‏ Jeremiah 23

Давидтен укталган чөптүг-шынныг хаан

1Дээрги-Чаяакчы: «Мээң коданымда хойларны чок кылып, тарадыр сывырып турар кадарчылар ат болур!» – деп медеглээн a. 2Мээң чонумну кадарып турар чагырыкчыларга Дээрги-Чаяакчы, Израильдиң Бурганы: «Мээң хойларымны тоо быдарадыр сывырыпкан, оларже сагыш салбаан силер. Мен ам бузуттуг үүлгедиглериңер дээш силерни кезедир мен – деп медеглээн. – 3Хойларымның артынчызын үндүр сывырыпкан бүгү чурттарымдан чыып алгаш, төрээн аал-оранынче дедир чандырар мен b. Олар ынчан өзүп-көвүдээр. 4Чагырыкчылар кылдыр Мээң томуйлап каар улузум оларны кадарар c. Хойларым оон ыңай коргуп-сүрээдевес, чиде бербес». Дээрги-Чаяакчының медеглээн чүвези ол-дур.

5«Үези кээрге, Давидтиң салгакчызын, чөптүг-шынныг Өзүмнү өрү көдүрер мен d – деп, Дээрги-Чаяакчы медеглээн. – Ол хаан чагырып эгелээш, мерген угаанныын көргүзүп, чер кырынга шын шииткел биле чөптүг чорукту доктаадыр. 6Ооң чагырар үези кээрге, Иудея камгалал алыр, Израиль айыыл чок чурттаар e. Ол хаанга „Яхве-Седкену
Яхве-Седкену – «Дээрги-Чаяакчы биске чөптүг-шынныг чорукту көргүзер» дээн уткалыг ат.
“деп ат тыпсыр g.

7Улус: „Израиль чонну Египеттен үндүре берген дириг Дээрги-Чаяакчының ады-биле!“– деп даңгыраглавас апаар хүннер кээр – деп, Дээрги-Чаяакчы медеглээн. – 8Харын улус: „Израиль чонну соңгу чүкте черден үндүре берген дириг Дээрги-Чаяакчының ады-биле! h“– деп бир өскээр чугаалааш, Мээң оларны үндүр сывырыпканым бүгү чурттардан дедир чанып келгеш, боттарының черинге чурттаар».

Меге медээчилер дугайында

9Бурганның медээчилериниң дугайында.

Чүрээм чарылгыже саргып, соп тур,
бүгү сөөктерим мунчурады.
Дээрги-Чаяакчының ыдыктыг сөстериниң ужун
Ооң мурнунга эзирик кижи дег,
арагага алыскан кижи дег апардым.
10Чер кырын самыыраан улус долган,
каргаттыргаш, чер ыглап турар –
ховуда оът-сиген кадып калган.
Ол улустуң сорулгазы – бузут,
оларның күжү – чөптүг эвес чорук.

11«Бурганның медээчизи-даа, бараалгакчызы-даа бужартаан-дыр.
Оларның бузуттуг үүлгедиглерин
Мээң өргээмде безин көрүп тур мен! i – деп, Дээрги-Чаяакчы медеглээн. –
12Ол дээш, оларның оруу тайгыр апаар,
караңгыже шымны бээр j.
Оларны идерге, кээп дүжерлер.
Чүге дээрге кеземче үезинде
оларже айыыл-халап ыдар мен! – деп, Дээрги-Чаяакчы медеглээн. –

13Самарияда медээчилеримниң шуут бодал чогун көрген мен;
олар Ваал бурганның өмүнээзинден медеглеп турду k,
Мээң израиль чонумну оруундан астыктырып кагды.
14Мээң Иерусалимде медээчилерим
коргунчуг чүүл үүлгедип турарын база көрүп тур мен;
олар самыыраан, мегеге башкартып чурттап чоруур l,
бузуттуг хейлерниң холун быжыктырып, деткиир улус-тур m,
ооң түңнелинде бузуттуг хейлер бак херектерин кагбас-тыр.
Мээң мурнумга олар шупту Содом дег,
Иерусалимниң чурттакчылары – Гоморра дег! n»

15Ынчангаш Аг-шериглиг Дээрги-Чаяакчы ол медээчилер дугайында:
«Оларны ажыг чашпан-биле чемгерер мен,
оларга хоранныг суг ижиртир мен o,
чүге дээрге Иерусалимде Мээң медээчилерим дээш
бүгү чер бужартаан-дыр!» – деп чугаалаан.

