‏ Jeremiah 38

Иеремияның оңгарже киир октаттырганы

1Маттанның оглу Шефатия, Пашхурнуң оглу Годолия, Шелемияның оглу Иегухал ^a болгаш Малхияның оглу Пашхур ^b олар Иеремияның бүгү чонга мындыг сөстер чугаалаанын дыңнааннар: 2«Дээрги-Чаяакчы: „Бо хоорайга арткан кижи дайын-чаа, аш-чут болгаш хамчык аарыгдан өлүп каар. Халдейлерге дүжүп бээр кижи дириг артар, ооң олча-кежии – амы-тынныг артары боор! ^c – дээн. – 3Бо хоорайны Вавилоннуң хаанының шериинге хүлээдип бээр, ол хаан ону эжелеп аар!“ ^d Дээрги-Чаяакчының чугаалаан чүвези ол-дур».

4Нояннар хаанга: «Бо кижини өлүрер болза эки-дир ^e, чүге дээрге ол ындыг сөстер чугаалааш, хоорайда арткан дайынчыларның, бүгү чоннуң сорук-күжүн кошкадып турар-дыр. Бо кижи чонга буян эвес, бузут күзеп турар-дыр» – дээннер.

5Седекия хаан: «Ол силерниң холуңарда-дыр, чүге дээрге хаан силерге удурланыр харык чок-тур» – деп чугаалаан ^f.

6Иеремияны сегирип алгаш, таңныылдар шөлүнүң иштинде Малхия тажыга хамааржыр суг курлавырлаар оңгарже, хендирге баглааш, бадырыпканнар. Оңгарга ынчан суг чок ^g, чүгле өл малгаш турган. Иеремия ол малгашче дүже берген ^h.

7Хаанның ордузунда дүжүметтерниң бирээзи – эфиоп аймак-сөөктүг Авдемелех ⁱ Иеремияны оңгарже бадырыпканын дыңнап каан. Хаан ол үеде Вениаминниң хаалгазының ^j чанынга олурган. 8Авдемелех хаанның ордузундан үнүп келгеш, хаанга: 9«Мээң чагырыкчым, хааным! Бо улус Иеремия медээчини кончуг бак аажылаан-дыр. Олар ону оңгарже киир октапкан-дыр, ол аңаа аштап өлүп каар, чүге дээрге хоорайда ам аъш-чем арткан эвес ^k» – дээн.

10Хаан эфиоп Авдемелехке: «Моон үжен кижиден эдертип алгаш, Иеремия медээчи өлбээнде, ону оңгаран уштуп каг» – деп дужааган.

11Авдемелех улус эдертип алгаш, хаанның ордузунда чүү-хөө шыгжаар черге чеде берген. Ол оортан эрги, ажыглаар аргажок пөстер болгаш элей берген хептер ап алгаш, ол бүгүнү хендирге баглааш, кудукта чыткан Иеремияже бадырыпкан. 12Эфиоп Авдемелех Иеремияга: «Колдууң адаандан хендир-биле багланып ал, а хендир адаанга эрги пөстер биле элей берген хептерни көвеп ал» – дээн.

Иеремия шак ынчаар кылган. 13Улус Иеремияны хендир-биле көдүрүп, оңгардан ушта тыртып алган. Иеремия таңныылдар бажыңының хериминиң иштинге артып калган.

Иеремияның Седекия-биле ужуражылгазы

14Седекия хаан Иеремияны кыйгыртыпкан. Медээчини Дээрги-Чаяакчының өргээзинче үшкү кирер черже эккээрге, хаан аңаа: «Мен сенден бир чүве айтырайн, а сен менден чүнү-даа чажырба» – дээн.

15Иеремия Седекияга: «Бир эвес мен сеңээ ажыдып чугаалаар болзумза, мени өлүртүп каар эвес сен бе? Сеңээ арга-сүме бээр болзумза, мени тооп дыңнавас болгай сен» – дээн.

16Седекия хаан Иеремияга: «Биске амы-тын хайырлаан дириг Дээрги-Чаяакчының ады-биле даңгыраглап тур мен! Мен сени өлүртпес мен, сени өлүрүксеп турар улустуң холунга хүлээтпес мен!» – деп бүдүү аазаан.

17Иеремия ынчан Седекияга мынча дээн: «Дээрги-Чаяакчы, Израильдиң Аг-шериглиг Бурганы: „Бир эвес сен Вавилоннуң хаанының шериг баштыңнарынга дүжүп бээр болзуңза, амы-тының камгалап аар сен ^l, бо хоорайны база хуюкталдыр өрттетпес. Бүгү өг-бүлең-биле кады амы-тынныг артар сен. 18А бир эвес Вавилоннуң хаанының шериг баштыңнарынга дүжүп бербес болзуңза, бо хоорайны халдейлерге хүлээдип бээр, олар ону хуюкталдыр өрттедиптер ^m, бодуң база оларның холундан адырлып шыдавас сен“– дээн».

19Седекия хаан Иеремияга: «Халдейлерге дүжүп бээр дээш дескен иудейлерден ⁿ коргар-дыр мен. Халдейлер мени оларга хүлээдип бээр болза, олар мени бак аажылаар болгай» – деп харыылаан.

20Иеремия мынча дээн: «Хүлээдип бербес! Мээң сеңээ чугаалап турарым Дээрги-Чаяакчының сөзүн дыңна, ынчан сеңээ эки болур, амы-тының камгалап аар сен ^o. 21А бир эвес хоорайдан үнеринден ойталаар болзуңза, Дээрги-Чаяакчы менче кандыг көстүүшкүн чорутканын дыңнап ал. 22Көөрүмге, Иудеяның хаанының ордузунда арткан бүгү херээженнерни Вавилоннуң хаанының шериг баштыңнарынга тудуп аппарып турар-дыр. Олар:

„Сээң эш-өөрүң сени күткүдүп, бүзүредип алды.
А буттарың малгашка кадалы бээрге ^p,
олар сенден хая көрнүп, каапкаш барды“

– деп чугаалаар.

23Сээң бүгү кадайларыңны, ажы-төлүңнү халдейлерже алгаш баар ^q. Сен бодуң база оларның холундан чайлап шыдавас сен, Вавилоннуң хааны сени тудуп аар, а бо хоорайны хуюкталдыр өрттедиптер».

24Седекия Иеремияга мынча дээн: «Сээң-биле чугаалашканывысты кым-даа билбес болзун, ынчан сен дириг артар сен. 25Мээң сээң-биле чугаалашканым нояннарның кулаанга чеде бээрге, олар сеңээ чедип келгеш: „Хаанга сен чүнү чугааладың, а хаан сеңээ чүү диди? Биске чажырбайн чугаала, ынчан сени өлүрбес бис“– дээр болза, 26сен оларга: „Мен хаандан мени Ионафанның бажыңынче ^r, аңаа өлбес дээш, дедир эгитпезин ээрежип дилеп турдум“– дээр сен».

27Иеремияга бүгү нояннар чедип келгеш, айтырыглар салып эгелээн. Иеремия оларга хаанның дужааганын ёзугаар харыылаан. Нояннар Иеремиядан оон ыңай чүнү-даа айтырбайн чоруй барган, чүге дээрге ооң хаан-биле чүнү чугаалашканын кым-даа билбес турган. 28Иеремия Иерусалимниң эжелеттирген хүнүнге чедир таңныылдар шөлүнүң иштинге арткан.

Оон Иерусалим эжелеттирген.