Jer 48 | TyvTUV | STEP | Аг-шериглиг Дээрги-Чаяакчы, Израильдиң Бурганы Моав дугайында мынча дээн: «О, Нево хоорай! Ол ат болуп, хоозураар-дыр. Кириатаим хоорай бак атка кирип, эжелеттирер-дир ; бедик шивээ бак атка кирип, бустурар-дыр.

‏ Jeremiah 48

Моав дугайында медеглел

1 Аг-шериглиг Дээрги-Чаяакчы, Израильдиң Бурганы Моав дугайында ^a мынча дээн:

«О, Нево хоорай! Ол ат болуп, хоозураар-дыр.
Кириатаим хоорай бак атка кирип, эжелеттирер-дир ^b;
бедик шивээ бак атка кирип, бустурар-дыр.
2 Моавтың ат-алдары ам чок.
Дайзыннар Эсевон хоорайга удур бак чүве бодап:
„Барып, ол аймакты узуткаалы!“– деп турар-дыр.
Мадмена хоорай, сен база өлүр сен, хылыш сени сүрүп чедер.
3 Хоронаимде: „Буурадып, үреп бузуп тур!“– дээн ыы-сыы дыңналыр.
4 Моав чылча шаптыртыр, ооң ажы-төлүнүң ыы-сыызы дыңналыр.
5 Лухитче ^c үнүп бар чыдар улус соксаал чок ыглажыр,
Хоронаимче бадар орукта ажыг-шүжүгнүң,
хилинчектиң уё-човууру дыңналыр.
6 Дезип, амы-тыныңар камгалаңар!
Ээн кургаг ховуда чадаң үнүш ^{▼▼ Бо сөстерниң утказы эки билдинмес. Өске бурунгу сөзүглелде «Черлик элчиген» деп бижээн.} дег болуңар ^e.
7 Ажыл-херектериңерге, эртине-байлааңарга идегээн болгаш,
силер база туттуруп аар силер.
Хамос бурганны ^f, ооң бараалгакчыларын, нояннарын
дайзын база тудуп алгаш баар ^g.
8 Узуткакчы кайы-даа хоорайны оюп эртпес ^h,
кандыг-даа хоорай камгалал албас,
шынаа чурттакчы чок артар, оргулааш ээнзирээр».
Дээрги-Чаяакчы ынча дээн-дир.

9 «Моавка чалгындан бериңер, ол ужуп чоруй барзын.
Ооң хоорайлары хоозураар, чурттакчы чок артар.
10 Дээрги-Чаяакчының ажыл-херээ дээш кыспас кижи каргаттырар,
бодунуң хылыжын хан шылба кылбас кижи каргаттырар!
11 Моав, турнуккан арага дег ⁱ, аныяандан-на амыр-шөлээн чораан.
Ону бир савадан өске саваже солуй кутпаан, тудуп аппарбаан –
ооң амданы биеэги хевээр арткан, чаагай чыды өскерилбээн.
12 Ынчангаш кажан Мен дайзыннар чорудуптарымга,
олар ону төптер, саваларны куругладыр,
доңгаларны чуура шавар үе чедип кээр – деп, Дээрги-Чаяакчы медеглээн. –
13 Бодунуң идегели боор Вефил ^{▼▼ Вефил – ол хоорайга израильчилерниң мөгейип турганы дүрзү-бурганнар дугайында чугаалап турар (3 Хаан. 12:29 көр).} дээш Израильдиң бак атка киргени дег,
Хамос бурган дээш Моавтың ады баксыраар ^k.
14 Силер хей черге: „Бис дидим бис!
Дайын-чаага күчүлүг дайынчылар бис!“– деп тур силер.
15 Моав хоозураар, ооң хоорайлары эжелеттирер,
эки дээн аныяк оолдарны өлүрер дээш аппаар – деп,
Аг-шериглиг Дээрги-Чаяакчы деп аттыг Хаан медеглээн ^l. –

16 Моавтың буураар үези чоокшулаан,
ооң айыыл-халавы кончуг дүрген чоокшулап орар.
17 Бүгү кожа чоннар, ооң адын билир бүгү улус,
ол дээш ыглап-сыктап: „Аа халак!
Күчү-күштүг, алдарлыг аймакты чылча шаап кагды!“– деп халактаңар.
18 Дивоннуң чурттакчылары ^m, алдар-хүндүлүг черден дүшкеш,
када берген черже олуруп алыңар –
Моавтың хоозурадыкчызы силерже кел чыдыр,
ол шивээлериңерни үреп бузуп каар.
19 Ароерниң чурттакчылары ⁿ, орук кыйыынга туруп алгаш, көрүңер,
дириг арткаш, дезип үнген улустан: „Чүү болду?“– деп айтырыңар.
20 Моавтың ады баксыраар, ону узуткап каар.
Ишкирнигип ыглап-сыктаңар,
Арнон хем эриинге Моавтың хоозураанын чарлаңар.

21 – 22 – 23 – 24 Оргулаашта хоорайларны – Халон, Иааца болгаш Мефаатты, Дивон, Нево болгаш Бет-Дивлатаимни, Кириатаим, Бет-Гамул болгаш Бет-Меонну, Кериот болгаш Восораны база моав черде ыракта-даа, чоокта-даа бүгү хоорайларны шиидер-дир. 25 Моавтың күчү-күжүн чок кылып каар, ооң эрге-чагыргазын дүжүрүп каар – деп, Дээрги-Чаяакчы медеглээн. –

26 Моавты эзиртир ижиртип калыңар ^o, чүге дээрге ол Дээрги-Чаяакчыга удур бодун өрү көрдүнүп турган-дыр! Моав кускузунга боражып чытсын ^p, улуска кочулатсын. 27 Сен Израиль дугайында кочуланып, бажыңны дорамчылалдыг чайып турдуң ^q, а ол туттургаш, бак атка кирген ооржу эвес-тир.

