Jer 8 | TyvTUV | STEP | Ол үе кээрге, Иудеяның хааннарының, нояннарының сөөктерин, Бурганның бараалгакчылары биле медээчилериниң сөөктерин, Иерусалимниң чурттакчыларының сөөктерин бужартадып, чевеглерден үндүр октаптар

‏ Jeremiah 8

1 Ол үе кээрге, Иудеяның хааннарының, нояннарының сөөктерин, Бурганның бараалгакчылары биле медээчилериниң сөөктерин, Иерусалимниң чурттакчыларының сөөктерин бужартадып, чевеглерден үндүр октаптар – деп, Дээрги-Чаяакчы медеглээн. – 2 Ол сөөктерни хүн биле айның адаанга, ол улустуң ынак чорааны, бараан болуп чорааны сылдыстарның бүгү аг-шерииниң мурнунга тарадыр октаптар. Олар ук чырымалдарга мөгейип, олардан айтыртынып, оларның мурнунга доңгая кээп дүжүп турган болгай! ^a Ол сөөктерни кым-даа чыгбас, орнукшутпас – черге өдек ышкаш артып каар ^b.

3 Шак ол бузуттуг аймактың дириг арткан улузунга өлүм амыдыралдан күзенчиг апаар! ^c Мээң оларны үндүр сывырыпканым чер бүрүзүнге, каяа-ла олар дириг артар болдур, ындыг болур» – деп, Аг-шериглиг Дээрги-Чаяакчы медеглээн.

Мерген угаан чок чон

4 «Бо улус-чонга мону чугаала. Дээрги-Чаяакчының чугаалаан чүвези бо-дур.

Кээп ушкан кижи көдүрлүрүн оралдашпас деп бе?
Аза берген кижи дедир эглип келбес деп бе?
5 А Иерусалимниң бо чону чүге үргүлчү соора баарыл?
Ол мегеден так туттунгаш, Бурганче эглиринден ойталаар-дыр.
6 Мен кичээнгейлиг, топтап дыңнап турдум,
ынчалза-даа шынын чугаалавайн бардылар.
Кым-даа бузут дээш буруузун билинмеди,
„Чүнү үүлгедип алганым ол?“диведи.
Кижи бүрүзү бодунуң оруу-биле,
чаа-дайын шөлүнче кушталган аът ышкаш, маңнаар-дыр.
7 Дээрде шилен безин ужуп чанып кээр үезин билир,
көге-буга, хараачыгай, дуруяа-даа үезинде ужуп кээр.
А Мээң чонум Дээрги-Чаяакчының дүрүмнерин билбес-тир ^d.
8 „Бис мерген угаанныг бис,
Дээрги-Чаяакчының хоойлузу бисте бар“деп канчап чугаалаар силер?
Ном-хоойлу тайылбырлакчыларының мегечи демир-үжүү
меге чүүл бижип турар ^e.
9 Мерген угаанныглар бак атка кирер,
олар коргуушкунга алзып, какпа-дузакка туттурар.
Дээрги-Чаяакчының сөзүн хүлээп көрбээн улус-тур,
оларның мерген угааны кайыл ынчаш?

10 Ынчангаш Мен оларның кадайларын өске кижилерге,
оларның шөлдерин – өске ээлерге бериптер мен ^f.
Олар шупту, улуу-даа, бичези-даа, чүгле ажык-кончаа сүрүп,
Бурганның медээчизинден эгелээш, Ооң бараалгакчызынга чедир
меге чүүл кылып чоруур-дур.
11 Олар „Амыр-тайбың, амыр-тайбың!“деп хоозун чүве чугаалап ^g,
Мээң күжүр чонумнуң балыгларын чиик көрүп, экиртир бодап турар,
а амыр-тайбың чок-тур!
12 Олар чүдек-бужар чүүлдер кылып турар,
ыядыр ужурлуг улус-тур,
ынчалза-даа ыядыр арын, эгенир сагыш оларда чок-тур ^h.
Ынчангаш олар аштырганнар аразынга кырлып каар,
Мээң кеземче көргүзүп кээр хүнүмде олар кээп дүжер» – деп, Дээрги-Чаяакчы чугаалаан ⁱ.

13 «Оларның дүжүдүн узуткаар мен – деп, Дээрги-Чаяакчы медеглээн. –
Виноград сывынга кат артпас, фига ыяжынга чимис турбас,
бүрүлер база кадып каар. Оларга берген бүгү чүвем куруглап каар ^j».

14 Саадап турган херээвис чүл?
Барып, быжыглаттынган хоорайларга чыылгаш, аңаа өлүмден манаалы!
Дээрги-Чаяакчы Бурганывыс бисти өлзүн дээн-дир,
биске хораннап каан суг ижирткен-дир ^k,
бис Ооң мурнунга бачыт үүлгеткен болгай бис.
15 Амыр-тайбың кээр боор деп идегеп турдувус,
ынчалза-даа ачылыг чүү-даа чок-тур,
экирииривисти манап турдувус,
ынчалза-даа коргунчуг хай-халаптар чедип келди ^l.
16 Дан хоорайдан ^{▼▼ Дан хоорай – Израильдиң соңгу кызыгаары.} аскырларның хөрээ киргирээни дыңналды,
дайзынның аъттарының киштээринден чер сириңейни берди! ⁿ
Дайзыннар кел чыдыр, олар черни, ында бар бүгү чүвени,
хоорайларны, ында чурттаан улус-чонну сыырыптар.

17 «Мен силерже хоранныг чыланнарны чорудуп тур мен ^o.
Оларны чагырар илбилиг сөстер чок,
олар силерни шагар эвеспе ^p» – деп, Дээрги-Чаяакчы медеглээн.

Иеремияның бодунуң чону дээш кажыыдааны

18 Ажыг-шүжүүм аргалаттынмас,
чүлдү-чүрээм саргып аарып турар.
19 Чурттуң бүгү булуңнарындан ^{▼▼ Азы: «Ырак чурттан».} мээң күжүр чонумнуң:
«Таанда-ла Сионда Дээрги-Чаяакчы чок бе,
таанда-ла ооң Хааны чок бе? ^r» – дээн кыйгызы дыңналып тур.

«Олар Мени чүге хары, чөгенчиг дүрзү-бурганнары-биле
килеңнедип алганыл? ^s»

20 Дүжүт ажаалдазы доозулган, чай эрткен,
а биске камгалал келбеди.
21 Мээң күжүр чонумнуң балыглары дээш хинчектенип чор мен! ^t
Дүмбей мени бүргеп алган, коргуушкун хөме апкан.
22 Таанда-ла Галаадта ^{▼▼ Галаад – Израильдиң чөөн чүгүнде девискээр. Аңаа онзагай эм-таң кылыр үнүштер үнүп турган.} эм чок чүве бе? ^v
Таанда-ла ында эмчи кижи чок чүве бе?
Ынчаарга мээң күжүр чонум чүге экирбейн турарыл?