Jer 31 | TyvTUV | STEP | «Ол үе кээрге, Мен Израильде төрел бөлүк бүрүзүнүң Бурганы болур мен – деп, Дээрги-Чаяакчы медеглээн,

‏ Jeremiah 31

1 «Ол үе кээрге, Мен Израильде төрел бөлүк бүрүзүнүң Бурганы болур мен – деп, Дээрги-Чаяакчы медеглээн, – а олар Мээң чонум болур».

Чаа израиль чон

2 Дээрги-Чаяакчы мынча дээн:
«Дайын-чаадан дириг арткан чон
ээн кургаг ховуга Мээң ээ көрнүүшкүнүмнү чедип алган.
Мен Израильге оожургал-дышты хайырлаан мен!
3 Мен аңаа ырактан көстүп келген мен.
Мөңге ынакшыл-биле сеңээ ынак болгаш ^a,
энерелим сеңээ көргүзер мен!
4 Сени база катап күш киирер мен;
Израиль-кыс, күштүг апаар сен!
Хөгжүм херексели тудуп алгаш,
өөрүң-биле база катап өөрүшкүлүг самнап үнүп кээр сен ^b;
5 Самарияның дагларынга виноградың база катап тарып аар сен.
Виноград тараан ажаакчылар ооң чимизин боттары чооглаар! ^c
6 Ийе, ол хүннү доктааткан, ынчан Эфрем дагларында доскуулчулар:
„Тургулаңар, Сион дагже, Дээрги-Чаяакчы Бурганывысче
үне берээли! ^d“– деп алгыржы бээр».

7 Дээрги-Чаяакчы мынча дээн:
«Израильди өөрүшкүлүг алгап ырлаңар,
чоннарның баштыңын мендилеңер!
Чарлап, мактаңар база „Дээрги-Чаяакчы, Бодуңнуң чонуңну,
Израильдиң арткан кезээн камгалап көр!“– деп дилеңер.
8 Мен израильчилерни соңгу чүкте чурттан,
чер-делегейниң ужу-кыдыындан чыып эккээр мен ^e.
Согур, аскак-бүскек улус, иштиг-сааттыг, божуур четкен херээженнер база
оларның аразынга турар, олар дыка хөй бооп мөөңнежип алган чанып кээр.
9 Израильчилер ол чурттан ыы-сыылыг чоруптар ^f –
мен ам оларны суглар кыдыы-биле оргу-дески оруктап эдертир мен,
олар аңаа илдикпес.
Мен – Израильдиң адазы-дыр мен,
Эфрем – Мээң дун оглум-дур ^g!

10 Чоннар, Дээрги-Чаяакчының сөзүн дыңнаңар!
Ырак чурттарга медээлеп: „Израильди Кым тоо быдаратканыл,
Ол Боду ону чыып алгаш, кадарчы сүрүг малын дег,
карактап-кадарар ^h“– деп чугаалаңар.
11 Дээрги-Чаяакчы Израильди садып хостаан ⁱ,
ооң күш четпези холдан адырган! ^j
12 Израиль чон ээп келгеш, бедик Сионга өөрүп-хөглээр,
Дээрги-Чаяакчының ачы-буян хайырлалы:
кызыл-тас, виноград арагазы, олива үзү,
аныяк бода болгаш шээр мал дээш өөрүп-байырлаар.
Оларның сагыш-сеткили суггаттыг чечектелген сесерлик дег апаар ^k,
хилинчек көрбестей бээрлер.
13 Чалыы кыстар самнап хөглээр,
аныяк оолдар, кырганнар база!
Оларның кажыыдалын хөглээшкин-биле солуур мен ^l,
оларны аргалаар мен, муңгарал соонда, өөртүр мен.
14 Бурганның бараалгакчыларын элбек-чаагай аъш-чем-биле чемгерер мен,
чонум Мээң ачы-буян хайырлалымны четтиргеш, тодар».
Дээрги-Чаяакчының медеглээн чүвези ол-дур.

