Jer 1 | TyvTUV | STEP | Хелкияның оглу Иеремияның сөстери бо-дур. Иеремия болза Вениаминниң аймааның черинде турар Анатот хоорай чурттуг Бурганның бараалгакчыларының бирээзи турган.

‏ Jeremiah 1

1 Хелкияның оглу Иеремияның сөстери бо-дур. Иеремия болза Вениаминниң аймааның черинде турар Анатот хоорай ^a чурттуг Бурганның бараалгакчыларының бирээзи турган. 2 Дээрги-Чаяакчы аңаа Бодунуң сөзүн Амоннуң оглу иудей хаан Иосияның хааннаашкынының он үшкү чылында ^b ажыдып эгелээн. 3 Дээрги-Чаяакчы Иеремияга Иосияның оглу иудей хаан Иоакимниң чагырган үезинде ^c база сөөлзүредир – Иосияның оглу иудей хаан Седекияның ^d хааннаашкынының он бирги чылын төндүр ^e чугаалап келген. Ол-ла чылдың бешки айында дайзыннар Иерусалимниң чурттакчыларын тудуп алгаш, сүрүп аппарган ^f.

Дээрги-Чаяакчының Иеремияны кыйгырганы

4 – 5 Дээрги-Чаяакчы меңээ Бодунуң сөзүн ажыдып:

«Хырын иштинге ботталдырып кааным мурнунда-ла
сени билир турдум,
иең иштинден үнүп кээриң мурнунда-ла
сени ыдыктап аңгылап кагдым ^g,
делегейниң чоннарынга медээчи кылдыр
салып кагдым ^h» – деп чугаалаан.

6 Мен: «О, Дээрги-Бурган-Чаяакчы! Ам-даа аныяам кончуг болгаш, чүве чугаалап билбес-тир мен» – деп харыыладым ⁱ.

7 А Дээрги-Чаяакчы меңээ:
«„Аныяк мен“диве,
Мен сени кымче-даа чорудупсумза, баар сен,
Мээң сеңээ дужааган бүгү чүвемни чугаалаар сен!
8 Кымдан-даа кортпа ^j,
чүге дээрге Мен сээң-биле боор мен,
сени камгалаар мен ^k» – дээн.

9 Дээрги-Чаяакчы холун сунуп, аксымга дээскеш ^l, меңээ:
«Бодумнуң сөстеримни ам сээң аксыңдан
үнер кылып кагдым ^m.
10 Көрдүң бе, Мен бөгүн сени чоннар, күрүнелерни
харагалзаар кижи кылдыр томуйлап тур мен –
дазылы-биле тура тыртар, үрегдээр,
узуткаар, буурадыр, быжыглаар
база тарып олуртур сен ⁿ» – дээн.

Бурганның чорутканы ийи көстүүшкүн

11 Дээрги-Чаяакчы меңээ Бодунуң сөзүн ажыдып: «Иеремия, сен чүнү көрүп тур сен?» – деп чугаалады ^o. Мен: «Миндаль ыяштың будуун көрүп тур мен» – деп харыыладым. 12 Дээрги-Чаяакчы меңээ: «Шын көрүп турар-дыр сен, ол дээрге Мээң удумзуравайн ^{▼▼ Еврей дылда «удумзуравас» деп сөс (шокед) «миндаль ыяш» (шакед) деп сөс-биле дөмей дыңналыр.} турарым ол-дур, Бодумнуң сөзүмнү күүседирим ол-дур» – дээн.

13 Дээрги-Чаяакчы меңээ Бодунуң сөзүн база катап ажыдып: «Сен чүнү көрүп тур сен?» – деп чугаалады. Мен: «Хайынган пашче көрүп тур мен, ол паш соңгу чүкте ^q турар-дыр» – деп харыыладым. 14 Дээрги-Чаяакчы меңээ: «Бо черниң бүгү чурттакчыларын айыыл-халап соңгу чүктен хөме алыр-дыр ^r» – дээн. 15 «Мен ам соңгу күрүнелерниң бүгү аймактарын кыйгырар мен ^s – деп, Дээрги-Чаяакчы медеглээн. – Олар чедип келгеш, Иерусалимниң ханаларын, Иудеяның бүгү хоорайларын дескиндир бүзээлээш, аймак бүрүзү бодунуң дүжүлгезин Иерусалимниң иштинге тургузуп аар. 16 Мен Иудеяның үүлгеткен бүгү кем-буруузу дээш, ооң Менден ойталап, өске бурганнарга айдызаар өргүлдер кыпсып, холу-биле кылып алган дүрзүлеринге мөгейип турганы дээш, аңаа удур шииткелим үндүрер мен.

17 А сен куруң куржанып белеткенип ал ^t, баргаш, Мээң сеңээ дужааган чүвемниң шуптузун улуска чугаала, оларның мурнунга сирилеве, оон башка Мен сени, олар көрүп турда, сириледиптер мен! 18 Бо черниң бүгү чурттакчылары – Иудеяның хааннары, нояннары, Бурганның бараалгакчылары болгаш карачал чону сеңээ удур болур, а Мен ам сени шивээ, демир адагаш, хүлер хана дег быжыг кылдыр тургузуп кагдым ^u. 19 Олар сеңээ удур халдап үнер, ынчалза-даа күш четпестер, чүге дээрге Мен сээң-биле боор мен – деп, Дээрги-Чаяакчы медеглээн. – Мен сени камгалаар мен».