Jer 25 | TyvTUV | STEP | Иосияның оглу, Иудеяның хааны Иоакимниң чагыргазының дөрткү чылында Дээрги-Чаяакчының Иеремияга Иудеяның бүгү чонунга хамаарыштыр ажыдып чугаалаан сөзү бо-дур. Ол чыл болза Вавилоннуң хааны Навуходоносорнуң чагыргазының бирги чылы чүве-дир .

‏ Jeremiah 25

Вавилоннуң Иудеяны чагырар чеден чылы

1 Иосияның оглу, Иудеяның хааны Иоакимниң чагыргазының дөрткү чылында Дээрги-Чаяакчының Иеремияга Иудеяның бүгү чонунга хамаарыштыр ажыдып чугаалаан сөзү бо-дур. Ол чыл болза Вавилоннуң хааны Навуходоносорнуң чагыргазының бирги чылы чүве-дир ^a. 2 Иеремия медээчиниң Иудеяның бүгү чонунга, Иерусалимниң бүгү чурттакчыларынга медеглээн чүүлү бо-дур: 3 «Дээрги-Чаяакчы меңээ Бодунуң сөзүн чээрби үш чыл дургузунда – Амоннуң оглу, Иудеяның хааны Иосияның чагыргазының он үшкү чылындан эгелээш ^b, амдыгаа чедир – ажыдып келди. Мен силерге катап-катап дамчыдып-ла турдум, а силер тооп дыңнавадыңар ^c. 4 Дээрги-Чаяакчы силерже Бодунуң чалча-медээчилерин катап-катап айбылап чорудуп-ла турду, а силер тооп дыңнавадыңар, оларның чугаазынче кулааңар ээктирбедиңер ^d. 5 Ол силерге: „Кайыңар-даа бодунуң бузуттуг оруундан, бачыттыг үүлгедиглеринден ойталазын, ынчан Дээрги-Чаяакчының силерге база ада-өгбеңерге шаг шаанда берген черинге кезээ мөңгеде чурттаар силер ^e. 6 Өске бурганнар эдербеңер, оларга бараан болуп, мөгейбеңер, холуңарның ажыл-херээ-биле Мени килеңнетпеңер ^f, ынчан Мен силерже айыыл-халап ытпас мен“– деп чугаалаан турган болгай».

7 «Ынчалза-даа силер Мени тооп дыңнавадыңар! – деп, Дээрги-Чаяакчы медеглээн. – Бодуңарга хора чедирип, холуңарның кылган ажыл-херээ-биле Мени килеңнеттиңер». 8 Ынчангаш Аг-шериглиг Дээрги-Чаяакчы мынча дээн: «Мээң сөстеримни тооп дыңнавааныңар дээш, 9 Мен соңгу күрүнелерниң бүгү аймактарын кыйгыртып, чыыр мен ^g – деп, Дээрги-Чаяакчы медеглээн, – Мээң чалчам ^h, Вавилоннуң хааны Навуходоносорну кыйгырткаш, ону бо черге, ооң чурттакчыларынга, бүгү кожа чоннарга удур чаалаштырар мен. Ол чоннарны бүрүнү-биле узуткаар мен, оларны хоозураашкын биле кочулалга, мөңге буураашкынга чыгаар мен ⁱ. 10 Мен оларның аразынга өөрүшкү биле хөглээшкин үнү, күдээ оол биле келин кыстың үнү, дээрбе даштарының даажы дыңналбас кылып каар мен ^j база чырыткының одун өжүрер мен. 11 Бүгү бо чер ээнзиреп хоозураар, бо чоннар чеден чыл дургузунда ^k Вавилоннуң хаанынга кулдандырар.

12 Чеден чыл эртерге, Вавилоннуң хаанын, ооң чонун кем-буруузу дээш кезедир мен – деп, Дээрги-Чаяакчы медеглээн. – Халдей черни кезээ мөңгеде хоозурадыр мен. 13 Мен ол чер-биле Мээң аңаа удур чугаалаан бүгү чүвемни, бо номда бижиттинген чүвени, Иеремияның бүгү чоннар дугайында өттүр билип медеглээн чүвезин боттандырар мен ^l. 14 Халдей чон боду хөй чоннарның кулу апаар, өндүр улуг хааннар ону чагырып аар ^m – Мен ону үүлгеткен херектери дээш кезедир мен».

Килеңниң дашказын делегейниң чоннарынче чажар

15 Дээрги-Чаяакчы, Израильдиң Бурганы меңээ: «Мээң холумдан килеңимниң арагазын куткан бо дашканы алгаш, сени айбылап чорудуп турарым бүгү чоннарга ижиртип каг ⁿ. 16 Олар ижипкеш, тендирип, Мээң оларже ыдып турарым хылышты көрүп кааш ^o, кортканындан угаанын ышкыныптар» – деп чугаалаан. 17 Мен Дээрги-Чаяакчының холунда дашканы алгаш, Ооң мени айбылап чоруткан бүгү чоннарынга араганы ижиртип кагдым ^p:

