Jer 16 | TyvTUV | STEP | Дээрги-Чаяакчы меңээ Бодунуң сөзүн ажыдып:

‏ Jeremiah 16

Хай-халап хүнү

1 Дээрги-Чаяакчы меңээ Бодунуң сөзүн ажыдып: 2 «Бо черге кадай алба, оолдуг-кыстыг-даа болба» – деп чугаалаан. 3 Чүге дээрге Дээрги-Чаяакчы бо черге төрүттүнген оолдар, кыстар дугайында, оларны божаан иелер болгаш ботталдырган адалар дугайында: 4 «Олар хилинчектиг өлүм-биле өлүр, улус олар дээш кажыыдавас, оларны орнукшутпас – черге өдек дег чыдып каарлар ^a. Олар дайын-чаа биле аш-чутка узуткаттырып аар ^b, оларның мөчү-сөөктери дээрниң куштарынга, черниң аң-араатанынга чемиш болур ^c» – деп чугаалаан.

5 Дээрги-Чаяакчы: «Мөчээн кижи-биле байырлажыышкын ёзулалы кылган бажыңче барба – деп медеглээн. – Ол кижиниң ажыын ажып, ыглап-сыктап, кажыыдал үлежип барба ^d, чүге дээрге Мен бо чондан амыр-тайбыңымны, ээ-хайырамны болгаш энерелимни хунаап алган мен. 6 Бо черге ат-сураглыг-даа, карачал-даа улус өлүп каар, оларны орнукшутпас, олар дээш кажыыдавас, кым-даа олар дээш качыгдал демдээ кылдыр мага-бодун балыглавас, бажын чүлүвес ^e. 7 Өлген кижи дээш кажыыдаан улусту аргалаары-биле кым-даа оларга аъш-чем бербес, мөчээн ада-иези дээш безин оларже аргалалдың дашказын сунмас. 8 Дойлаашкын чоруп турар бажыңче база барба, ол улус-биле кады дойлап олурба».

9 Аг-шериглиг Дээрги-Чаяакчы, Израильдиң Бурганы: «Силерниң чуртталгаңар дургузунда, силерниң назыныңарда-ла, Мен бо черге өөрүшкү биле хөглээшкин үнү, күдээ оол биле келин кыстың үнү дыңналбас кылып каар мен ^f – дээн. – 10 Кажан сен бо чонга ол бүгү сөстерни дамчыдарыңга, олар сенден: „Чүү дээш Дээрги-Чаяакчы биске ындыг улуг айыыл-халап оштады? Кем-буруувус кандыг чүвел? Дээрги-Чаяакчы Бурганывыстың мурнунга бачыдывыс кандыг чүвел?“– деп айтырар ^g. 11 Ынчан оларга: „Силерниң ада-өгбеңерниң Менден ойталааны дээш!“– дээр сен – деп, Дээрги-Чаяакчы медеглээн. – Олар өске бурганнарга мөгейип, оларга бараан болуп, оларның мурнунга доңгая кээп дүжүп турган ^h, а Менден ойталап, Мээң хоойлумну сагывайн барганнар. 12 Силерниң кылып турар үүлгедиглериңер ада-өгбеңерниинден-даа дора ⁱ. Кайыңар-даа бузуттуг чүрээниң чөрүү чоруунуң аайы-биле чурттап, Мени тооп дыңнавайн турар. 13 Ынчангаш Мен силерни бо черден силерниң-даа, ада-өгбеңерниң-даа билбес чорааны чуртче үндүр сывырар мен; силер аңаа өске бурганнарга хүндүс-даа, дүне-даа бараан болур силер ^j, чүге дээрге силерже ээ көрүнмес мен.

14 Ынчалза-даа үе кел чыдар – деп, Дээрги-Чаяакчы медеглээн, – улус ынчан: „Израиль чонну Египеттен үндүре берген дириг Дээрги-Чаяакчының ады-биле!“– деп даңгыраглавайн баар, 15 харын олар: „Израиль чонну соңгу чүкте черден, оларны ынаар үндүр сывырыпканы бүгү чурттардан үндүре берген дириг Дээрги-Чаяакчының ады-биле! ^k“– деп чугаалап эгелээр, чүге дээрге оларның ада-өгбезинге берген черимче оларны дедир эгидер мен.

16 Мен хөй санныг балыкчыларны чорудар мен – деп, Дээрги-Чаяакчы медеглээн, – олар израильчилерни балык ышкаш тудар ^l. Ооң соонда хөй санныг аңчыларны чорудар мен, олар израильчилерни даг, тей болгаш хаяларда чарык бүрүзүнден үндүр сывырар. 17 Чүге дээрге Мээң карактарым оларның бүгү оруктарын көрүп турар ^m, олар Менден чаштып шыдавас – оларның кем-буруузу Мээң карактарымдан чажыртынмаан. 18 Мен оларны кем-буруузу, бачыттары дээш база Мээң черимни амы-тын чок чүдек дүрзүлери-биле бужартатканы, Мээң ээлээн черимни боттарының чүдек-бужар чүүлдери-биле долдурганы дээш ийи дакпыр кезедир мен ⁿ».

19 Дээрги-Чаяакчы – мээң күжүм, шивээм,
хай-халап хүнүнде хоргадалым! ^o
Чер-делегейниң ужу-кыдыындан чоннар Сеңээ чедип келгеш:
«Ада-өгбевис чүгле меге, ажык-дуза чок хоозун чүүл
салгап алгаш, биске дамчыткан-дыр ^p.
20 Кижи бодунга бурганнар кылып ап шыдаар деп бе?
Ол бурганнар дээр чүвелер – Бурган эвес-тир!» – дээр ^q.

21 «Ынчангаш Мен бо удаада оларга Бодумнуң күчүлүг холумну көргүзер мен,

Мээң адым Дээрги-Чаяакчы дээрзин олар билип аар.