‏ Jeremiah 9

1О, мээң бажым суг долган кудук апарган болза! Карактарымдан чаштар аттыгып үнүп турган болза! ^a
Күжүр чонумнуң өлүрткен улузунуң ажыын ажып,
дүне-хүндүс ыглаар ийик мен.
2Ээн кургаг ховуга хоргадап,
дүн чарар черлиг турган болзумза! ^b
Бодумнуң чонумну каапкаш, чоруй баар ийик мен.
Чүге дээрге олар шупту самыыраан улус-тур,
өскерликчилер ниитилели-дир!
3Оларның мегечи дылы кирижээн ча дег-дир ^c.
Олар чер кырынга шын эвес чүүл-биле күш кирип,
бир кемниг херекке улаштыр өскезин үүлгедип чоруур.

«Олар Мени билбес ^d – деп, Дээрги-Чаяакчы медеглээн. –
4Кижи бүрүзү бодунуң кожазындан кичээнзин, ха-дуңмаңарга бүзүревеңер ^e,
чүге дээрге ха-дуңма улус бот-боттарын кажарлаарын бодаар,
кожа кижилер хоп-чип дажыыр.
5Кижи бүрүзү бодунуң кожазын мегелээр,
кым-даа шынны чугаалавас,
аксы-дылын мегелеп чугаалаары-биле мергежидип алгаш,
бүгү күжүн бузутка берип турар.
6Кара сагыш аразында чурттап турар кижи-дир сен, Иеремия.
Оларның сагыжы кара болгаш,
Мени билип аарындан ойталаан» – деп, Дээрги-Чаяакчы медеглээн.

7Ынчангаш Аг-шериглиг Дээрги-Чаяакчы:
«Оларны эзилдирер, шенээр мен! ^f
Мээң күжүр чонум-биле оон өскээр канчаар деп мен?
8Оларның дылы – өлүмнүг согун,
оларның аксы-дылын кара сагыш долган.
Кожазы кижи-биле эп-найыралдыг чугаалажырлар ^g,
а чүрээнде аңаа какпа салып чыдарлар ^h.
9Таанда-да ол бүгү дээш оларны кезетпес мен бе?
Таанда-ла ындыг чондан өжээн негевес мен бе?» – деп медеглээн ⁱ.

10Дагларның ажыын ажып ыглап-сыктаар мен,
ховуларда одарлар дээш ишкирнигип ыглаар мен.
Чүге дээрге олар өрттенип калган-дыр ^j,
аңаа чорумалдар таварышпастаан-дыр,
сүрүг хойлар эдери дыңналбастаан-дыр.
Дээрниң куштары ужуп чоруй барган ^k,
хамык аң-мең тарадыр халчы берген.

11«Мен Иерусалимни бузундулар оваазы ^l,
шөө-бөрүлер чурттаар чер кылып каар мен,
Иудеяның хоорайларын хоозурадыр мен,
оларга чурттакчылар артпас ^m».

12Чүге бо чер өлүглени бергенил, чүге ээн кургаг хову дег өрттенгенил, чүге ында чорумалдар чогул? Бо бүгүнү билип шыдаар мерген угаанныг кижи бар бе? Дээрги-Чаяакчының чугаалаан сөзүн дамчыдып шыдаар кижи бар бе?

13Дээрги-Чаяакчы: «Мээң оларга доктаадып берген хоойлумну каапканы дээш, Мээң сөзүмнү тооп дыңнавааны, ооң аайынга кирбээни дээш, ол бүгү болган-дыр. 14Олар боттарының чөрүү чүректериниң аайынче кирип, Ваалдың дүрзүлеринге мөгейип турарлар, ол бүгүге ада-өгбезинден өөренип алганнар-дыр» – деп чугаалаан.

15Ынчангаш Аг-шериглиг Дээрги-Чаяакчы, Израильдиң Бурганы: «Мен бо чонну ажыг чашпан-биле чемгерер мен, оларга хоранныг суг ижиртир мен! ⁿ 16Оларны өске чоннар аразынга тоо быдарадыр мен ^o, а олар-даа, оларның ада-өгбези-даа ол чоннарны билбес чораан болгай. Оларны хылыш-биле сүрүп, төнчүзүнге чедир узуткаар мен ^p» – дээн.

17Аг-шериглиг Дээрги-Чаяакчы: «Боданыңар!
Ажыыңар ажып ыглажыр херээженнерни кыйгырар үе келди!
Олар чедип келзин! Эң-не мергежээннерин эккелдирип алыңар,
олар чедип келзин!» – деп чугаалаан ^q.

18Олар дүрген чедип келзин, бистиң ажыывыс ажып ыглашсын!
Бистиң карактарывыс чажы төгүлзүн, караавыс суу аттыгып үнзүн! ^r
19 Сион тейден: «Ат болдувус! Аажок бак атка кирдивис!
Черивисти каап чоруп тур бис, оран-сававыс бузулган-дыр» –
дээн ыы-сыы дыңналып тур.

20Дээрги-Чаяакчының сөзүн дыңнаңар, херээжен чон!
Силерниң кулааңар Ооң сөзүн тооп дыңназын.
Уругларыңарны ыглап-сыктап билир кылдыр өөредиңер,
бирээңер өскеңерни кажыыдап ыглаарынга өөредиңер.
21Соңга өттүр шивээлеривисче өлүм шургуп кирип тур,
ажы-төлдү кудумчуларга, аныяк оолдарны – шөлдерге
кыргып-хыдып тур.

22«Оларга мону чугаала. Дээрги-Чаяакчы:
„Кижилер мөчү-сөөктери шөлде өдек дег ^s,
тараа кезикчизиниң соонда арткан моожалар дег чыдып каар,
оларны ажаап чыыр кижи чок“– деп чугаалаан».

23Дээрги-Чаяакчы: «Мерген угаанныг кижи
мерген угааны-биле менээргенмезин ^t,
күш-шыдалдыг кижи күчү-күжү-биле чоргаарланмазын! – деп медеглээн. –
24Мактаныр бодаан кижи чүгле Мени танып,
билип алганы дээш мактанзын ^u.
Чүге дээрге Мен – энерелди боттандырып чоруур,
чер кырынга шын шииткел биле чөптүг-шынныг чорукту
боттандырып чоруур Дээрги-Чаяакчы-дыр мен,
Меңээ таарымчалыг чүүл ол-дур».

25«Үези кээрге, кыртыжадып демдектеттиргеш-даа, арыг эвес бооп арткан бүгү улусту Мен кезедир мен – деп, Дээрги-Чаяакчы медеглээн. – 26Египет биле Иудеяның чоннарын, эдом, аммон, моав чоннарны, ээн кургаг ховуда чурттап чоруур, кастыының дүгүн чүлүүр ёзу-чаңчылдыг улусту ^v кезедир мен. Чоннар шупту херек кырында кыртыжадып демдектеттирбээн-дир, бүгү израиль чоннуң чүрээ база бужар-багындан арыглаттынмаан-дыр ^w».