Jam 1 | TyvTUV | STEP | Бурганның база Дээрги Иисус Христостуң чалчазы Иаковтан байыр . Өске чоннар аразында тоо быдаргай чурттап чоруур он ийи израиль аймакка амыр-менди чедирдим!

‏ James 1

Киирилде сөстер

1 Бурганның база Дээрги Иисус Христостуң чалчазы Иаковтан байыр ^a. Өске чоннар аразында тоо быдаргай чурттап чоруур он ийи израиль аймакка ^b амыр-менди чедирдим! ^{▼▼ Он ийи израиль аймак дээш, Иаков Бурганның бүгү чонун, христиан ниитилелди киириштир, бодап турар чадавас.}

Бүзүрел болгаш мерген угаан

2 Ха-дуңма, янзы-бүрү шенелделер орууңарны моондактаза, аажок кежиктиг бис деп санаңар! ^d 3 Шенелдени ажып эрткен соонда, бүзүрелиңер силерни шыдамык болдурарын билир болгай силер ^e. 4 А шыдамык чорук ^f, бодунуң ээлчээнде, бүрүн салдарын көргүзер, ол силерни бүгү талазы-биле болбаазыраңгай, кандыг-даа четпес-дудуу чүве чок улус кылыптар ^g.

5 А кайы-бирээңерге мерген угаанны чедир бербээн болза, ол кижи Бургандан мөргүп дилезин. Бурган мерген угаанны хамык улуска чүрээниң ханызындан, чеме-хала чокка хайырлап турар болгаш, аңаа база бээр ^h. 6 Ынчалза-даа ол кижи бүзүрел-биле, ынай-даа чигзиниг чок дилээр ужурлуг ⁱ, чүге дээрге чигзинген кижи хатка сывыртадып, доза шаптырткан далай чалгыынга дөмей. 7 – 8 Хары угда ийи сагыштыг кижи ^j бодунуң кылып турар чүүлдеринге турум эвес, шиитпир чок болур. Ындыг кижи Дээрги-Чаяакчыдан кандыг-бир чүүл алырын кордавазын.

Ядыы болгаш бай христианнарга чагыг-сүме

9 Түреңги бүзүрээн кижи Бурганга өрү көдүртүп турары дээш чоргаарланыр ужурлуг ^k. 10 А бай-шыырак чурттап чоруур бүзүрээн кижи Бурганга куду көрдүргени дээш чоргаарланыр ужурлуг: ол, үези кээрге, шөлде чечек дег оңуп, чиде бээр. 11 Хүн өрттендир чип, кааңнаарга, оът-сиген кадып каар, ооң чечээ тоглааш, аянныг хевири үрели бээр. Бай кижи база бодунуң хамык ажыл-херээн бүдүрүп чорааш, шак ынчаар чиде бээр ^l.

Шенелде болгаш күткүлге

12 Шенелделерни шыдажып эртип турар кижи амыр-чыргалдыг, чүге дээрге оларны шыдажып эрткеш ^m, Бурганга ынак улуска Ооң аазааны шаңналды – мөңге амыдыралды алыр ⁿ. 13 Шенелделерге күткүткен кым-даа болза: «Бурган мени күткүп турар-дыр» – деп чугаалавазын. Чүге дээрге Бурган бузутка күткүтпес болгаш Боду база кымны-даа күткүвес. 14 А кижи бүрүзүн ооң бодунуң-на күзээшкиннери күткүүр. Олар ону халзыптар база дузактап алыр. 15 Ындыг күзээшкиннер сааттангаш, бачыт төрүп алыр ^o, а үүлгеткен бачыт, бодунуң ээлчээнде, долузу-биле өзүп-мандааш, өлүмге чедирер ^p.

16 Ханы ынак ха-дуңма, дуурайлатпаңар ^q. 17 Кандыг-даа буянныг база болбаазыраңгай белек өрүтен, дээрниң чырымалдарын чаяаган Бурган Ададан кээр ^r. А Бурганда өскерилге-даа, өскерлиишкиннерниң хөлегези-даа чок ^s. 18 Ол бисти, Ооң бүгү чаяалгазының иштинде баштайгы дүжүт ышкаш болурувус дээш ^t, Бодунуң күзел-соруу-биле алыс шынның сөзүн дамчыштыр амыдыралче тынгарган ^u.

Дыңнап болгаш чагыртып өөрениңер

19 Ханы ынак ха-дуңма, мону дыңнаңар: кижи бүрүзү чулчуруурун шеглеп ^v, дыңнаарынче сундугуп көрзүн база ол ышкаш белен-селен килеңневезин ^w. 20 Чүге дээрге килеңге алыскан кижи Бурганның мурнунга чөптүг-шынныг чорук чедип ап шыдавас. 21 Ындыг болганда, кандыг-даа бужар сагыш болгаш бузуттуг үүлгедиглерниң артынчызындан адырылгаш ^x, Бурганның чүректериңерге тарып турар сөзүн – силерни камгалап шыдаар күчүлүг сөстү – чөпшүл хүлээп алыңар.

22 Бурганның сөзүн чүгле кулак дашты-биле дыңнап эрттирбейн, ону херек кырында боттандырып чоруңар ^y. Оон башка боттарыңарны мегелээниңер ол. 23 Бурганның сөзүн дыңнаарынга өй, а ону херек кырында боттандырбас кижи көрүнчүкке арнын кайгаан кижиге дөмей-дир. 24 Ол бодун кайгап-кайгап, өскээр чайлай бергеш, көрүнчүкке канчаар көзүлгенин дораан уттуп алыр. 25 А Бурганның хосталганы хайырлаар болбаазыраңгай хоойлузун ^z дыңнаан кижи ону дораан-на уттуп албас, а херек кырында боттандырып, бодун ооң аайы-биле ап чоруур болза, ажыл-херектеринге амыр-чыргалдыг болур ^aa.

26 Бодун Бурганны хүндүлеп чоруур мен деп санаар, ынчалза-даа аксын тыртып шыдавас кижи ^ab бодун боду мегелеп чоруур база ооң Бурганны хүндүледим дээри хей чүве-дир оң. 27 Бурган Аданың хүлээп аары алыс шынныг, арыг болгаш кем чок хүндүткел болза түрегделге туттуруп чоруур өскүстерге, дулгуяк кадайларга дуза чедиреринде ^ac база бо делегейниң багынга борашпайн амыдыраарында ^ad.