‏ Jeremiah 18

Дой сава кылыкчызы

1– 2Дээрги-Чаяакчы Иеремияга Бодунуң сөзүн ажыдып каан: «Дой сава кылыкчызының бажыңынче бар ^a, Мен аңаа Бодумнуң сөзүмнү сеңээ чугаалаар мен». 3Мен дой сава кылыкчызының бажыңынче кирип келгеш, көөрүмге, ол дой сава кылыр херекселиниң артында ажылдап турар болду ^b. 4Дойдан кылып турган савазының хевири үнмейн баарга-ла, ол ону бодунуң бодап алганын ёзугаар өске сава кылдыр эде кылып ап турду.

5Дээрги-Чаяакчы меңээ Бодунуң сөзүн ажыдып: 6«Израиль чон, бо дой сава кылыкчызының кылып турар чүвезин таанда-ла Мен сээң-биле боттандырып шыдавас мен бе? – деп медеглээн. – Ооң холунда дой дег, сен база Мээң холумда сен, израиль чон! ^c 7Мен кажан-даа чон азы күрүне дугайында „Ону дазылы-биле тура тыртып, буурадып, узуткап каар мен ^d“деп шиитпир хүлээп ап боор мен. 8А бир эвес ону чугаалап каан чонум бодунуң бузудундан ойталаар болза, Мен база өскээр бодай берип, ол чонга таварыштырар дээн айыыл-халавым ытпас мен ^e. 9Мен кажан-даа чон азы күрүне дугайында „Ону быжыглаар, тарып олуртур мен“деп шиитпир хүлээп ап боор мен. 10А бир эвес ол чон Мээң мурнумга бузут үүлгедип, Мээң сөзүмнү тооп дыңнавас болза, Мен база өскээр боданып, аңаа көргүзер дээн ачы-буянымны ытпас мен ^f.

11Ынчангаш ам Иудеяның чонунга, Иерусалимниң чурттакчыларынга мону чугаала. Дээрги-Чаяакчы: „Мен силерге айыыл-халап белеткеп тур мен, силерге удур сагыштыг мен! Кайыңар-даа бузуттуг оруктан чайлай берзин ^g. Оруктарыңарны, ажыл-херектериңерни экижидип алыңар ^h“– деп чугаалады дээр сен. 12Ынчалза-даа олар: „Хей чүве! Күзээн чүвевис кылыр бис, кижи бүрүзү бодунуң бузуттуг чүрээниң чөрүү чоруунуң аайы-биле кылыр“– деп харыылаар» ⁱ.

13Ынчангаш Дээрги-Чаяакчы:

«Чоннардан айтырып көрүңер, кым ындыг чүве дыңнааныл?
Израиль-кыс кончуг багай чүве үүлгетти!
14Ливан дагларында хар хаяларлыг ийлерден кажан-даа эрип чидер эвес.
Өске черден аккан соок дамырак суглар кажан-даа соглуп төнер эвес.
15А Мээң чонум Мени уткан-дыр ^j,
чөгенчиг дүрзү-бурганнарга айдызаашкын кылып турар-дыр!
Дүрзү-бурганнар чонну оруундан астырарга,
ол эрте-бурунгу оруктан өскээр баргаш ^k,
ам кокпа орук-биле, оңгул-чиңгил орук-биле бар чыдар-дыр.
16Бо чон бодунуң черин хоозураашкынга,
мөңге кочулалга чыгаткан-дыр ^l.
Ооң чаны-биле эрткен кижи бүрүзү элдепсинип, бажын чаяр ^m.
17Мен, күштүг хат дег ⁿ,
оларны дайзыннарының мурнунга тоо быдарадып каар мен,
айыыл-халавының хүнү кээрге,
оларга арным көргүспейн, хая көрнү бээр мен» – деп чугаалаан.

Иеремияга удур сүлчээ

18Ынчалза-даа улус-чон: «Барып, Иеремияга удур сүлчээ кылыылы. Дүрүм-хоойлу – Бурганның бараалгакчыларынга, арга-сүме – мерген угаанныгларга, Бурганның сөзү – Ооң медээчилеринге артып каар-ла болгай! Барып, ону нүгүлдээли, ооң чугаа-сөзүн дыңнаваалы» – деп турган ^o.

19Дээрги-Чаяакчы, менче кулааң ээктирем,
мээң дайзыннарымның чугаа-сөзүн база дыңнап көрем!
20Таанда-ла буян дээш бузут-биле харыылаар ужурлуг бе? ^p
Мени өлзүн дээш, оңгар казып кагдылар ^q.
Сактып келем: мен Сээң өргээңге оларга ачылыг болзун дээш мөргүп,
Сээң килеңиңни олардан чайладырын кызып турдум.

21Ынчангаш оларның ажы-төлүн аш-чутка чыгадып көрем,
оларны хылышка шаштырып калам!
Оларның кадайлары дулгуяк бооп артсын ^r,
ажы-төлүн чидирзин, ашактары өлүп калзын,
аныяк оолдары дайынга хылыш-биле өлүртсүн!
22Кажан оларже үптекчилерни хенертен эккээриңге,
оларның бажыңнарындан уё-човуур дыңналзын,
чүге дээрге олар мени тудуп аар дээш оңгар казып,
мээң буттарымга дузак салып каан-дыр ^s.
23А Сен, Дээрги-Чаяакчы, оларның меңээ удур кара сагыштыын,
мени өлүрер деп турарын билир сен ^t.
Оларның кемниг херектерин өршээвейн көрем,
оларның бачыттарын эскербээн бооп эрттирбейн көрем! ^u
Олар Сээң мурнуңга кээп ушсун –
Бодуңнуң килеңнээн үеңде оларны ынчаар аажылап көрем!