Jer 30 | TyvTUV | STEP | Дээрги-Чаяакчының Иеремияга ажыдып каан сөзү бо-дур.

‏ Jeremiah 30

Дээрги-Чаяакчының идегелди аазааны

1 Дээрги-Чаяакчының Иеремияга ажыдып каан сөзү бо-дур. 2 Дээрги-Чаяакчы, Израильдиң Бурганы мынча дээн: «Мээң сеңээ чугаалаан бүгү чүвемни дүрүг-номга бижип каг ^a. 3 Чүге дээрге үези кээрге, Мээң чонумга, Израиль биле Иудеяга, эки чолду эгидер мен ^b – деп, Дээрги-Чаяакчы медеглээн, – оларның ада-өгбезинге берген черимче оларны дедир чандырар мен, олар ынчан черин ээлеп чурттаар ^c».

4 Дээрги-Чаяакчының Израиль биле Иудея дугайында чугаалаан сөстери бо-дур. 5 Дээрги-Чаяакчы мынча дээн:

«Коргуушкун биле девидээшкин кышкызы дыңналып тур –
амыр-тайбың чок-тур!
6 Айтырып, боданып көрүңер! Эр кижи божуп шыдаар бе?
А чүге Мен көөрүмге, эр улус,
божаан кадайлар дег, белинден туттунуп алганыл? ^d
Чүге оларның арыннары ак тос апарганыл? ^e
7 Аа халак! Ол өндүр улуг хүн-дүр, аңаа дөмейлежир хүн чок.
Израильге айыыл-халап үези кээри ол-дур ^f,
ынчалза-даа ол тын-менди үнер.

8 Ол хүн кээрге, Мен сээң мойнуңда хомутту чуура шаап, моожаңны үзе тыртар мен ^g – деп, Аг-шериглиг Дээрги-Чаяакчы медеглээн. – Ынчан Мээң улузум даштыкы улуска бараан болбайн баар, 9 а боттарының Бурганы, Дээрги-Чаяакчыга база оларның бажынга Мээң салып каарым боттарының хааны – Давидтиң салгакчызынга бараан болуп эгелээр ^h.

10 А сен, Мээң чалчам Иаков ⁱ, кортпа – деп, Дээрги-Чаяакчы медеглээн, –
Израиль, сүрээдеве!
Мен сени камгалап, ырак чурттан дедир эккээр мен,
үре-салгалыңны – туттуруушкунда турары чурттан дедир чандырар мен.
Иаков ээп келгеш, хостуг-шөлээн, амыр-тайбың чурттаар,
ону кым-даа коргудуп-дүвүретпес ^j.
11 Чүге дээрге Мен сээң-биле кады мен – деп, Дээрги-Чаяакчы медеглээн, –
Мен сени камгалаар мен!
Оларның аразынга сени тоо быдаратканым бүгү чоннарның когун үзер мен,
а сени узуткавас мен.
Ындыг-даа болза, сени чөптүү-биле кезедир мен,
кеземче чок арттырбас мен! ^k»

12 Дээрги-Чаяакчы мынча дээн:
«Балыгларың эмнеттинмес-тир, кемдээшкиниң аар-дыр! ^l
13 Сээң херээң дээш кым-даа сагыш салбас-тыр,
балыгларыңга эм-таң чок-тур, экиртир эмнеттинмес-тир сен.
14 Хандыкшааннарың ^{▼▼ Хандыкшааннар – Иудеяның эвилелчилерин көргүскен (Иер. 2:33; 22:20 көр).} шупту сени уттупкан, сеңээ келиксевес апарган.
Дайзыннарың согугларын сенче угландырдым,
каржы-дошкуну-биле кезеттим,
чүге дээрге кем-бурууң улуг-дур, бачыттарың эңдерик-тир.
15 Балыгларың дээш, аар кемдээшкиниң дээш
чүге човууртап алгырар сен?
Кем-бурууң улуг-дур, бачыттарың эңдерик-тир,
ынчангаш Мен сени ынчаар аажыладым.
16 Ындыг-даа болза, сени сыырып турганнарның боттарын сыырар,
сени кызып-кыйып турган улусту тудуп алгаш баар!
Сени үптеп турганнар боттары үптеттирер,
сенден олча-тывыш ап турган улус
боттары олча-тывыш боор кылып каар мен! ⁿ
17 Сени улус кагдырган деп санап:
„Сион бо-дур, ол ам кымга-даа херекчок апарды!“– деп турза-даа,
Мен сени экиртип, балыгларыңны эмнээр мен ^o».
Дээрги-Чаяакчының медеглээн чүвези ол-дур.

18 Дээрги-Чаяакчы мынча дээн:
«Мен Израильдиң чадырларын катап тигер мен,
ооң бажың-балгадын кээргээр мен!
Бузундулар шыпкан тейлер кырынга хоорайлар туттунар,
ордулар биеэги туружунга туттунуп туруптар.
19 Улус-чон мактал тудуп мөргүүр, өөрүп алгыржыр.
Мен оларны өстүрүп-көвүдедир мен ^p –
олар моон соңгаар эвээжевес;
оларны алдаржыдар мен – олар куду көрдүрбес.
20 Оларның оолдары шаандагы үеде дег чурттаар,
оларның ниитилели Мээң мурнумга быжыгар,
оларны кызып-кыйган улусту кезедир мен!
21 Оларның баштыңы – боттарының бирээзи болур,
чагырыкчызы – боттарының аразындан үнер.
Мен ону чоокшуладып аар мен, ол Меңээ чоок апаар.
Кижи боду Менче чоокшулап диттикпес болгай – деп, Дээрги-Чаяакчы медеглээн. –
22 Силер Мээң чонум болур силер,
Мен – силерниң Бурганыңар болур мен! ^q»

23 Дээрги-Чаяакчының шуурганы килеңнии-биле көдүрүлдү!
Коргунчуг казыргы бузуттугларны хөме ап, бажын алыр! ^r
24 Дээрги-Чаяакчы Бодунуң чүрээнде бодалдарын күүседип,
боттандырбаан шаанда, Ооң өөскүп үнген килеңи оожургавас.
Келир үеде силер ону билип аар силер ^s.