Jer 22 | TyvTUV | STEP | Дээрги-Чаяакчы меңээ мынча дээн: «Иудеяның хаанының ордузунче баргаш, аңаа Мээң сөзүмнү медегле.

‏ Jeremiah 22

1 Дээрги-Чаяакчы меңээ мынча дээн: «Иудеяның хаанының ордузунче баргаш, аңаа Мээң сөзүмнү медегле. 2 Мону чугаалаар сен: Давидтиң дүжүлгезинде саадаан Иудеяның хааны, Дээрги-Чаяакчының сөзүн дыңна – сен-даа, дүжүметтериң-даа, сээң чонуң-даа, бо хаалга дамчыштыр кирип турар бүгү улус база – дыңнаңар! 3 Дээрги-Чаяакчы мынча дээн: „Шынныг шииткел, чөптүг чорук кылыңар, базындырган кижини базынганның холундан адырыңар, даштыкы кижини, өскүс кижини, дулгуяк херээженни хомудатпаңар, оларны кызып-кыйбаңар, шак бо черге кем-буруу чок кижи ханы төкпеңер ^a. 4 Бир эвес ол айтыышкынны күүседир болзуңарза, Давидтиң дүжүлгезинде саадаан хааннар чуузаларга олургаш-даа, аът мунгаш-даа – боттары, дүжүметтери, албаты чону – бо ордунуң хаалгаларын дамчыштыр кирер ^b. 5 А бир эвес ол сөстерни тооп дыңнавас болзуңарза, бо орду бузундулар оваазы апаар ^c“. Ону Бодум-биле даңгыраглап тур мен! ^d» Дээрги-Чаяакчының медеглээн сөзү ол-дур.

6 Дээрги-Чаяакчы Иудеяның хаанының ордузунуң дугайында:

«Сен Меңээ Галаад дег,
Ливан сынның баштары дег өндүр-чаагай сен.
Ынчалза-даа Мен сени ээнзиргей чер,
чурттакчы чок хоорай кылып каар мен!
7 Мен сеңээ удур узуткакчыларны томуйлап каар мен,
кайызынга-даа чепсек берип каар мен.
Сээң эки дээн пөштериңни олар кезип каапкаш ^e,
отче октаптар – деп чугаалаан. –

8 Хөй чоннарның улузу бо хоорайның чаны-биле эртер, олар бот-боттарындан: „Дээрги-Чаяакчы чүү дээш бо өндүр улуг хоорайны ынчаар аажылааныл?“– деп айтыржыр ^f. 9 „Чүге дээрге олар боттарының Бурганы, Дээрги-Чаяакчының чагыг-керээзинден ойталааш, өске бурганнарга мөгейип, оларга бараан бооп турган-дыр ^g“– деп харыы кээр».

10 Өлген хаан дээш ыглашпаңар, ол дээш качыгдаваңар! ^h Харын туттуруушкунда барган хаанның ажыын ажып ыглажыңар, чүге дээрге ол ам черле ээп келбес, төрээн чуртун көрбес. 11 Чүге дээрге Дээрги-Чаяакчы Иосияның оглу, Иудеяның хааны, бо черден туттуруушкунда барган Шаллум ^{▼▼ 4 Хаан. 23:30-35 болгаш 2 Чыл. 36:1-4-те Иоахаз деп аттыг хаан ол бооп чадапчок (1 Чыл. 3:15 көр).} дугайында: «Бодунуң ачазы Иосияның соонда хааннап эгелээн Шаллум ам черле бээр келбес-тир! 12 Ону тудуп аппарган черге ол өлүп каар ^j, бо черни моон соңгаар көрбес – деп чугаалаан. –

