Jer 17 | TyvTUV | STEP | Иудеяның бачыдын демир шиш-биле, алмаз кески-биле бижип каан, оларның чүректерин калбак даш кылгаш, аңаа шыйып каан , өргүл салыр бедигээштериниң мыйыстарында оюп каан.

‏ Jeremiah 17

1 Иудеяның бачыдын демир шиш-биле, алмаз кески-биле бижип каан,
оларның чүректерин калбак даш кылгаш, аңаа шыйып каан ^a,
өргүл салыр бедигээштериниң мыйыстарында ^b оюп каан.
2 – 3 Олар өргүл салыр бедигээштеринче,
Ашера бурганга тураскааткан ыяштарынче ^c,
саглагар ыяштарынче, бедик тейлеринче,
ховуда дагларынче, боттарының оолдарынче дег, сагыш салып турар.

Иудея, бүгү эт-хөреңгиңни, эртине-байлааңны өргүл салыр бедик черлериң дээш,
бүгү девискээрлериңде үүлгедип турар бачыттарың дээш,
өске улуска олча-тывыш кылдыр бериптер мен ^d.
4 Мээң сеңээ бергеним хувааглыг чериңни
бодуңнуң бурууң-биле ышкынар сен.
Мен сени билбезиң чуртче дайзыннарыңга кул кылдыр хүлээдир мен,
чүге дээрге Мээң килеңим одун өөскүттүң, ол от мөңге кывар!» ^e

Кижи күжүнге азы Дээрги-Чаяакчыга идегел

5 Дээрги-Чаяакчы мынча дээн:

«Кижиге идегээр, кижи амытанны чөленгииш деп санаар ^f,
сеткил-чүрээ Дээрги-Чаяакчыдан ойталаан кижи каргаттырар.
6 Ол кижи ээн кургаг ховуда чадаң үнүш дег ^g, эки чүве көрбес,
сай-даштыг, изиг кургаг ховуга, кужурлуг, ээн черге чурттаар.

7 Дээрги-Чаяакчыга идегээр, Аңаа ынаныр кижи ачы-буян алыр! ^h
8 Ындыг кижи суг чанынга тараан ыяш дег болур.
Ол ыяш суг кыдыынга дазылданган болгаш, изиг-кааң үеден кортпас;
ооң бүрүлери ногаан артар, каңдаашкынныг чыл аңаа коргунчуг эвес,
ол ынчан безин чимис бээрин соксатпас ⁱ.

9 Кижиниң сеткил-чүрээ оп-мегелиг, эдип аар арга чок;
кым ону билип шыдаарыл?
10 А Мен, Дээрги-Чаяакчы, кижиниң чүрээнче өттүр көрүп,
сеткил-сагыжын шенеп турар мен ^j,
кижи бүрүзүн ооң херектерин ёзугаар, ажыл-херээниң үре-түңнелин барымдаалап,
шаңнаар азы кезедир мен ^k.

11 Шынчы эвези-биле баяан кижи ^l –
чуургаларын базып олурар, ынчалза-даа төлдери чазылбас торлаа дег ^{▼▼ Азы: «Бодунуң төрүвээни чуургалар базып олурар торлаа дег».}.
Назын ортузу четкеш, ол кижи бүгү чүвезин чидирип аар,
өлүр үезинге чедир мелегей бооп артар».

12 Ыдыктыг өргээвис дээрге
Бурганның эрте шагда көдүрлүп үнген алдарлыг дүжүлгези-дир!
13 Дээрги-Чаяакчы – Израильдиң идегели! ⁿ
Сени каапкаш барган кижи адын бужартадыр!

«Менден ойталаан улустуң алдар-адын черге таптай базар,
чүге дээрге Дээрги-Чаяакчыны – амыдырал хайырлаар суг бажын ^o –
каапкан-дыр».

