Jer 52 | TyvTUV | STEP | Седекия чээрби бир харлыында хааннап эгелээш, Иерусалимге чуртту он бир чыл чагырган. Ооң авазын Хамутал дээр турган, ол

‏ Jeremiah 52

Иерусалимниң эжелеттиргени

(4 Хаан. 24:18—25:21; 2 Чыл. 36:11-21)

1 Седекия чээрби бир харлыында хааннап эгелээш, Иерусалимге чуртту он бир чыл чагырган. Ооң авазын Хамутал дээр турган, ол – Ливна чурттуг Иеремияның уруу чүве-дир ^a. 2 Седекия Иоакимниң кылып турган бүгү чүвезин өттүнүп, Дээрги-Чаяакчының мурнунга бузут үүлгедип турган. 3 Ынчаарга Иерусалим биле Иудеяга болуп турган чүве Дээрги-Чаяакчыны килеңнедиптерге, Ол оларның чурттакчыларын Бодунуң мурнундан сывырыпкан.

Седекия Вавилоннуң хаанынга удур тура халаан ^b. 4 Седекияның чагыргазының тоску чылында, он айның онда Вавилоннуң хааны Навуходоносор бодунуң бүгү аг-шерии-биле Иерусалимге чедип келген. Олар хоорайны бүзээлээш, долгандыр бүзээлел чалдары тудуп алган ^c. 5 Бүзээлээшкин Седекия хаанның чагыргазының он бирги чылынга чедир үргүлчүлээн.

6 Хоорайга аш кедереп, чурттакчы чон чиир аъш-чем чок арткан. Ол чылдың дөрт айның тоста 7 халдейлер хоорайның ханазын деже шаапкан. Бүгү иудей дайынчылар дүне када хоорайдан ийи хана аразында, Хаан сесерлииниң чанында турар хаалга дамчыштыр үнгеш, Иордан шынаазынче баар орук-биле дезипкен. А халдейлер ол үеде хоорайны бүзээлеп алган турган. 8 Халдей шериг Седекия хаанны сүрүп чорупкаш, ону Иерихон ховуларынга чыпшыр четкен. Седекияның бүгү шерии ону каапкаш, тарадыр маңнажы берген. 9 Халдейлер хаанны тудуп алгаш, хамат черде Ривла хоорайда ^d Вавилоннуң хаанынче аппарганнар. Навуходоносор аңаа Седекияга шииткел үндүрген ^e. 10 Вавилоннуң хааны Седекияның оолдарын, ачазы көрүп турда, өлүргеш ^f, Иудеяның бүгү нояннарын Ривлага кыра шаап каан. 11 Оон Навуходоносор Седекияны согурарткаш, хүлер кинчи-биле бектеп каан. Вавилоннуң хааны ону Вавилонче аппаргаш ^g, ол өлгүжеге чедир кара-бажыңга суп келген.

12 Беш айның онда (ол болза Вавилоннуң хааны Навуходоносорнуң чагыргазының он тоску чылы турган чүве-дир) ^h Иерусалимче Вавилоннуң хаанының чоок дүжүметтериниң бирээзи, камгалакчы шериглер даргазы Навузардан ⁱ чедип келген. 13 Ол Дээрги-Чаяакчының өргээзин, хаанның ордузун, Иерусалимде бүгү бажыңнарны – улуг дээн бажыңнарны шуптузун өрттедипкен ^j. 14 Камгалакчы шериглер даргазы-биле кады келген халдей шериг Иерусалимни долгандыр бүгү ханаларны үреп бузуп каапкан ^k. 15 Камгалакчы шериглер даргазы Навузардан чамдык ядамыктарны, хоорайда дириг арткан улусту, а ол ышкаш Вавилоннуң хаанынга дүжүп берген улусту болгаш арткан ус-шевер улусту ^{▼▼ «Ус-шевер улусту» деп еврей сөстүң утказы эки билдинмес. Ооң болгу дег өске утказы мындыг: «Мөөң чонну».} тудуп алгаш барган. 16 Чүгле карачал улустуң чамдыызын камгалакчы шериглер даргазы Навузардан виноград биле тараа шөлдери ажаап болбаазырадыр кылдыр арттырып каан.

