Jer 12 | TyvTUV | STEP | Сээң-биле чаргы-чаалы кылыр болзумза, Сен чөптүг-шынныг болур сен, Дээрги-Чаяакчы! Ындыг-даа болза, Сээң-биле чөптүг чорук дугайында чугаалажып көрейн. Бузуттугларның оруу чүге чедимчелиг боорул, кара сагыштыглар чүге амырап чыргаарыл?

‏ Jeremiah 12

Иеремияның Бурганга хомудалы

1 Сээң-биле чаргы-чаалы кылыр болзумза, Сен чөптүг-шынныг болур сен, Дээрги-Чаяакчы! ^a
Ындыг-даа болза, Сээң-биле чөптүг чорук дугайында чугаалажып көрейн.
Бузуттугларның оруу чүге чедимчелиг боорул,
кара сагыштыглар чүге амырап чыргаарыл? ^b
2 Сен оларны тарып өстүрүп кагдың –
олар дазылдангаш, улгадып өскеш, чимизин берип тур.
Сээң адың оларның аксындан дүшпестээн-дир,
а сеткил-чүрээнден ырак-тыр ^c.
3 Дээрги-Чаяакчы, Сен мени билир сен, көрүп турар сен,
сеткил-чүрээмни шенеп көрген сен –
ол Сээң-биле болду ^d.
А бузуттуг улусту, хойлар дег, дөгерери-биле сүрүп аппар,
кырар хүнүн айтып каап көр.

4 Чежеге чедир кырында чурттаан кижилерниң
кем-буруузу дээш чер качыгдаарыл,
хову-шөлде оът-сиген оңуп кадарыл? ^e
Аң-мең-даа, куштар-даа чиде берген ^f,
чүге дээрге ол кижилер:
«Дээрги-Чаяакчы бистиң оруувусту көрбес-тир» – деп турар-дыр.

Дээрги-Чаяакчының Иеремияга харыызы

5 «Чадаг кижилер-биле чарышкаш, шааң төне берген болза,
аъттар-биле канчап быражыр сен?
Оожум шөлээн черге айыыл чок чурттап турган болзуңза,
Иорданның эриинге канчап шыдажыр сен? ^{▼▼ Иорданның эриинге айыылдыг аң-араатан турумчуп турган (Иер. 49:19; 50:44 көр).}
6 Сээң ха-дуңмаң, төрел бөлүүң улузу безин сени садыпкан-дыр,
олар сени истеп-сүрүп турар-дыр ^h.
Сеңээ эки сөс чугаалаарга безин, оларга бүзүреве ⁱ.

7 Мен Бодумнуң оран-савамны, Бодумнуң ээлээн черимни каапкан мен,
сеткилимден ынак чонумну дайзыннар холунга хүлээдип берген мен.
8 Мээң чонум шырыш иштинде арзылаң дег:
ол Менче ырланып эгелээрге, ону көөр хөңнүм чок апарды.
9 Мээң чонум шокар араатан куш дег,
өске араатан куштар ону бүзээлеп, халдап келген.
Барып, хову-шөлде бүгү аң-араатанны чыып эккелиңер! ^j
Чедип келгеш, Мээң чонумну дойлап сыырыпсыннар!
10 Мөөң кадарчылар Мээң виноградым шөлүн үрегдеди ^k,
Мээң ээлээн черимни таптай басты.
Мээң эргим черимни хоозурадып, ээнзиретти.
11 Ээлээн черимни ээн кургаг хову кылдыр хуулдурупту,
ол ам Мээң мурнумда ээнзиреп калган ыглап тур,
чер-чурт ээнзирээн-дир, ол дээш сагышсыраар кижи чок-тур.
12 Ээн кургаг ховуда бүгү тас тейлерни кырлай базып,
узуткакчылар чедип келди;
Дээрги-Чаяакчының хылыжы черниң чурттакчыларын
бир кыдыындан өске кыдыынга чедир кыргып-хыдып каапты,
кым-даа амыр-тайбың көрбестеди.
13 Улус кызыл-тас тарааш, тенниг үнүш ажаап алды ^l,
чилчиин үзүлдүр ажылдаарга-даа, ажык-дуза чок болду.
Ындыг дүжүдүңерден ыядыңар,
Дээрги-Чаяакчының чалбыыштыг килеңи ол-дур!»

Иудеяның кожа чоннары

14 Дээрги-Чаяакчы: «Израиль чонумга хайырлааным ээлээн черже семеп халдаан бузуттуг-бак кожа чоннарны ^m Мен боттарының чер-чуртундан тура тыртар мен, Иудеяның чонун база оларның аразындан тура тыртып аар мен. 15 Ынчалза-даа оларны тура тыртканым соонда, Мен оларга өршээл көргүзүп, кайызын-даа бодунуң ээлээн черинче эгидер мен ⁿ. 16 Бир эвес олар Мээң чонумнуң оруктарын истеп өөренип аар болза, боттары-ла Мээң чонумну Ваал бурганның ады-биле даңгыраглаарынга өөреткени дег, Мээң адым-биле: „Дээрги-Чаяакчы дириг!“– деп даңгыраглаар болза ^o, олар база Мээң чонумнуң кезии апаар. 17 А Мени тооп дыңнавас чон турар болза, ону шуут узуткап, тура тыртып каар мен» – деп чугаалаан.