Иеремияның Бургандан дуза дилээни

14 Мени экиртип көрем, Дээрги-Чаяакчы, ынчан экирий бээр мен,
мени камгалап көрем, ынчан камгалал алыр мен,
чүге дээрге Сени алгап-мактап тур мен!
15 Улус-чон меңээ: «Дээрги-Чаяакчының сөзү кайыл?
Ол сөс боттанзын!» – деп тур ^p.
16 Мен Сээң адың тудуп, улус чагырарынче чүткүвээн мен ^{▼▼ Бо домактың утказы эки билдинмес. Болгу дег өске утказы мындыг: «Мен Сээң адың-биле улус кадарарындан ойталаваан мен».},
айыыл-халап хүнү кээрин күзевээн мен, Сен Бодуң ону билир сен.
Мээң аксымдан үнген сөстер үргүлчү Сээң мурнуңга ажык.
17 Меңээ коргунчуг болбайн көрем.
Сен дээрге хай-халап хүнүнде хоргадалым болгай сен ^r.
18 Мени истеп-сүрген улустуң ады баксыразын ^s, а мээң адым баксыравазын,
олар коргуп-сүртезин, а мен коргуп-сүртевээйн!
Оларже айыыл-халап хүнүн ыдывыт,
аар согуушкун-биле оларны чылча шаап каг!

Амыр-дыш хүнүнүң дугайында

19 Дээрги-Чаяакчы меңээ: «Иудеяның хааннарының үнүп-кирип турары Улус-чон хаалгазынче, Иерусалимниң өске бүгү хаалгаларынче баргаш: 20 „Бо хаалгалар дамчыштыр кирип турар Иудеяның хааннары база бүгү чону, Иерусалимниң бүгү чурттакчылары, Дээрги-Чаяакчының чугаа-сөзүн дыңнаңар!“– деп чугаала» – дээн.

21 Дээрги-Чаяакчының силерге дамчыткан чүүлү бо-дур: «Амы-тынныг артар дизе, амыр-дыш хүнүнде чүък дажыглап чорбаңар, ону Иерусалимниң хаалгаларын дамчыштыр киирбеңер ^t. 22 Амыр-дыш хүнүнде бажыңыңардан чүък үндүрбеңер, кандыг-даа ажыл кылбаңар. Ада-өгбеңерге Мээң айытканым дег, амыр-дыш хүнүнүң ыдыктыын сагыңар ^u. 23 – 24 Ада-өгбеңер Мени тооп дыңнаваан, Менче кулаан ээктирбээн болгай. Олар чөрүү болгаш, тооп дыңнаваан, чагыг-суртаалды хүлээп албаан болгай – деп, Дээрги-Чаяакчы медеглээн. – Бир эвес Мени ылап-ла тооп дыңнаар болзуңарза, амыр-дыш хүнүнде бо хоорайның хаалгаларын дамчыштыр чүък дажыглап киирбес база амыр-дыш хүнүнүң ыдыктыын сагып, ол хүн кандыг-даа ажыл кылбас болзуңарза, 25 ынчан бо хоорайның хаалгаларын дамчыштыр Давидтиң дүжүлгезинде саадаан хааннар база нояннар кирер ^v. Олар чуузаларга олурупкаш, аът мунгаш, кирер: хааннар, оларның нояннары база Иудеяның улузу, Иерусалимниң чурттакчылары. Бо хоорай кезээ мөңгеде турар. 26 Иудеяның хоорайларындан, Иерусалимниң чоок-кавызындан, Вениаминниң ээлээн черинден, Шефеладан, даглардан, Негевтен улус чедип келгеш, Дээрги-Чаяакчының өргээзинге бүрүн өрттедир болгаш эп-найырал өргүлдери кылыр, далган-тараа өргүлдери, өөрүп четтириишкин өргүлдери болгаш айдызаар өргүлдер эккеп салыр ^w.

27 А бир эвес Мени тооп дыңнавас, амыр-дыш хүнүнүң ыдыктыын сагывас база амыр-дыш хүнүнде Иерусалимниң хаалгаларын дамчыштыр чүък дажыглап эрттирер болзуңарза, Мен ынчан ол хаалгаларны хуюкталдыр өрттедир мен! Ол дээрге Иерусалимниң шивээлерин чиир өшпес от-тур! ^x»