Jer 29 | TyvTUV | STEP | Иеремия медээчиниң арткан баштыңнарже , Бурганның бараалгакчылары биле медээчилеринче болгаш Навуходоносорнуң Иерусалимден Вавилонче сүрүп аппарган бүгү чонунче Иерусалимден чоруткан чагаазы бо-дур.

‏ Jeremiah 29

Вавилонче тудуп аппарган еврейлерге чагаа

1 Иеремия медээчиниң арткан баштыңнарже ^a, Бурганның бараалгакчылары биле медээчилеринче болгаш Навуходоносорнуң Иерусалимден Вавилонче сүрүп аппарган бүгү чонунче Иерусалимден чоруткан чагаазы бо-дур. 2 Иехония хаанны, ооң авазын, Иудея болгаш Иерусалимниң дүжүметтери биле нояннарын, усчу, дарган улузун Иерусалимден тудуп аппарган соонда ^b, 3 Иеремия ол чагааны Шафанның оглу Элеаса биле Хелкияның оглу Гемарияны дамчыштыр чоруткан турган. Ол ийи кижини Иудеяның хааны Седекия Вавилонче – ооң хааны Навуходоносорже айбылап чоруткан чүве-дир. Ол чагаада мынча деп бижээн:

4 Аг-шериглиг Дээрги-Чаяакчы, Израильдиң Бурганы мынча дээн: «Иерусалимден Вавилонче үндүр сывырыпканым бүгү туттурган улус, дыңнаңар.
5 Бажыңнардан тудуп алгаш, ээлеп чурттаңар, сесерликтерден тарып алгаш, оларның чимизин чиңер. 6 Кадайдан ап алыңар, оол-кыстыг болуңар, оларны өглеп-баштаңар – олар база ажы-төлдүг болзун. Ол черге өзүп-көвүдеңер, эвээжевеңер! 7 Силерни ынаар үндүр сывырыпканым хоорайга амыр-тайбыңдан күзеңер. Ол хоорай дээш дилеп, Дээрги-Чаяакчыга мөргүңер ^c, бир эвес аңаа амыр-тайбың доктаар болза, силерге база амыр-тайбың доктаар».
8 Аг-шериглиг Дээрги-Чаяакчы, Израильдиң Бурганы: «Силерниң араңарда турар бүдүү билирлериңерге, төлгечилериңерге дуурайлатпаңар ^d, дүжүн чугаалаар дүшчүлерни дыңнаваңар! ^{▼▼ Азы: «Дүжеп турар дүштериңерже сагыш салбаңар!»} 9 Ол улус силерге Мээң адым тудуп мегелеп өттүр билип медеглээр-дир ^f, Мен оларны айбылап чорутпаан мен» – деп медеглээн.
10 Дээрги-Чаяакчы мынча дээн: «Вавилонга берип каан чеден чыл эрте бээрге ^g, Мен силерже сагыш салыр мен ^h, Мээң ачы-буянныг сөзүмнү силер-биле күүседип, силерни бо черже дедир чандырар мен. 11 Силерге
хамаарыштыр чүнү баш бурунгаар бодап алганымны Мен билир болгай мен – деп, Дээрги-Чаяакчы медеглээн. – Силерге келир үени, идегелди хайырлаар дээш, Мен айыыл-халап эвес, амыр-тайбыңны бээр деп бодалдыг мен. 12 Силер Мени кыйгырар силер, баргаш, Меңээ мөргүүрүңерге, Мен силерге харыылаар мен ⁱ. 13 Менче чүткүп, дилеп эгелээш, тып аар силер ^j. Бир эвес Менче бүгү чүлдү-чүрээңер-биле чүткүүр болзуңарза, 14 Мени тып аар силер ^k – деп, Дээрги-Чаяакчы медеглээн, – Мен силерге эки чолду эгидер мен ^{▼▼ Азы: «Туттуруп алган улусту хостап, дедир эккээр мен».}, силерни ынаар үндүр сывырыпканым бүгү чоннардан, бүгү черлерден чыып эккээр мен» ^m.
15 Силер: «Дээрги-Чаяакчы биске Бодунуң медээчилерин Вавилонга турувуста, база чорудуп берди» – деп турдуңар. 16 – 17 А Аг-шериглиг Дээрги-Чаяакчы Давид хаанның дүжүлгезинде саадаан хаан дугайында, Иерусалим хоорайда бүгү чурттакчы чон – силерниң-биле кады тудуп аппарбаан ха-дуңмаңар дугайында мынча дээн: «Мен оларже дайын-чаа, аш-чут болгаш хамчык аарыг ыдып тур мен! Мен оларны кижи чиир аргажок, ирик фига чимизи ышкаш аажылаар мен ⁿ. 18 Мен оларны дайын-чаа, аш-чут болгаш хамчык аарыг-биле истеп-сүрер мен ^o. Оларны чер-делегейниң бүгү күрүнелеринге коргунчуг үлегер-чижек кылып каар мен, үндүр сывырарым чер бүрүзүнге оларны каргыш, хоозурал, кочулал болгаш дорамчылалга таварыштырар мен ^p. 19 Чүге дээрге олар Мээң сөстеримни тооп дыңнавайн турган болгай – деп, Дээрги-Чаяакчы медеглээн. – Мен ол сөстеримни Бодумнуң чалча-медээчилеримни дамчыштыр оларже катап-катап чорудуп-ла турдум, а олар тооп дыңнавады ^q – деп, Дээрги-Чаяакчы медеглээн. –
20 А силер, Мээң Иерусалимден үндүр сывырып, Вавилонче чорудупканым улус, Дээрги-Чаяакчының сөзүн тооп дыңнаңар!»
21 Аг-шериглиг Дээрги-Чаяакчы, Израильдиң Бурганы силерге Ооң адын тудуп, меге чүве медеглеп турар медээчилер ^r – Колияның оглу Ахав биле Маасеяның оглу Седекия дугайында мынчаар чугаалаан: «Мен оларны Вавилоннуң хааны Навуходоносорга хүлээдип бээримге, силер көрүп туруңарда, хаан оларны өлүрүп каар! 22 Оларны сактып, Вавилонче көжүрткен иудейлер аразынга: „Седекия болгаш Ахав-биле болган чүвени Дээрги-Чаяакчы сээң-биле база кылзын!“– деп каргыш тыптыр ^s. (Вавилоннуң хааны оларны отка хаарган.) 23 Чүге дээрге олар Израильге чүдек-бужар чүве үүлгедип: өске улустуң кадайлары-биле самыырап база оларга чугаалаарын дужаавааным меге чүвени Мээң адым тудуп чугаалап турганнар ^t. Мен ону билир мен, аңаа херечи мен». Дээрги-Чаяакчының медеглээн чүвези ол-дур.