15 Дээрги-Чаяакчы мынча дээн:
«Рамада ^{▼▼ Рама – туттурган израильчилерниң Вавилонче бар чыткаш, доктааган хоорайы (Иер. 40:1 көр).} алгы-кышкы, ажыг-шүжүгнүң ыы-сыызы дыңналып тур.
Рахил ^{▼▼ Рахил – израиль чоннуң өгбе иелериниң бирээзи (Э. д. 46:19 көр).} ажы-төлүнүң ажыын ажып ыглап, хөңнү чазалбайн тур,
чүге дээрге ажы-төлүн ышкынган-дыр ^o»

16 Дээрги-Чаяакчы мынча дээн:
«Ишкирнигип ыглавайн көр, карааң чажы төгүлбезин,
чүге дээрге сээң күш-ажылың дээш шаңнал көрдүнген – деп, Дээрги-Чаяакчы медеглээн, –
ажы-төлүң дайзыннарының чуртундан дедир чанып кээр!
17 Сээң идегелиң – келир үеде – деп, Дээрги-Чаяакчы медеглээн, –
оолдарың боттарының ээлээн черинче эглип кээр!

18 Дыңнап кагдым – Израиль ыглап-сыктап:
„Сен мени кезеттиң, чөрүү молдурга ышкаш, кеземче алдым.
Эглип келзин дээш, мени ээлдирип алам, Дээрги-Чаяакчы ^p,
Сен – мээң Бурганым болгай сен!
19 Мен оруктан өскээр эггеш, хараададым,
бачыдым билингеш, бажым шаштынып турдум!
Адым баксырап, бодумну бужартаттым,
аныяк шаамның багын чүктеп чор мен“– деп тур.

20 А Эфрем – Мээң эргим оглум, ынак төлүм эвес чүве бе? ^q
Мен ону чаңгыс эвес катап чемелеп турдум,
ынчалза-даа черле утпаан мен!
Мээң сеткил-чүрээм ол дээш муңгарап чор, Мен ону кээргеп тур мен!»
Дээрги-Чаяакчының медеглээн чүвези ол-дур.

21 «Бодуңга орук демдеглээр даштардан салып ал,
чагылардан тургузуп ал,
сеткил-чүрээңни биеэде чоруп турганың дорт орукче угландыр.
О, Израиль-кыс, эглип кел, бодуңнуң хоорайларыңче эглип кел!
22 Кажанга чедир улчуп кээр сен, өскерликчи кыс? ^r
Дээрги-Чаяакчы чер кырынга туруп көрбээн чүүлдү кылды:
кыс кижи бодунуң эр эжинче дедир эглип келди ^{▼▼ Бо домактың утказы эки билдинмес. Кыс кижи – Израиль, а эр – Дээрги-Чаяакчы бооп чадавас.}».

23 Аг-шериглиг Дээрги-Чаяакчы, Израильдиң Бурганы:
«Кажан мен израиль чонга эки чолду эгидеримге ^t,
Иудеяда, ооң хоорайларында улус:
„Чөптүг-шынныг оран-сава, ыдыктыг даг!
Дээрги-Чаяакчы сеңээ ачы-буяндан хайырлазын! ^u“– деп сөстерни чугаалаар.
24 Шак бо черни Иудеяның чону,
ооң бүгү хоорайларының чурттакчылары,
чер ажылдыглар болгаш сүрүг малы-биле көжүп чоруур улус
эп-найыралдыг ээлеп чурттаар.
25 Могап-шылаан улуска суг ижиртир мен,
шагзыраан улусту тоттурар мен» – дээн.

26 Ынчан мен одунгаш, карактарым көрүп келдим. Удуп чыткан үем тааланчыг болду.