18 Иерусалимге, Иудеяның хоорайларынга, ооң хааннары биле нояннарынга – оларны хоозурадыр дээш, оларны ам хөме тавараан кочулал, куду көрүүшкүн болгаш каргаттырыышкынче чыгаар дээш – ижиртип кагдым;
19 Египеттиң хааны фараонга, ооң дүжүметтери биле нояннарынга, ооң бүгү албаты чонунга ^q, 20 египетчилер аразында өске аймак-сөөктүг бүгү улуска;
Уц деп черниң ^r бүгү хааннарынга;
филистим черниң бүгү хааннарынга – Аскалон, Газа, Экрон хоорайларның болгаш Азот хоорайның артынчызының хааннарынга ^s;
21 эдом, моав болгаш аммон чоннарга ^t;
22 Тир, Сидон хоорайларның хааннарынга ^u;
далай ындында чурттарның хааннарынга;
23 Дедан, Фема, Буз чурттакчыларынга ^v, кастыында дүгүн чүлүүр бүгү улуска ^{▼▼ Кастыында дүгүн чүлүүр бүгү улус – Аравия ээн кургаг ховуга чурттап чораан чамдык аймактарны ынча деп адаар турган.};
24 Аравияның бүгү хааннарынга, ээн кургаг ховуда чурттаан янзы-бүрү аймак-чоннарны чагырган бүгү хааннарга;
25 Зимриниң бүгү хааннарынга, Эламның бүгү хааннарынга ^x, Мидияның бүгү хааннарынга;
26 соңгу күрүнелерниң бүгү хааннарынга, чоокта-даа, ыракта-даа турарларынга, удаа-дараалаштыр ижиртип кагдым – чер-делегей кырында бар бүгү күрүнелерге ижиртип кагдым. А Сесахтың ^{▼▼ Сесах – Вавилоннуң оюскан ады (Иер. 51:41 көр).} хааны эң сөөлүнде ижер.

27 «Ол улус-чоннарга мону чугаала. Аг-шериглиг Дээрги-Чаяакчы, Израильдиң Бурганы мынча дээн: „Ижиңер, эзириңер, кузуңар! Кээп дүшкеш, Мээң силерже ыдарым хылышты көрүп кааш ^z, турбас силер“. 28 Кажан олар сээң холуң сунган дашканы хүлээп аарындан ойталап, ижиксевес болза, оларга мону чугаала. Аг-шериглиг Дээрги-Чаяакчы мынча дээн: „Албан ижер ужурлуг силер! ^aa 29 Мээң адым-биле адаан бо хоорайже-даа Мен айыыл-халап ыдып турумда, силер канчап кеземчеден чайлаар силер? ^ab Чок, чайлап шыдавас силер, чүге дээрге Мен чер-делегейниң бүгү чурттакчыларынга удур дайылдажыр кылдыр хылышты кыйгырып тур мен ^ac“». Аг-шериглиг Дээрги-Чаяакчының медеглээн чүвези ол-дур.

30 «Оларга бүгү бо сөстерни чарлап, мону чугаала.

Дээрги-Чаяакчы өрүтен диңмиреп кээр,
Бодунуң ыдыктыг оран-савазындан дыңзыг үн-биле алгырар ^ad,
Бодунуң чер-чуртунче хөректенир,
виноград чулуу сы бастырган кижиниң дааш-шимээн үндүрери дег,
черниң бүгү чурттакчыларынче кышкырар!
31 Диңмирээшкин чер-делегейниң кыдыынга чедир дагжаар,
чүге дээрге Дээрги-Чаяакчы чоннар-биле маргыжар,
Ол бүгү улус-биле чаргылдажыр,
кем-буруулугларны хылыш-биле шаштыртып каар».
Дээрги-Чаяакчының медеглээн чүвези ол-дур.

32 Аг-шериглиг Дээрги-Чаяакчы мынча дээн:
«Айыыл-халап бир чондан өске чонче сүрүштүр кел чыдыр,
чер-делегейниң кыдыындан кончуг улуг шуурган көдүрлүр! ^ae
33 Ол хүн Дээрги-Чаяакчыга өлүрткен улус
чер-делегейниң бир кыдыындан өске кыдыынга чедир чыткылаар ^af.
Улус оларның ажыын ажып ыглашпас,
мөчү-сөөгүн чыып, ажаавас, олар чер кырынга өдек дег чыдып каар ^ag.
34 Чагырыкчылар, ыглап-сыктаңар, човууртаңар,
сүрүг баштыңнары, качыгдалдан довуракка боражыңар ^ah,
чүге дээрге силерни дөгерер дээш аппаар үе келген-дир.
Силерни, үнелиг сава дег, буза шавар, тоо быдарадыр.
35 Чагырыкчылар хоргадаар чер тыппас,
сүрүг баштыңнарынга камгалал турбас.
36 Чагырыкчыларның ыы-сыызы,
сүрүг баштыңнарының ишкиртинип ыглааны дыңналып тур.
Дээрги-Чаяакчы оларның одар-белчиирин хоозураткан-дыр.
37 Дээрги-Чаяакчы күштүү-биле килеңнээрге,
тайбың одарлар узуткаттынып тур.
38 Дээрги-Чаяакчы бодунуң чыдынындан үнүп келген арзылаң ышкаш!
Улус-чоннарның чери Ооң кадыг-дошкун, кыптыккан килеңинден хоозурап калган».