Jer 46 | TyvTUV | STEP | Дээрги-Чаяакчының Иеремия медээчиге өске чоннар дугайында ажыдып чугаалаан сөзү бо-дур .

‏ Jeremiah 46

Египет дугайында медеглел

1 Дээрги-Чаяакчының Иеремия медээчиге өске чоннар дугайында ажыдып чугаалаан сөзү бо-дур ^a.

2 Египет дугайында ^b база Египеттиң фараону Нехаонуң ^c Евфрат хемниң эриинде Кархемис хоорайга турган аг-шерииниң дугайында медеглел бо-дур. Ол аг-шеригни Вавилоннуң хааны Навуходоносор Иосияның оглу, Иудеяның хааны Иоакимниң чагыргазының дөрткү чылында ^d чылча шапкан чүве-дир.

3 «Дозуг-камгалалдарыңар, чыдаларыңар белеткеңер,
дайынче далажыңар,
4 аъттарыңар эзертээш, халдып үнүңер, аъттыг кижилер!
Куяк бөргүңер кеткеш, чыскаалыңар,
чыдаларыңар баштарын чидидиңер, куяк хептен кедиңер!

5 Көрүп тур мен. Олар коргуп-сүртээш, дезипти,
күштүг дайынчылары кырдырып алды.
Хая көрүнмейн дезип-ле турлар,
долгандыр коргуш бар-дыр ^e – деп, Дээрги-Чаяакчы медеглээн. –
6 Дүрген маңнаар-даа кижи дезип шыдавас,
күштүг-даа кижи камгаланып шыдавас.
Соңгу чүкте чуртка, Евфрат хемниң эриинге тептигип кээп дүшкеш,
олар кырлып калды.

7 Бо кым, Нил хем ышкаш, диргелип келди?
Ооң суу, шапкын агым дег, дажып тур.
8 Египет, Нил хем ышкаш, көдүрлүп келген,
шапкын агым дег дажып тур.
Ол: „Диргелгеш, чер-делегейни хөме аптар мен,
хоорайларны, чурттакчы чонну чок кылыр мен!“– дээн.
9 Халдыңар-ла, аъттар! Маңнадыңар-ла, дайынчы тергелер!
Күштүг дайынчылар: дозуг-камгалалдыг эфиоптар, ливийлер,
чаларын хере тырткан лидийлер – тулчуп үнзүн!

10 Ол хүн болза Аг-шериглиг Дээрги-Бурган-Чаяакчының шииткелиниң хүнү-дүр ^f,
Ооң дайзыннардан өжээн негээр хүнү-дүр! ^g
Хылыш кыргып-хыдып, тодар, оларның ханын пөктүр ижип аар ^h –
ол дээрге Аг-шериглиг Дээрги-Бурган-Чаяакчыга соңгу чүкте чуртка,
Евфрат хемниң чанынга кылган өргүл-дүр ⁱ.
11 Галаадче баргаш, эм бальзамдан ап ал ^j, күжүр Египет-кыс!
Ынчалза-даа эм-таңны хей черге чыыр сен. Экирип шыдавас сен ^k.
12 Сээң адың баксыраанын өске чоннар дыңнап каан,
сээң алгы-кышкың бүгү чер-делегейде дыңналып тур.
Чүге дээрге күштүг дайынчылар бот-боттарынга тептиккеш ^l,
чаңгыс угда кээп дүшкен».

13 Вавилоннуң хааны Навуходоносор келгеш, Египетти чылча шавар дугайында Дээрги-Чаяакчының Иеремия медээчиге ажыдып чугаалаан сөзү бо-дур:

14 «Египетке медээлеңер,
Мигдол, Мемфис биле Тафнис хоорайларга ^m мону чарлаңар:
„Чыскаалыңар, белен болуңар,
чүге дээрге долгандыр турар бүгү чүвени хылыш кыргып-хыдып тур!“

15 Чүге сээң күштүг бугаң ^{▼▼ Мемфис хоорайга улустуң мөгейип турганы буга дүрзүлүг Апис бурганны ынча деп турар чадавас. Ол сөстүң болгу дег өске утказы: «Сээң күштүг дайынчыларың».} ойта кээп дүшкенил, чүге ол шыдашпааныл?
Ону Дээрги-Чаяакчы ойтур октапкан.
16 Хөй улус бот-боттарынга тептиккеш ^o, кээп дүжүп,
бот-боттарынга: „Тураалыңар, төрел чонувус, төрээн черивисче
дедир чанаалы, кызагдакчының хылыжындан камгаланыыл!“– деп тур.