16Аг-шериглиг Дээрги-Чаяакчы мынча дээн:
«Ол медээчилерниң сөстерин, силерге медеглээн чүвезин дыңнаваңар!
Олар хоозун сөстер медеглеп,
Дээрги-Чаяакчының сөстерин эвес,
а боттарының сеткилиниң күзелдерин чугаалап турар p.
17Олар Мени бак көөр улуска:
„Силерге амыр-тайбың турарын Дээрги-Чаяакчы чугаалаан!“– деп
катаптап чугаалаар-дыр.
Чөрүү чүрээниң аайы-биле кылып турар бүгү улуска олар:
„Айыылга таварышпас силер!“– дээр-дир q».

18Ындыг-даа болза, Дээрги-Чаяакчының чөвүлелинге турган,
Ооң сөзүн дыңнаан, билип алган кижи бар бе? r
Ооң сөзүнче кулаан ээктирип, дыңнаан кижи кымыл?
19Дээрги-Чаяакчының шуурганы килеңнии-биле көдүрүлдү!
Коргунчуг казыргы хөме алгаш, бузуттугларның бажын алыр s.
20Дээрги-Чаяакчы Бодунуң чүрээнде бодалдарын күүседип,
боттандырбаан шаанда, Ооң килеңи оожургавас.
Келир үеде силер ону кончуг тода билип аар силер t.

21«Мен ол медээчилерни айбылап чорутпаан мен,
олар боттары маңнажып келди.
Мен оларга чүве чугаалаваан мен,
харын олар Мээң адым тудуп медеглеп тур! u
22Бир эвес олар Мээң чөвүлелимге турган болза,
чонумга Мээң сөстеримни медээлеп,
ону бузуттуг оруктан база бак үүлгедигден чайладыр ийик.
23Мен чүгле чоок тургаш, Бурган боор мен бе? – деп, Дээрги-Чаяакчы айтырган. –
Ырак тургаш, Бурган эвес мен бе? v
24Кандыг-бир кижи Менден чажыт черже чаштына берип шыдаар бе?
Мен ону көрбейн баар мен бе? – деп, Дээрги-Чаяакчы айтырган. –
Дээр биле черни Мен бүргей ап турар эвес мен бе? w»
Дээрги-Чаяакчының медеглээн чүвези ол-дур.

25«Мээң адым тудуп, мегелеп өттүр билип медеглеп турар медээчилер чүү деп турарын дыңнаан мен. Олар: „Мен дүш көрдүм, дүш көрдүм!“– дээр-дир x. 26Кажанга чедир ынчап кээр улузул? Ол медээчилер мегелеп өттүр билип медеглээр деп, бодунуң сагыжының даап бодаан чүвезин медеглээр деп бодап алган бе? 27Мээң чонумнуң ада-өгбези Ваал бурганга мөгеер дээш, Мээң адымны утканы дег y, ол медээчилер бот-боттарынга чугаалап турар дүштериниң дузазы-биле чонну Мээң адымны уттур кылдыр албадаар бис деп бодаар. 28Дүш көрген медээчи оозун бодунуң дүжү кылдыр чугаалазын, а Мээң сөзүмнү ажыдып чугаалааным медээчи ол сөстү чонга шынныы-биле медеглезин! Тарааның үрезини биле саваңының аразында дөмей чүү барыл? – деп, Дээрги-Чаяакчы айтырган. – 29Мээң сөзүм от ышкаш – деп, Дээрги-Чаяакчы медеглээн, – Мээң сөзүм хая-даш чуура шапкан маска ышкаш!