17 Халдейлер Дээрги-Чаяакчының өргээзинде хүлер адагаштарны, тергежигештерни, «далай» дээр хүлер чунар саваны ^m үрей соктап каапкаш, ол чүүлдерниң бүгү хүлерин Вавилонче аппарганнар ⁿ. 18 Олар оон ыңай хүл урар савалар, хүл-узарлар, кыскаштар, бижектер болгаш хымыштарны – Бурганга бараан болурда ажыглаар бүгү хүлер эт-херекселдерни алгаш барганнар ^o. 19 Камгалакчы шериглер даргазы бүгү алдын биле мөңгүннү: чунар савалар, хүүрекчигештер, кыскаштар, тавактар, хымыштар, чырыткылар, дашкалар болгаш аяктарны база алгаш барган. 20 Соломон хаанның Дээрги-Чаяакчының өргээзинге кылып кааны ийи адагаш, «далай» дээр чунар сава база ону тургузар он ийи хүлер буга болгаш тергежигештерге хамаарыштыр алырга, ол бүгү херекселдерни кылган хүлер деңзилеттинмес аар турган ^p. 21 Адагаштарның бирээзиниң-не бедии он сес кыры дурту ^q, долгандыр хемчээли он ийи кыры дурту турган. Оларның ишти хос, ханаларының кылыны – дөрт илиг. 22 Бир адагаштың-на кырында беш кыры дурту бедик хүлер капитель турган. Капительдиң даштыы талазын четки хевирлиг, хүлерден кылган гранат чимистерлиг каасталга шыпкан турган (ийиги адагашта база-ла ындыг гранаттарлыг каасталга бар). 23 Четки хевирлиг каасталганы долгандыр шупту чүс гранат турган, оларның тозан алдызы капительдиң даштындан көстүп турган.

24 Камгалакчы шериглер даргазы Бурганның дээди бараалгакчызы Серайяны ^r, ийиги бараалгакчы Софонияны ^s болгаш Бурганның өргээзинче кирер черниң үш таңныылын тудуп алгаш барган. 25 Оон ыңай хоорайдан ол дарга шериглер баштыңын, хаанның ам-даа хоорайга арткан турган чеди чоок дүжүмедин, чурттуң чонун шериг хүрээлеңинче киир бижиир хүлээлгелиг кол бижээчизин болгаш хоорайга турган алдан чурттакчыны тудуп алгаш барган. 26 Камгалакчы шериглер даргазы Навузардан оларны тудуп аппаргаш, Ривлада Вавилоннуң хаанынга чедире берген. 27 Вавилоннуң хааны ол бүгү улусту хамат черде Ривла хоорайга шаажылап өлүрүп каан, а Иудеяның чонун бодунуң черинден көжүрүп үндүрген.

28 Навуходоносорнуң тудуп аппарган улузу бо хире хөй болган:

ооң чагыргазының чедиги чылында – 3023 иудейни сүрүп аппарган ^t;

29 Навуходоносорнуң чагыргазының он сески чылында Иерусалимден 832 кижини сүрүп аппарган;

30 ооң чагыргазының чээрби үшкү чылында камгалакчы шериглер даргазы Навузардан 745 иудейни сүрүп аппарган. Бүгү туттурган улустуң саны 4600 кижи болган.

Иехонияны хостааны

(4 Хаан. 25:27-30)

31 Иудеяның хааны Иехонияны тудуп аппарган соонда ^u үжен чеди чыл эрткенде, Вавилоннуң хааны Эвил-Меродах ^v аңаа өршээл көргүскен. Эвил-Меродах бодунуң чагыргазының бирги чылында, он ийи айның чээрби беште Иехонияны кара-бажыңдан үндүргеш, 32 ооң-биле эп-найыралдыг чугаалашкаш, ол үеде Вавилонга турган бүгү өске хааннарга бодаарга, хүндүткелдиг черге олуртуп каан. 33 Иехония кара-бажыңга кедип турган хевин солуп каапкаш, амыдыралының төнчүзүнге чедир Эвил-Меродах хаан-биле кады чемненип келген. 34 Ол Вавилоннуң хаанындан доктаамал хандырылганы хүннүң-не, өлген хүнүнге чедир, арткан бүгү назынында ап турган.