17 Египеттиң фараонунга „Үезин эрттирип алган шуугакчы ^{▼▼ «Шуугакчы» деп сөстүң утказы эки билдинмес. Ооң болгу дег өске утказы мындыг: «Буураан кижи».}“
деп шоладан тыпсыңар ^q.
18 Дириг Бодумнуң адым-биле даңгыраглап тур мен ^r:
даглар аразында Фавор даг дег ^s,
далай чанында Кармил даг дег ^t
улуг-шыырак дайзын силерге чедип кээр – деп,
Аг-шериглиг Дээрги-Чаяакчы деп аттыг Хаан медеглээн ^u. –
19 Египеттиң чурттакчылары, эт-севиңер чыып,
өскээр көжеринге белеткенип алыңар! ^v
Чүге дээрге Мемфис хоозураар, ону үреп бузар,
аңаа чурттакчы артпас ^w.

20 Египет – чараш инек-тир ^x,
олче соңгу чүктен шаашкак ужуп кээп-ле,
ужуп кээп-ле турар.
21 Египетте хөлезилеттинген шериглер – семис бызаалар – база дезиптер,
шупту маңнажып ыңай боор, чайгылыш чок туржуп шыдавас,
чүге дээрге оларга айыыл-халап хүнү, кеземче көөр үе чедип кээр.
22 Египет чылан ышкаш шиигейнип, ыңай союп бар чыдар,
дайзыннар олче дайылдажыр дээш кел чыдар,
ыяш кезикчилери дег, балдыларлыг чоокшулап орар.
23 Олар ооң эрттинмес арга-арыын ^{▼▼ Эрттинмес арга-арыг – эңдерик египет аг-шеригни ойзу көргүскен овур-хевир бооп чадавас.} кезип кааптар – деп, Дээрги-Чаяакчы медеглээн, –
чүге дээрге дайзыннар шартылаадан хөй, эмге-тикчок.
24 Египет-кыс ады баксырап, соңгу чүктүң чонунуң холунче кирер ^z».

25 Аг-шериглиг Дээрги-Чаяакчы, Израильдиң Бурганы мынча дээн: «Фивы хоорайда ^aa Амон бурганны, фараонну болгаш бүгү Египетти кезедир мен, фараонну болгаш аңаа идегээр бүгү улусту, ол чурттуң бурганнарын, хааннарын кезедир мен! ^ab 26 Мен оларны шуптузун оларның амы-тынын үзүксээн улустуң холунга: Вавилоннуң хааны Навуходоносорнуң, ооң дүжүметтериниң холунга хүлээдир мен. Ынчалза-даа ооң соонда Египетти, эрткен үеде ышкаш, улус ээлеп чурттаар ^ac – деп, Дээрги-Чаяакчы медеглээн. –

27 А сен, Мээң чалчам Иаков ^ad, кортпа,
Израиль, сүрээдеве! Мен сени камгалаар мен,
ырак чурттан дедир эккээр мен,
сээң үре-салгалыңны туттуруушкунда турары чурттан дедир чандырар мен.
Иаков ээп келгеш, амыр-тайбың, хостуг-шөлээн чурттаар,
ону кым-даа коргудуп-дүвүретпес ^ae.
28 Мээң чалчам Иаков, кортпа – деп, Дээрги-Чаяакчы медеглээн, –
чүге дээрге сээң-биле кады мен!
Оларның аразынче сени үндүр сывырыпканым
бүгү чоннарның когун үзер мен, а сени узуткавас мен.
Ындыг-даа болза, сени чөптүү-биле кезедир мен,
кеземче чок арттырбас мен! ^af»