Чаа чагыг-керээ

27 «Израиль биле Иудеяны чурттакчы чон болгаш мал-маган-биле долдурар үем кел чыдыр ^v – деп, Дээрги-Чаяакчы медеглээн. – 28 Мурнунда Мен дазылы-биле тура тыртар, үрегдээр, буурадыр, узуткаар болгаш хора халдадыр дээш олардан карак салбайн турдум ^w. Ам Мен быжыглаар база тарып олуртур дээш олардан карак салбас мен ^x – деп, Дээрги-Чаяакчы медеглээн. – 29 Ол үеде улус: „Адалары шаңгыр кат чип турган, а ажы-төлдүң дижи кагжаан ^y“– деп чугаалавайн баар. 30 Чүге дээрге кижи чүгле бодунуң кем-буруузу дээш өлүр ^z; шаңгыр катты кым чигенил – ооң дижи кагжаар.

31 Израильдиң чону-биле база Иудеяның чону-биле чаа чагыг-керээ чарар үем кел чыдыр ^aa – деп, Дээрги-Чаяакчы медеглээн. – 32 Оларның ада-өгбезин холундан чедип алгаш, Египеттен үндүре бергеш, олар-биле чарганым дег эвес, өске чагыг-керээ болур. Олар ук чагыг-керээни үрээн болгай, а Мен оларның Ээзи ^ab турган мен ^{▼▼ Өске бурунгу сөзүглелде «Мен ол дээш олардан ойталаан мен» деп бижээн.} – деп, Дээрги-Чаяакчы медеглээн. – 33 Мен ол хүннерде израиль чон-биле мындыг чагыг-керээ чарар мен ^ad: Бодумнуң дүрүм-хоойлумну оларның угаан-медерелинче киирер мен, оларның чүректеринге бижип каар мен! ^ae Мен оларның Бурганы болур мен, а олар Мээң чонум болур ^af – деп, Дээрги-Чаяакчы медеглээн. – 34 Моон соңгаар кым-даа өске кижини, бодунуң ха-дуңмазын, сургап: „Дээрги-Чаяакчыны билип алыңар!“– дивес, чүге дээрге олар шупту, улуг-бичези чокка, Мени билген турар ^ag – деп, Дээрги-Чаяакчы медеглээн. – Мен оларның кем-буруузун өршээр мен, оларның бачыттарының дугайында оон ыңай сагынмас мен ^ah».

35 Хүндүскү үени чырытсын дээш хүннү хайырлаан,
дүнеки үени чырытсын дээш ай биле сылдыстарга дүрүмнер доктааткан ^ai,
далайны хөлзедип, чалгыгларны шимээргедип турар ^aj
Аг-шериглиг Дээрги-Чаяакчы деп аттыг Бурган мынча дээн:
36 «Бо дүрүмнер Мээң мурнумга күжүн чидирбези дег,
Израильдиң салгалы Мээң мурнумга кезээ мөңгеде чон бооп артар ^ak».

37 Дээрги-Чаяакчы мынча дээн:
«Бедик дээр хемчээттинмес, черниң ханы үндезиннери шинчилеттинмес,
Мен база Израильдиң салгалындан, бак үүлгедиглер кылган-даа болза, ойталавас мен! ^al»
Дээрги-Чаяакчының медеглээн чүвези ол-дур.

Чаа Иерусалим

38 «Бо хоорайны Дээрги-Чаяакчыга алдар кылдыр Хананел суургазындан ^am Азыгда хаалгага чедир ^an катап база тудар үе кээр – деп, Дээрги-Чаяакчы медеглээн. – 39 Чер хемчээр хендир оон Гарив тейге чедир шөйүлгеш, оортан Гоафче ээптер. 40 Ам мөчү-сөөк биле хүл шыпкан бүгү шынаага ^ao база Кедрон суунга чедир, чөөн чүкте Аът хаалгазынга ^ap чедир бүгү шөлдер Дээрги-Чаяакчының ыдыктыг чери апаар ^{▼▼ Бо тодарадып бижээн кезекте чаа Иерусалимниң кызыгаары биеэдегизинден алгып, мурнунда бужартаан турган черлерни база киирип турар.}, ол хоорайны кажан-даа үреп буспас, узуткавас».