Jeremiah 4
1«Израиль, бир эвес эглип келиксээр болзуңза, Менче эглип кел a – деп, Дээрги-Чаяакчы медеглээн. –Чүдек-бужар дүрзүлериңни ап октапкаш,
улчуп чорбастай берзиңзе база
2шынныы-биле, ак сеткилдии-биле:
„Дириг Дээрги-Чаяакчының ады-биле даңгыраглап тур мен!“– дээр болзуңза b,
өске чоннар Бургандан ачы-буян алыр,
Ол дээш чоргаарланыр c».
3Дээрги-Чаяакчы Иудея биле Иерусалимде чурттаан улуска
мынча деп турар-дыр: «Кур черден боттарыңарга аңдарып алыңар d,
тенниг үнүштер аразынга үрезин тарываңар! e
4Дээрги-Чаяакчыга хамааржырыңарны көргүзери-биле
чүрээңерни демдектеп, арыглап алыңар f,
Иудеяның улузу, Иерусалимниң чурттакчылары,
оон башка силерниң бузуттуг херектериңер дээш
Мээң килеңим чалбыышталдыр хып,
өжүртүнмес өрт ышкаш апаар g».
Соңгу чүкте чурттан дайзын халдап кээр
5«Иудеяга чарлап көрүңер,Иерусалимге медээлеп чугаалаңар,
бүгү чуртка трубадан этсиңер h,
үнүңер шаа-биле: „Барып, быжыглаттынган хоорайларга чыглыылы!“– деп алгырыңар.
6 Сионче дезер дээш ынаар углай туктан көдүрүңер,
амы-тыныңар камгалаңар, черле доктааваңар, чүге дээрге Мен соңгу чүктен айыыл-халап,
кончуу сүргей өлүм-чидим эккээр мен! i
7Шырыштан үнүп келген арзылаң дег,
чоннарны узуткаар хаан кел чыдар-дыр j,
ол силерниң чериңерни хоозурадыр дээш
бодунуң чыдынындан туруп келген-дир.
Узуткакчы хоорайларыңарны үреп бузуп кааптарга,
оларга чурттакчылар артпас».
8Ынчангаш качыгдал хевинден кеткеш,
ишкирнигип ыглажыңар k,
Дээрги-Чаяакчының килеңи бисти оюп эртер эвес.
9«Ол хүн хаан-даа, ноян-даа эр соруун чидириптер,
Бурганның бараалгакчылары коргуп-сүртээр,
медээчилер аңгадай бээр» – деп, Дээрги-Чаяакчы медеглээн.
10Мен: «Аа халак, Дээрги-Бурган-Чаяакчы! Сен бо чонга, Иерусалимниң чурттакчыларынга тайбың дүжерин аазааш, оларны ылап-ла мегелеп кагдың l. Хылыш оларның боскун үзе кезер деп барды» – деп чугааладым. 11Шак ол чонга, Иерусалимниң чурттакчыларынга:
«Ол үеде Мээң күжүр чонумче
ээн кургаг ховунуң тас тейлеринден
изиңейндир чип турар хат хадып кээр!
Ындыг хатка тараа арыглай челбиттинмес,
үрезин саваңдан арыглаттынмас.
12Хат хөлүн эрттир дыңзыг боор! m
Мээң күзел-соруум ёзугаар ол хат хадып кээрге,
Мен чонумга хамаарыштыр шииткелимни үндүрер мен!» – деп, Бурган чугаалаан.
13Булут ышкаш, дайзын көдүрлүп олур n,
ооң дайынчы тергелери казыргы дег o,
аъттары эзирлерден кашпагай! p
Ат болдувус-ла, өлүп читтивис-ле!
14«Иерусалим, бодуңнуң чүрээңни бузуттан арыглап ал q,
ынчан камгалалды алыр сен!
Чежеге дээр кара бодалдарың амдажыдар сен?
15Дан хоорайдан, Эфрем дагларындан
өлүмнүң медээзи дыңналып тур.
16Чоннарга мону чарлаңар, Иерусалимге дамчыдыңар:
ырак чурттан аг-шериг кел чыдыр,
Иудеяның хоорайларында оларның алгы-кышкызы чаңгыланып тур.
17Шөлдү долганган таңныылдар дег,
олар найысылалды бүзээлеп келди r.
Чүге дээрге Иудея Меңээ удур тура халаан-дыр! – деп, Дээрги-Чаяакчы медеглээн. –
18Бодуңнуң-на ажыл-херектериң,
бак үүлгедиглериң бо бүгүнү сенче халдатты! s
Бузут-багыңдан тывылган ажыг-шүжүг сээң чүрээңни кемдедип тур».
Иеремияның чону дээш кажыыдааны
19Ишти-хөңнүмнү! Ишти-хөңнүмнү!Чүрээм аарышкыдан харыксырап, чарлыр чыгыы соп тур t,
ыыттавайн баар аргам чогул.
Чүге дээрге трубалар эткенин – дайынчы медээни дыңнап тур мен.
20Халапты халап солаан u, бүгү чурт хоозураан;
чадырларывыс хенертен, оран-сававыс – карак чивеш дээр аразында
буступ кээп дүшкен v.
21Кажанга чедир дайынның туктарын көрүп,
дайынчы трубалар этсирин дыңнаар мен?
22«Мээң чонум мелегей-дир, Мени билбес-тир!
Угаан кирбээн уруглар дег, сарыыл чок-тур; w
олар чүгле бузут үүлгедир талазы-биле мергежээн,
а буян кылып билбес-тир».
23Черже көрдүм – ол ужу-бажы билдинмес, ээн болду,
дээрже көрдүм – ында чырык чок болду x.
24Дагларже көрдүм – олар сирилеп тур,
тейлер шупту сүрээдеп тур y.
25Көөрүмге, чаңгыс-даа кижи чок,
дээрниң куштары тарадыр ужа берген болду z.
26Көөрүмге, чечектелген чер ээн кургаг хову апарган болду aa,
ооң бүгү хоорайларын Дээрги-Чаяакчының күзел-соруун ёзугаар бузуп каапкан –
Ооң килең-кылыы ол хире-дир!
27Дээрги-Чаяакчы: «Бо бүгү чер хоозурап каар,
ынчалза-даа ону бүрүнү-биле узуткавас мен! ab
28Ынчангаш чер ыглап-сыктаар ac, бедик дээр карара бээр ad;
шиитпиримни үндүрген мен,
ам ону өскертпейн, күүседир мен» – деп чугаалаан болгай.
29Аъттыг-шеригжилер биле ча адыгжыларының алгы-кышкызындан
хоорай чурттакчылары тарадыр маңнажып тур.
Олар шыргай аргаларже дезип,
кашпалдарже чаштып чоруп тур.
Хоорайлар шупту ээнзирээн, оларда чаңгыс-даа чурттакчы артпаан.
30А сен, куруглаан Иудея, ам канчаар сен?
Каас-коя хептер кедип, алдын каасталгалар-биле шиметтинип,
карактарың будуп чордуң. Хей-ле каастанып чораан болдуң!
Сээң-биле самыырап турган таныштарың
сени тоовастап, амы-тыныңны үзүксеп тур ae.
31Алгы-кышкыны дыңнап тур мен –
херээжен кижи божуп чыткан-даа дег,
ол дун төлүн божуп, човууртаан-даа ышкаш af.
Сион-кыс ыглап-сыктап, уё-човуур-биле холун өрү сунуп ag:
«Ат болдум! Өлүрүкчүлерден дезер дээш шаам төндү!» – деп тур.
Copyright information for
TyvTUV