30Мен ол медээчилерге удур мен! z – деп, Дээрги-Чаяакчы медеглээн. – Олар Мээң сөстеримни бот-боттарындан оорлап турар. 31Мен ол медээчилерге удур мен! – деп, Дээрги-Чаяакчы медеглээн. – Олар хей чүве чулчургаш: „Бурганның медеглээн чүвези-дир“– деп турар. 32Меге дүштерин чугаалаан медээчилерге удур мен! – деп, Дээрги-Чаяакчы медеглээн. – Олар дүштерин чугаалап, боттарының бардамы-биле, мегези-биле Мээң чонумну будулдуруп турар aa. Мен оларны айбылап чорутпаан мен, оларга айтыышкын бербээн мен. Олар бо чонга кандыг-даа ажык-дуза чедирбес». Дээрги-Чаяакчының медеглээн чүвези ол-дур.

Дээрги-Чаяакчының сөзү үүрге-чүък бе?

33«Иеремия, кажан азы Иудеяның чону, азы Бурганның медээчизи, азы бараалгакчызы сенден: „Дээрги-Чаяакчы кандыг үүрге-чүък
Үүрге-чүък – бо еврей сөс «үүрге-чүък» азы «өттүр билген медеглел» деп уткаларны илередир. Бо үзүндүде ол ийи утка-биле сөс оюну чоруп турар. Ол сөстү Иеремияның удурланыкчылары, ону кочулаар дээш, ажыглап турган чадавас.
чүдүрдү?“– деп айтырар болза, „Дээрги-Чаяакчы: ‘Силер боттарыңар үүрге-чүък боор силер, а Мен силерни дүжүр октаптар мен’ – деп медеглээн“– деп харыылаар сен.
34Бир эвес моон соңгаар азы медээчи, азы бараалгакчы, азы улус-чондан бир кижи „Дээрги-Чаяакчының чүдүрген үүрге-чүъгү“деп сөстер чугаалаар болза, Мен ол кижини, ооң өг-бүлезин кезедир мен».

35Бот-боттарыңардан, ха-дуңмаңардан: «Дээрги-Чаяакчы чүү деп харыылады?» – деп азы «Дээрги-Чаяакчы чүү диди?» – деп айтырар ужурлуг силер. 36«Дээрги-Чаяакчының чүдүрген үүрге-чүъгү» деп сөстерни моон соңгаар сагынмаңар, чүге дээрге кижи бүрүзүнүң сөстери ооң бодунга үүрге-чүък апаар болгай, а Аг-шериглиг Дээрги-Чаяакчы, Дириг Бурганывыстың сөстерин хажыткан-дыр силер. 37Медээчиден: «Дээрги-Чаяакчы чүү деп харыылады?» – деп азы «Дээрги-Чаяакчы чүү диди?» – деп айтырар ужурлуг силер. 38Бир эвес силер «Дээрги-Чаяакчының чүдүрген үүрге-чүъгү» деп сөстер чугаалаарын соксатпас болзуңарза, Дээрги-Чаяакчының чүнү чугаалаанын дыңнаңар: «Мен силерге „Дээрги-Чаяакчының чүдүрген үүрге-чүъгү“деп сөстерни чугаалап болбазын сагындырып турумда-ла, чугаалааныңар дээш, 39Мен силерни база силерге, ада-өгбеңерге бергеним бо хоорайны уттуптар
Азы: «Бо хоорайны үүрге-чүък дег көдүрер».
мен, Бодумдан ырадыр дүжүр октаптар мен!
40Мен силерни кезээ мөңгеде кажан-даа уттундурбас бак атка киирер мен ad, куду көрүүшкүнге чыгаар мен».
Copyright information for TyvTUV