Jer 43 | TyvTUV | STEP | Иеремия бүгү чонга оларның Бурганы Дээрги-Чаяакчының сөзүн – Ооң Иеремияны дамчыштыр оларга чугаалаан бүгү чүвезин медеглээн.

‏ Jeremiah 43

Сөс дыңнавас артынчы чоннуң Египетче чорупканы

1 Иеремия бүгү чонга оларның Бурганы Дээрги-Чаяакчының сөзүн – Ооң Иеремияны дамчыштыр оларга чугаалаан бүгү чүвезин медеглээн. 2 Ынчан Гошайяның оглу Азария, Карейниң оглу Иоханан ^a өске бүгү бардам улус-биле кады Иеремияга мынча дээннер: «Шын эвес чүве чугаалап тур сен! Дээрги-Чаяакчы Бурганывыс сени „Египетче чорбаңар, аңаа чурттаваңар! ^b“деп чугаалазын дээш айбылап чоруткан эвес. 3 Харын Нирияның оглу Варух ^c бисти халдейлерниң холунга хүлээдип бээр дээш база олар бисти өлүрүп кагзын азы Вавилонче сүрүп аппарзын дээш, сени биске удур ыдалап турар-дыр».

4 Карейниң оглу Иоханан, бүгү шериг баштыңнары болгаш бүгү чон Дээрги-Чаяакчының «Иудеяга артып калыңар!» дээн айтыышкынын тооп дыңнавайн барган. 5 Карейниң оглу Иоханан биле бүгү шериг баштыңнары Иудеяның артынчы чонун (а ол улус өске чоннарның черлеринче үндүр сывыртаткаш, ам Иудеяже дедир чанып кээп турган) – 6 эр, херээжен улусту, оларның ажы-төлүн, хаанның уругларын, камгалакчы шериглер даргазы Навузарданның ^d Шафанның оглунуң оглу, Ахикамның оглу Годолия-биле ^e арттырып каан бүгү улузун база ол ышкаш Иеремия медээчини, Нирияның оглу Варухту – эдертип алгаш, 7 Дээрги-Чаяакчыны тооп дыңнавайн, Египетче чорупканнар. Олар Тафнис хоорайга ^f чеде бергеннер.

8 Тафниске Дээрги-Чаяакчы Иеремияга Бодунуң сөзүн ажыдып чугаалаан: 9 «Холуңга улуг даштардан тудуп алгаш, иудейлер көрүп турда, оларны Тафнисте фараоннуң ордузунче кирер чер чанында тапталган дой-довуракка суп каг. 10 Аг-шериглиг Дээрги-Чаяакчы, Израильдиң Бурганының мынча дээн сөзүн иудейлерге чугаала: „Мен боже Бодумнуң чалчам ^g, Вавилоннуң хааны Навуходоносорну кыйгыртып эккелгеш, ооң дүжүлгезин Мээң суп кааным даштар кырынга тургузар мен. Ол бодунуң майгынын оларның кырынга хере тыртып, тип аар! 11 Ол хаан чедип келгеш, Египетти чылча шавар ^h.

Өлүр хүнү келген кижи өлүмче барзын,
туттуруп аары чайлаш чок кижи туттуруп алзын,
хылышка шаштырар кижи хылыштан калзын! ⁱ

12 Египет бурганнарның өргээлерин өрттедир мен. Чамдык бурганнарны хаан өрттедиптер, өскелерин тудуп алгаш баар! ^j Кадарчы кижиниң быттарын хевинден тө силгип кааптары дег, Навуходоносор база Египетти үптээр ^{▼▼ Азы: «Кадарчы кижиниң хевин кедери дег, Навуходоносор Египетти кедип алыр».}, оон амыр-шөлээн чоруй баар. 13 Ол хаан Египетте Хүн-бурганның өргээзинде тураскаал адагаштарны үреп кааптар, египет бурганнарның өргээлерин хуюкталдыр өрттедиптер“».