13 Бодунуң ордузун чөптүг-шынныг эвес,
үстүкү өрээлдерин – хоойлу-дүрүм чок тудуп турар,
өске кижини албадал-биле халаска ажылдадыр,
күш-ажыл дээш төлевир бербес хаан ат болур! ^k
14 Ол „Бодумга улуг орду,
делгем үстүкү өрээлдер тудуп алыйн“деп чугаалаан.
Ол бодунга улуг соңгалар оюп кылып,
пөш-биле каастай шап, кызыл будук-биле будуп турар.
15 Таанда-ла сээң хаан чагыргаңның ужур-утказы
пөштен хөй тудуглар тударында бе?
Сээң ачаң дойлап-даа тургаш,
шын шииткел биле чөптүг чорукту көргүзүп чорду ^l.
Ынчангаш чедимчелиг бооп келди ^m.
16 Ядыы-түреңги улустуң херээн ол шын шиитпирлеп турду ⁿ,
ынчангаш чедимчелиг бооп келди.
Мени билип аары ындыг боор эвес чүве бе? – деп, Дээрги-Чаяакчы медеглээн. –
17 А сен карааңны-даа, чүрээңни-даа
чүгле ажык-кончаа дилээринче, буруу чок улустуң ханын төгеринче,
улусту бастып, кызып-кыярынче углап келдиң».

18 Ынчангаш Дээрги-Чаяакчы Иосияның оглу, Иудеяның хааны Иоаким ^o дугайында мынча дээн:

«Улус ооң ажыын ажып, акы-угбаларынга „Аа халак!“дивес,
„Дээргивис, хайыраатывыс чок апарган-дыр!“деп ажыын ажып ыглашпас.
19 Ону элчиген ажааган ышкаш кылдыр ажаап каар,
сөөртүп аппаргаш, Иерусалимниң даштынче үндүр октаптар ^p.

20 Сион-кыс, барып, Ливан сынга ыглап-сыкта,
Васан дагга алгыр, Аварим сынга ^q ишкирнигип ыгла,
чүге дээрге сээң хандыкшааннарың ^{▼▼ Хандыкшааннар – Иудеяның эвилелчилери (Иер. 2:33; 30:14 көр).} шупту чылча шаптырган-дыр.
21 Амыр-чаагай чурттап чоруңда,
Мен сээң-биле чугаалажып, сагындырып турдум,
а сен „Дыңнавас мен!“дээн сен.
Аныяаңдан-на ындыг чордуң, Мени тооп дыңнавайн келдиң!
22 Сээң бүгү чагырыкчыларыңны хат хадып алгаш баар,
хандыкшааннарың* туттуруушкунга баар.
Ынчан бүгү бузуттуг үүлгедиглериң дээш адың баксыраар,
куду көрдүрер сен.
23 Пөштерде уя тудуп алган, Ливанда чурттап турар улус! ^{▼▼ Ливанның пөжүнден кылган бай ордуларда чурттап турар улусту элдээрткен бооп чадавас.}
Эъди аараан херээженни аарышкы дег,
силерни хилинчек бүргей аптарга, човууртаар силер!» ^t

24 «Дириг Бодумнуң адым-биле даңгыраглап тур мен! ^u – деп, Дээрги-Чаяакчы медеглээн. – Иоакимниң оглу, Иудеяның хааны Иехония, сен Мээң холумда үнелиг билзээм-даа турган болзуңза ^v, Мен сени уштуп октаптар мен! ^w 25 Мен сени сээң амы-тының үзүксээн, коргуп-сүртээр улузуңнуң – Вавилоннуң хааны Навуходоносор болгаш халдей чоннуң холунга хүлээдип бээр мен. 26 Мен сени төрээн иең-биле кады хары чуртче үндүр сывырыптар мен ^x – ол черге төрүттүнмээн силер, ынчалза-даа аңаа өлүр силер! 27 А аажок ээп келиксээриңер бо черже ам кажан-даа ээп келбес силер».

28 Таанда-ла ол кижи, Иехония,
ажыы чок бузук дой доңга бе, херээ чок сава бе? ^y
Чүге ону ажы-төлү-биле кады оларның билбези чуртче сүрүп аппарганыл?

29 О чер, чер, чер! ^z Дээрги-Чаяакчының сөстерин дыңна! 30 Дээрги-Чаяакчы мынча дээн:

«Ол кижини ажы-төл чок кижи дег кылдыр бүрүткеп калыңар,
ол кижи бүгү назынында эки чол көрбес.
Ооң салгакчыларындан кым-даа чаагай чолдуг болуп,
Иудеяны чагырбас, Давидтиң дүжүлгезинге саадавас ^aa».