Jer 10 | TyvTUV | STEP | Израиль чон! Дээрги-Чаяакчының сеңээ чугаалаан сөзүн дыңна!

«Өске чоннарның оруун эдербеңер,
оларның коргары дээрде онзагай чүүлдерден кортпаңар! – деп чугаалаан. –
3 Өске чоннарның ёзу-дүрүмнери хоозун болгай:
олар аргадан ыяш кезип эккээрге,
шевер кижи ону балды-биле чазап кылгаш,
4 алдын, мөңгүн-биле каастап каан база
маска, кадаглар дузазы-биле тендиңневес кылдыр
быжыглап каан дүрзү-бурганныг боор ^a.
5 Ногаа олурткан шөлде хоютку дег,
ол дүрзү-бурганнар чугаа-сөс чок.
Оларны улус көдүрүп, дажыглап чоруп турар,
а боттары чаңгыс-даа базым кылып шыдавас ^b.
Олардан кортпаңар, олар хора халдадыр харыы-даа чок,
ачы-дуза чедирер шаа-даа чок ^c».

6 Сеңээ дөмей кым-даа чок, Дээрги-Чаяакчы! ^d
Өндүр улуг-дур сен! Сээң адың өндүр бедик, күчү-күштүг!
7 Сенден кортпас кижи бар бе, чоннарның Хааны? ^e
Чаңгыс Сеңээ ол бүгү чогуур-дур.
Аймак-чоннарның бүгү мерген угаанныгларының аразында,
бүгү күрүнелерде Сеңээ дөмей кым-даа чок!

8 Ол улус мелегей болгаш бүдүүлүк.
Оларның өөредии чөгенчиг – анаа-ла ыяш.
9 Олар Фарсистен ^f калбартыр соктап каан мөңгүн,
Уфазтан алдын эккеп турар.
Чазаныкчы, эзилдирикчи усчулар ол бүгүден дүрзү-бурганнар кылгаш,
каас-коя хеп кедирип турарлар.
10 А Дээрги-Чаяакчы – алыс шын Бурган-дыр,
Ол – дириг Бурган, мөңге Хаан-дыр.
Ооң килеңинден чер сирилээр,
Ол хорадаарга, кандыг-даа чон шыдажыр харык чок боор.

11 Ол улуска: «Бурганнарыңар чер биле дээрни чаяаваан ^g,
олар чырык чер кырынга, дээр адаанга узуткаттырар ^{▼▼ Бо шүлүктү еврей эвес, арамей дылда бижээн. Ол үеде арамей дыл Чоокку Чөөн чүкке чоннар аразында харылзааның дылы турган.}» – деп чугаалаңар.

12 А Дээрги-Чаяакчы Бодунуң күчү-күжү-биле черни чаяап каан,
Бодунуң мерген угааны-биле өртемчейни тудуп тургускан,
Бодунуң угааны-биле дээрни хере азып каан ⁱ.
13 Ол үнүн дыңзыдарга, дээрде суглар шимээргей бээр;
Ол булуттарны черниң кыдыг-кызыгаарындан бөлүп эккеп, чаъс чаап турда,
чаңныктарны чаяап, Бодунуң шыгжамырындан хатты үндүр хадыдып турар ^j.

14 Билиг чок кижи бүрүзү сээдең ^{▼▼ Азы: «Кижи бүрүзү сээдең, билиг чок».};
шевер-даа эзилдирикчиниң шуткуп алган дүрзү-бурганы
ооң адын баксырадыр ^l,
чүге дээрге ооң шуткаан чүүлдери – меге-дир, оларда тын чок ^m.
15 Олар хоозун куруг, кочуланчыг кылыглар-дыр,
кеземче үези кээрге, олар чиде бээр.
16 А Иаковтуң Үлүү болур Бурган ⁿ ындыг эвес:
бүгү чүвени Ол чаяаган,
Израиль – Ооң өнчү болур аймаа база ээлээн чери ^o,
Ооң ады – Аг-шериглиг Дээрги-Чаяакчы! ^p

Кел чыдар айыыл-халап

17 Бүзээлелде чурттап турар чон,
чуртуңну кааптарынга белеткенип, эт-севиң чыып ал.
18 Чүге дээрге Дээрги-Чаяакчы:
«Мен бо удаада шак бо черниң чурттакчыларын үндүр сывырып,
айыыл-халапка таварыштырар мен, оларны дайзыннары тудуп алзын» – дээн-дир.

19 Ат болдувус! Хилинчээвис көрдүвүс,
балыгларывыс саргып аарып тур ^q.
Бо аарышкыга төлептиг болган болгаш,
шыдажып эртер апаар-дыр бис.
20 Бистиң оран-сававыс хоозураан-дыр,
ооң хендирлерин ^{▼▼ Оран-сава, хендирлер – Иерусалим хоорайны азы Бурганның өргээзин ойзу адап көргүскен.} үзе тыртып каан-дыр ^s.
Оолдарывыс бисти каапкаш, чиде берген.
Оран-сававысты тургузуп бээр,
шывыгларын кырынче салып бээр кижи ам чок-тур.
21 Чүге дээрге чагырыкчылар сээдеңнээн-дир,
Дээрги-Чаяакчыже чүткүвестээн-дир.
Ынчангаш олар ам чедимчелиг болбас,
оларның албаты чону тоо быдарай берген ^t.

22 Медээ чедип келди, соңгу чүкте чурттан улуг дааш-шимээн дыңналды! ^u
Иудеяның хоорайлары хоозурап, шөө-бөрүлер чурттаар чер апаар-дыр.

23 Билир бис, Дээрги-Чаяакчы:
кижи бодунуң оруун чагырып шыдавас,
баар уун башкарып шыдавас ^v.
24 Бисти кезедип көрем, Дээрги-Чаяакчы,
чүгле чөптүү-биле, килеңнээн үеңде эвес! ^w
Бисти чөгенчиг улус кылбайн көрем!
25 Сээң килеңиң Сени билбес чоннарже,
Сээң адыңны мактавас аймактарже кыптыксын! ^x
Чүге дээрге олар израиль чонну сыырыпкан ^y,
ону чипкен, узуткап каан
база ооң чурттаан черин хоозурадып каан болгай ^z.