
16 Дээрги-Чаяакчы от-биле, Бодунуң хылыжы-биле ⁿ
бүгү кижи төрелгетенге шииткелин боттандырар,
Ооң кыргып-хыдаан улузу хөй болур ^o.

17 «Бодун ыдыктап, арыглап алгаш,
ыдыктыг деп санаттырар сесерликтерже ^p соңнуг-мурнуг кирип турар улус,
хаван эъди, күскелер болгаш өске-даа чүдек-бужар амытаннар чиир улус
шупту өлүп каар ^q – деп, Дээрги-Чаяакчы медеглээн. –
18 Мен оларның ажыл-херектерин, бодалдарын билир мен.
Бүгү чоннарны, аймактарны чыыр дээш чоруптар мен ^r.
Олар чедип келгеш, Мээң өндүр чырыымны көрүп каар.
19 Мен оларның аразынга көскү демдек көргүзер мен.
Олардан дириг арткан улустуң чамдыызын өске чоннарже:
Фарсис, Ливия болгаш ча адыгжылары чурттап турар Лидияже, Тувал болгаш Иаванче –
Мээң дугайымда дыңнаваан, Мээң өндүр чырыымны көрбээн
ырак черлерже чорудуптар мен.
Олар ол чоннарга Мээң алдарымны медээлээр.

20 Ынчан олар бүгү чоннар аразындан силерниң бүгү ха-дуңмаңарны
чуузалар, тергелерге олурткаш,
аъттар, элчигеннер болгаш тевелерге мундургаш,
Мээң ыдыктыг даамче, Иерусалимче,
Дээрги-Чаяакчыга белек кылдыр эккээр ^s – деп, Дээрги-Чаяакчы чугаалаан. –
Бүгү чоннар улузу израильчилерни,
Дээрги-Чаяакчының өргээзинге израильчилерниң арыг саваларда
далган-тараа өргүлүн эккээри дег, эккээр ^t.
21 Оларның чамдыызын мен Бодумнуң
бараалгакчыларым болгаш левиттер кылып аар мен ^u».
Дээрги-Чаяакчының чугаалаан чүвези ол-дур.

22 «Мээң чаяарым чаа дээр биле чаа черниң ^v кезээде Мээң мурнумга турары дег,
силерниң үре-салгалыңар болгаш адыңар кезээде артып каар – деп,
Дээрги-Чаяакчы медеглээн. –
23 Ай чаазы кээрге-ле, амыр-дыш хүнү кээрге-ле,
бүгү кижи төрелгетен Меңээ мөгеер дээш кээп турар апаар – деп,
Дээрги-Чаяакчы чугаалаан. –
24 А өргээмден үнүп тура, улус Меңээ удур
үймээн үндүргеннерниң мөчү-сөөгүн көрүп каар;
оларны курттар-даа, өшпес от-даа кезээ шагда чиир ^w,
олар бүгү кижи төрелгетенге ческинчиг болур».