Jeremiah 3
Өскерликчи Израиль биле Иудея Бурганче эглир ужурлуг
1«Ашаа кадайын чандырыптарга, кадайы оон чоруй баргаш, өске ашакка барып аар болза,баштайгы ашаа олче эглип кээп болур бе?
Ынчаар болза, ол чер бужартай бербес деп бе? a
А сен хөй таныштарың-биле самыырап турган хиреңде-ле,
Менче эглип кээр деп тур сен бе? ▼
▼ Азы: «Ындыг-даа болза, Менче эглип кел!»
– деп, Дээрги-Чаяакчы медеглээн. –2Тас тейлерже көрүжүң шигле,
ында сээң самыырап турбааның чер бар-дыр бе?
Ээн кургаг ховуда чорумалдар кеденген араб кижи дег c,
таныштарыңны орук кыдыынга манап турдуң d.
Бодуңнуң самыыраашкын болгаш бузудуң-биле черни бужартаттың.
3Ынчангаш чаъс чагбастаан,
Мен часкы чаъс-чайыкты кутпайн турдум e.
Сээң арын-шырайың самыын-садар херээженнии дег-дир,
ыядыр арның чок-тур!
4А ам сен Меңээ: „Аныяамдан тура эргим эжим! Ачам сен!
5Таанда-ла кезээ мөңгеде килеңнээр сен бе,
кезээде хорадаар сен бе?“– деп турар-дыр сен f.
Ынча дээр хиреңде-ле, бар шааң-биле бузут үүлгедир-дир сен».
6Дээрги-Чаяакчы меңээ Иосияның хааннаан үезинде g: «Өскерликчи херээжен дег Израильдиң чүнү үүлгедип турганын көрген-не болгай сен. Ол бедик даг бүрүзүнче барып, таварышкан-на хөлегелиг салбагар ыяш адаанче кирип, аңаа самыырап турду h. 7Бүгү үүлгедиглериниң соонда, ол Менче эглип кээр боор деп бодадым, ынчалза-даа ол эглип келбеди. Ооң сөс ээлевес кыс дуңмазы Иудея ону көрүп турду. 8Израильдиң Меңээ өскерлип турганы дээш, Мен аңаа чарлыышкын бижии бижээш, чандырыпкан мен i. Оон көөрүмге, ооң сөс ээлевес кыс дуңмазы Иудея кортпайн, боду база самыырап чорупту j. 9Ол бодунуң ыят чок самыыраашкыны-биле черни бужартадып, даш, ыяш дүрзүлер-биле Меңээ өскерлип турду k. 10Ынчап тургаш-ла, Израильдиң сөс ээлевес кыс дуңмазы Иудея l Менче шын сеткили-биле эвес, а кажарлап эглип келди» – деп чугаалаан. 11Дээрги-Чаяакчы меңээ: «Өскерликчи Израиль, сөс ээлевес Иудеяга көөрде, ооң буруузу эвээш-тир m. 12Баргаш, соңгу чүкке: „Эглип кел, өскерликчи Израиль!“– деп сөстерни чарлап чугаала» – дээн. Ол оон ыңай:«Мен сеңээ хорадап артпас мен,
энерелдиг болгаш, кезээ мөңгеде килеңневес мен n – деп медеглээн. –
13Чүгле бодуңнуң кем-бурууңну билин:
Дээрги-Чаяакчы Бурганыңга удур бачыт үүлгедип,
таварышкан-на хөлегелиг салбагар ыяш адаанга
өске бурганнарга хандыкшып шаг болдуң o,
Мээң сөзүмнү тооп дыңнавайн турдуң».
Дээрги-Чаяакчының медеглээн чүвези ол-дур.
14«Эглип келиңер, өскерликчи ажы-төл – деп, Дээрги-Чаяакчы медеглээн, – чүге дээрге Мен – Ээңер-дир мен ▼
▼ Азы: «Ашааңар-дыр мен» (Иса. 54:5; Иер. 3:14; Ос. 2:7 көр).
, силерни, бир хоорайдан-на – бир кижи, бир аймактан-на – ийи кижи кылдыр эдертип алгаш, Сионче эккээр мен. 15Мээң сеткилимге тааржыр чагырыкчылардан силерге бээр мен, олар силерни угаан-медерелдии-биле чагырар q. 16Бо черге өзүп-көвүдеп, эңдерли бээр силер – деп, Дээрги-Чаяакчы медеглээн, – ол хүннерде Дээрги-Чаяакчының чагыг-керээзин шыгжаан аптара r дугайында улус чугаалашпас, ону бодавас база сагынмас, ону хереглевес, өске ыдыктыг аптара-даа кылып албас. 17Ол үеде Дээрги-Чаяакчының дүжүлгези деп атты Иерусалимге тыпсыр, бүгү чоннар Иерусалимге чыглып келгеш, Дээрги-Чаяакчының адынга мөгеер, оон соңгаар боттарының чөрүүленген бузуттуг чүректеринге чагыртып чурттавайн баар. 18Ол хүннерде Иудеяның чону Израильдиң чону-биле каттыжып алгаш s, соңгу чүкте чурттан силерниң ада-өгбеңерге Мээң берген черимче чоруй баар. 19Мен сеңээ ажы-төлүмге дег хамаарылгалыг болуксадым,сеңээ күзенчиг черни, чоннарның эң кайгамчык үлүүн дыка берикседим.
Сен Мени „Ачам“деп адаар боор деп,
Менден ойталавас боор деп бодадым.
20Ынчалза-даа ашаанга өскерилген кадай дег,
израиль чон, сен база Меңээ өскерилдиң t – деп, Дээрги-Чаяакчы медеглээн. –
21Тейлер баштарында алгы-кышкы,
израиль чоннуң чалынган ыы-сыызы дыңналып турар,
чүге дээрге олар оруундан өскээр ээп,
Дээрги-Чаяакчы Бурганын уттупкан-дыр u.
22Эглип келиңер, өскерликчи ажы-төлүм,
Мен силерни шынчы эвес чорууңардан экиртип каар мен v».
Көрем, Сенче бар чыдыр бис,
чүге дээрге Дээрги-Чаяакчы Бурганывыс – Сен-дир сен!
23Тейлерде – чүгле меге,
дагларда – чүгле шимээнниг чыыштар бар болгай.
Израильдиң камгалалы чүгле Дээрги-Чаяакчы Бурганывыстан кээри шын-дыр!
24Бистиң аныяк шаавыстан-на бужар дүрзү-бурганнар
ада-өгбевистиң эт-хөреңгизин, оларның шээр, бода малын,
оглу-кызын сыырып турган.
25Бужар чүүлдеривис бисти бүргеп алган,
бак адывыс бисти шып алган!
Чүге дээрге бис-даа, ада-өгбевис-даа аныяк шаавыстан амдыгаа чедир
Дээрги-Чаяакчы Бурганывыска удур бачыт үүлгедип,
Ооң сөзүн тооп дыңнавайн турган-дыр бис w.
Copyright information for
TyvTUV