Jer 14 | TyvTUV | STEP | Дээрги-Чаяакчының Иеремияга каңдаашкын дугайында ажыдып каан сөзү бо-дур.

‏ Jeremiah 14

Каңдаашкын болгаш дайын-чаа

1 Дээрги-Чаяакчының Иеремияга каңдаашкын дугайында ажыдып каан сөзү бо-дур.

2 «Иудея ыглап турар, ооң хоорайлары харыксырап калгаш,
черже кээп дүшкеш, кажыыдап турар ^a,
Иерусалимде ыы-сыы – кулак уюк.
3 Ызыгууртаннар чалчаларын сугладып чорударга,
демгилери кудуктарга келгеш, узар суг чок боорга,
куруг саваларлыг чанып кээп, ыядып-човаанындан арнын чажырып турар.
4 Чаъс чагбастаан болгаш ^b, чер кыры чарлыгылап калган.
Тараажылар бак атка кирип, арнын чажырып алган! ^c
5 Элик безин оът-сиген үнмээн боорга,
чаа төрүттүнген төлүн ховуга каап турар.
6 Черлик элчигеннер тас тейлерде туруп алган,
шөө-бөрүлер дег, чыт хап турар,
оларның карактары соолбурарып калган,
чүге дээрге оът-сиген үнмээн-дир».

7 Кем-буруувус бисти сойгалап тур,
ынчалза-даа Бодуңнуң адың бодааш ^d,
биске болчуп көрем, о Дээрги-Чаяакчы.
Ийе, бис Сеңээ дыка хөй катап өскерлип турдувус,
Сээң мурнуңга бачыт үүлгедип шаг болдувус.
8 Израильдиң Идегели ^e, айыыл-халап үезинде ооң Камгалакчызы!
Чүге Сен ам бо черде хары кижи дег,
хонуп аар дээш түр доктааган аян-чорукчу дег апардың?
9 Чүге Сен ам аймаарай берген кижи дег,
кымны-даа камгалаар күш чок дайынчы дег апардың?
Дээрги-Чаяакчы, бистиң аравыста болгай сен,
бис Сеңээ хамааржыр болгай бис. Бисти кагбайн көрем!

10 Дээрги-Чаяакчы бо чон дугайында:
«Олар буттарын чагырбайн, улчуурунга ынак чорду,
ол дээш Мен оларга таарзынмайн бардым.
Мен ам оларның бузуттуг үүлгедиглерин бодап кээр мен,
бачыттары дээш кезедир мен ^f» – дээн.

11 Дээрги-Чаяакчы меңээ: «Бо чонга ачы-буян дилеп, мөргүве! ^g 12 Олар шээрленир-даа болза, ыы-сыызын дыңнавас мен ^h, бүрүн өрттедир болгаш далган-тараа өргүлдери-даа кылыр болза, Меңээ таарышпас ⁱ. Харын оларны дайын-чаа, аш-чут, хамчык аарыг-биле узуткаар мен! ^j» – деп чугаалаан.

13 Мен ынчан: «Аа халак, Дээрги-Бурган-Чаяакчы! Сээң медээчилериң улуска: „Дайын-чаа көрбес силер, аш-чут-даа силерге болбас, чүге дээрге Бурган бо черге силерге быжыг тайбыңны хайырлаар“ ^k – деп чугаалап тур» – дээн мен.

14 Дээрги-Чаяакчы меңээ: «Ол медээчилер Мээң адым тудуп, мегелеп медеглеп турар-дыр! ^l Мен оларны айбылап чорутпаан, оларга айтыышкыннар бербээн, олар-биле чугаалашпаан мен. Менден келбээн меге ажыдыышкыннар, хоозун төлге, боттарының даап бодаан чүүлдерин өттүр билген медеглелдер кылдыр силерге чугаалап турар улус-тур» – дээн.

15 Ынчангаш Дээрги-Чаяакчы: «Мээң айбылап чорутпааным, Мээң адым тудуп медеглеп турар медээчилер: „Бо черге дайын-чаа-даа, аш-чут-даа турбас“– деп турар-дыр. Олар боттары дайын-чаа биле аш-чуттан өлүп каар ^m. 16 Ол медээчилерни дыңнап турган улус аш-чут биле дайын-чаадан өлүп каарга, оларны Иерусалимниң кудумчуларынче үндүр октаптар, ол улусту, оларның кадайларын, оглу-кызын ажаар кижи тывылбас ⁿ. Мен оларже боттарының чедип алганы айыыл-халапты төптер мен. 17 Ол сөстерни оларга дамчыт» – дээн.

Мээң караамны чаштар долуп,
дүне-даа, хүндүс-даа соксаал чок ага берзин ^o,
чүге дээрге мээң күжүр хайыралыг чонум
коргунчуг балыглардан, аар кемдээшкиннерден
харыксырап калган-дыр ^p.
18 Шөлче үнүп келгеш, көөрүмге,
хылыш-биле шанчып каан улус чыдыр,
хоорайга чедип келгеш, көөрүмге,
аштап, хилинчектенген улус тур ^q.
Бурганның медээчизи-даа, бараалгакчызы-даа
чүнү-даа билбес апаргаш, чуртта улчуп чоруур-дур ^{▼▼ «Чуртта улчуп чоруур-дур» деп сөстерниң утказы эки билдинмес. Болгу дег өске утказы мындыг: «Албан-хүлээлгезин күүседип турар-дыр».}.

19 Таанда-ла Сен Иудеядан шуут ойталадың бе? ^s
Таанда-ла Сээң сеткил-сагыжың Сионну көөр хөңнү чок бе?
Чүге Сен бисти экирип шыдавас кылдыр эттеп-соп тур сен?
Амыр-тайбың кээр боор деп идегеп турдувус,
ынчалза-даа ачылыг чүү-даа чок-тур,
экирииривисти манап турдувус,
ынчалза-даа коргунчуг хай-халаптар чедип келди ^t.
20 Кем-буруувусту билир бис, Дээрги-Чаяакчы,
ада-өгбевистиң бузут-багын база билир бис,
Сээң мурнуңга бачыт үүлгеткен болгай бис ^u.
21 Ынчалза-даа Бодуңнуң адың бодааш, бистен ойталава,
Бодуңнуң алдарлыг дүжүлгеңни куду көрдүреринче чыгава!
Бис-биле чарган чагыг-керээңни сактып кээп, ону үревейн көрем ^v.
22 Өске чоннарның хоозун дүрзү-бурганнары чаъс чагдырып шыдаар бе?
Дээр чайыкты боду хайырлаар бе? ^w
Дээрги-Чаяакчы Бурганывыс, Сен хайырлаар эвес сен бе?
Сеңээ идегеп тур бис, чүге дээрге ол бүгүнү Сен чаяап турар болгай сен.