28 Моавтың чурттакчылары, хоорайларыңар кааптыңар,
хаялар аразынга чурттаңар!
Хая чарыктарынга уя тудар черлик көге-бугалар дег болуңар ^r».
29 Моавтың улуургааның дугайында, аажок турамыының дугайында,
ооң туразының улуунуң, улуургааның, идээргээниң дугайында,
ооң хөңнүнүң улуунуң дугайында дыңнаан бис ^s.

30 «Мен ооң бардамын билир мен – деп, Дээрги-Чаяакчы медеглээн. –
Ооң көөргеттинер чоруу хоозун меге-дир, ооң ажыл-херээ – меге-дир».

31 Ынчангаш Моавтың бүгү чону дээш ишкирнигип ыгладым;
Кир-Харешеттиң улузу дээш кажыыдап тур мен ^t.
32 Сивмада виноград шөлү, сен дээш ыглааным
Иазер дээш ^u ыглаанымдан качыгдалдыг-дыр.
Сээң виноградың сыптары далай ындынче,
Иазерге чедир чаттылып турган болгай.
Сээң чайгы чимизиңни, бышкан салбактарыңны
узуткакчы үзе тыртып тур.

33 «Дүжүткүр моав чер өөрүшкү, хөглел чок артар. Виноград арагазы бүдүрерин соксадыр мен. Кым-даа ыр-шоор-биле виноградын таптай баспас – олар өөрүшкүден эвес, а өске чылдагаан-биле алгыржыр. 34 Эсевондан Элеалеге чедир ыы-сыы дыңналып тур ^v, ында чурттаан улустуң алгы-кышкызы шуут-ла Иаацага чедир, Сигордан Хоронаимге чедир, Эглат-Шелишияга чедир дыңналып тур, чүге дээрге Нимримниң суу соглуп каар-дыр. 35 Мен Моавта бедик черлерге өргүлдер салган, дүрзү-бурганнарынга айдызаашкын кылган бүгү улусту узуткаар мен!» – деп, Дээрги-Чаяакчы медеглээн.

36 Ынчангаш мээң чүрээм Моав дээш шоор ышкаш ыглап тур! Кир-Харешеттиң чурттакчылары дээш мээң чүрээм шоор ышкаш ыглап тур, чүге дээрге оларның бүгү өнчү-хөреңгизи чок апарган-дыр. 37 Олар шупту муңгаралдан бажын дөңгүрертир таартып, салын чүлүп алган, холунга кезиглер кылып алган ^w, оларның белинде качыгдалдың самдар хеви орааттынган.

38 «Моавта бажың бүрүзүнде, кудумчу санында ыы-сыы дыңналыр. Чүге дээрге Мен Моавты херекчок сава дег чуура шаап каар мен ^x – деп, Дээрги-Чаяакчы медеглээн. – 39 Ол дээш улус ыглажып: „Моав чылча шаптырган-дыр! Аа халак! Моав бак атка кирип, дезипкен-дир!“– деп чугаалаар. Моав кочу-шоот бооп хуула бээр, бодунуң бүгү кожа чоннарынга коргунчуг үлегер апаар».

40 Дээрги-Чаяакчы мынча дээн:
«Эзир шүүргедеп ужуп үнер ^y,
ол Моавтың кырынга чалгыннарын хере сунар!
41 Моавтың хоорайлары эжелеттирер,
ооң шивээлерин дайзын чаалап аар.
Ол хүн Моавтың дайынчылары кортканындан,
божаан кадайлар дег, сириңейни бээр ^z.
42 Моав чон бүрүнү-биле узуткаттырар,
чүге дээрге ол Дээрги-Чаяакчының мурнунга бодун өрү көрдүнген-дир.
43 Моавтар, коргунчуг байдал, оңгар болгаш какпа-дузак –
силерни манап турар үлүг ол-дур ^aa – деп, Дээрги-Чаяакчы медеглээн. –
44 Коргунчуг байдалдан дескен кижи оңгарже кээп дүжер,
оңгардан үне берген кижи какпа-дузакка туттурар ^ab,
чүге дээрге Мен Моавка удур кеземче үези доктаадыр мен – деп, Дээрги-Чаяакчы медеглээн. –
45 Дескен улус Эсевоннуң ханазының адаанга, чилчии үстүп, доктаай бээр.
А Эсевондан от, Сигоннуң хоорайындан чалбыыш өөскүп үнгеш,
Моавтың кастыын ^ac, шуугакчыларның тейин өрттедир.
46 Моав, ат болур сен! Хамос бурганның чону узуткаттырар.
Сээң оглу-кызыңны дайзын тудуп алгаш баар ^ad.
47 Ынчалза-даа келир үеде Мен Моавтың чонунга эки чолду эгидер мен ^{▼▼ Азы: «Моавтың чонун туттуруушкундан дедир чандырар мен».}».
Дээрги-Чаяакчының медеглээн чүвези ол-дур ^af.

Моавка үндүрген шииткел мооң-биле төнген.