Шемайяга Дээрги-Чаяакчының медеглели

24 – 25 «Иеремия, Нехелам чурттуг Шемайя деп кижиге Аг-шериглиг Дээрги-Чаяакчы, Израильдиң Бурганының дараазында сөстерин дамчыт: „Иерусалимниң бүгү чурттакчы чонунга, Маасеяның оглу, Бурганның бараалгакчызы Софонияга ^u болгаш бүгү бараалгакчыларга бодуң өмүнээңден чагаа бижээн кижи сен болгай сен“».

Ол чагаада мынча деп бижээн турган:

26 Дээрги-Чаяакчы Софония сени Бурганның бараалгакчызы Иодайның орнунга бараалгакчы кылып каан болгай; Дээрги-Чаяакчының
өргээзинге угаанын ышкынгаш ^v, өттүр билип медеглеп эгелээр улусту хайгаараар база оларның буттарын доорбаш ыяшка демирлээр, мойнунга дөңгү кедирер ужурлуг турган сен ^w. 27 А силерниң черде өттүр билип медеглеп турар Анатот чурттуг Иеремияны чүге доктаатпас сен? 28 Ол Иеремия Вавилонда бисче: «Шөлүлгеңер үр хуусаалыг боор. Бодуңарга бажыңнардан тудуп алгаш, оларны ээлеп чурттаңар, сесерликтерден тарып алгаш, оларның чимизин чиңер» – деп бижээн чагаа чорутту.

29 Бурганның бараалгакчызы Софония ол чагааны Иеремия медээчиге номчуп берген. 30 Дээрги-Чаяакчы Иеремияга Бодунуң сөзүн ажыдыпкан: 31 «Өскээр көжүрткен бүгү улусче медээден чорудувут. Дээрги-Чаяакчы Нехелам чурттуг Шемайя дугайында: „Шемайяны Мен айбылап чорутпаан мен, ындыг-даа болза, ол силерге өттүр билип медеглеп, меге идегел берген-дир!“– деп чугаалаан ^x. 32 Ынчангаш Дээрги-Чаяакчы мынча дээн: „Мен Нехелам чурттуг Шемайяны, ооң үре-салгалын кезедир мен! Ооң үре-салгалындан кым-даа бо чоннуң аразынга чурттавас, Бодумнуң чонумга Мээң хайырлаар ачы-буянымны көрбес, чүге дээрге Шемайя бодунуң чугаазы-биле Дээрги-Чаяакчыга удур үймээн үндүрген-дир“». Дээрги-Чаяакчының медеглээн чүвези ол-дур.