Isa 8 | TyvTUV | STEP | Дээрги-Чаяакчы меңээ: «Улуг самбырадан ап алгаш, улуска билдингир кылдыр аңаа: „Магер-шелал-хаш-баз“

‏ Isaiah 8

Ассирия – Дээрги-Чаяакчының чепсээ

1 Дээрги-Чаяакчы меңээ: «Улуг самбырадан ап алгаш, улуска билдингир кылдыр аңаа: „Магер-шелал-хаш-баз“ ^{▼▼ Дорт утказы-биле «Олчазынче божуулаар, үптээшкинче далажыр» дээн.} – деп бижип каг ^b. 2 А Мен Бодумга Бурганның бараалгакчызы Урия ^c биле Иеверехияның оглу Захарияны бүзүрелдиг херечилер кылдыр кыйгырып аар мен» – дээн.

3 Мен ынчан өттүр билир кадайым-биле чоокшулажырымга, ол иштели бергеш, оол уруг божуп берген. Дээрги-Чаяакчы меңээ: «Оглуңну Магер-шелал-хаш-баз* деп адап ал. 4 Чүге дээрге бо чаш төлдүң „ачай“база „авай“деп чугааланырының мурнунда-ла, Дамаскының эртине-байлаан болгаш Самариядан үптеп алган чүвезин ^d Ассирияның хааны олчалап алгаш баар» – дээн.

5 Дээрги-Чаяакчы меңээ катап база чугаалаан: 6 «Бо чон оожум аккан Силоам суун ^{▼▼ Силоам суу – Иерусалимни бүзээлел үезинде безин суг-биле хандырып турган агым суг (Ин. 9:7 көр).} херекке албайн, Рецин болгаш Факей-биле эвилелдежиринге идегеп ^f, өөрүп турар-дыр. 7 Ол дээш, Дээрги олче улуг, шапкын Евфрат хемниң суун – Ассирияның ат-алдарлыг хаанын ыдыптар ^g. Ол хем бодунуң бүгү адырларындан көдүрүлгеш, эриин ажыр агып, 8 Иудеяже үерлеп киргеш, ону хөме ап, моюнга чедир көдүрлү бээр ^h; ооң хөме аккан чалгыглары сээң чериңни бүрүнү-биле шыва аптар, о Эммануил! ^{▼▼ Эммануил – 7:14 шүлүктү көр.}»

9 Бүгү чоннар, шимээргеп хөлзеңер, ынчалза-даа чылча шаптырар силер! Бүгү ырак чурттар, тооп дыңнаңар! Тулчуушкунга белеткенип-даа алзыңарза, чылча шаптырар силер; тулчуушкунга белеткениңер, ынчалза-даа чылча шаптырар силер! 10 Бодалдарыңар бодап алыңар, ынчалза-даа олар болдунмайн баар; сөзүңер чугаалаңар, ынчалза-даа ол бүтпес ^j, чүге дээрге Бурган бистиң-биле!

Дээрги-Чаяакчыдан коргары

11 Дээрги-Чаяакчы күштүг холун менче салгаш, мээң-биле чугаалажып, бо чоннуң оруун эдербезин сагындырып турду. Ол мынча дээн: 12 «Бо чоннуң сүлчээ деп адаар бүгү чүвезин ынча деп санаваңар; ооң коргар чүвезинден коргуп-сүртевеңер ^k. 13 Аг-шериглиг Дээрги-Чаяакчының ыдыктыын хүндүлеңер, Оон коргуңар, Оон сүрээдеңер! 14 Дээрги-Чаяакчы Израиль биле Иудея ийиге чок-ла болза ыдыктыг чер болур ^l, чок-ла болза моондак даш, тептигер хая болур ^m. Ол Иерусалимниң чурттакчыларынга какпа-дузак болур. 15 Олардан хөй улус тептиккеш, чылча кээп дүжер, дузакка киргеш, туттуруп аар».

16 Мен херечилелимни шыгжап каайн, Бурганның ажыдыышкынын өөреникчилерим көрүп турда, таңмалап каайн ⁿ. 17 Дээрги-Чаяакчы израиль чондан хая көрүнген-даа болза, Ону манаар мен, Аңаа идегээр мен ^o.

18 Мен база Дээрги-Чаяакчының меңээ бергени ажы-төл – бо-дур бис ^p. Мээң ажы-төлүм – Сион дагда чурттап турар Аг-шериглиг Дээрги-Чаяакчының Израильге берген, баш бурунгаар айыткан демдектери ол-дур ^q.

19 Бир эвес силерге: «Өлгеннерниң сүнезиннерин кыйгырып, сымыранып турар караң көрнүр улустан чүве айтырыңар» – дээр болза ^r, «Чон бодунуң Бурганындан айтырар ужурлуг эвес чүве бе? Дириглер дугайында өлүглерден канчап айтырар чүвел? ^s» – деп харыылаңар. 20 Бурганның хоойлузу база ажыдыышкыны чүү деп турарын көрүңер! Бир эвес улус бо сөс ёзугаар чугаалавас болза, оларда хаяа чырыы чок-тур ^t. 21 Ындыг улус чер кырынга муңгарап-деңгереп, аштап-суксай берген улчуп чоруп каар; аштаан үезинде хорадап, боттарының хаанын база Бурганын каргаар ^u. 22 Олар өрү-даа көөрге, черже-даа көөрге, чүгле качыгдал, коргунчуг дүмбей караңгы көстүр, олар дүмбей караңгыже октаттырар ^v. Ындыг-даа болза, караңгы биле баш муңгаш байдал кезээ мөңгеде турбас.