Job 1 | TyvTUV | STEP | Уц деп черге Иов дээр кижи чурттап чораан . Ол болза кем-буруу чок, чөптүг, Бургандан коргар болгаш бачыттан хая көрнүп чоруур кижи турган .

‏ Job 1

Иов – Бургандан коргар, чөптүг кижи

1 Уц деп черге ^a Иов дээр кижи чурттап чораан ^b. Ол болза кем-буруу чок, чөптүг, Бургандан коргар болгаш бачыттан хая көрнүп чоруур кижи турган ^c. 2 Иов чеди оол биле үш кыстың адазы турган. 3 Ол 7000 өшкү-хой, 3000 теве, 500 эжеш шары болгаш 500 кыс элчиген кошкул малдыг, дыка хөй санныг чалча-хөделдиг кижи чүве-дир. Чөөн чүктүң бүгү аймактарының ^d аразында Иов эң ат-алдарлыг кижи турган.

4 Ооң оолдары ээлчег аайы-биле бот-боттарының бажыңнарынга найырлап-дойлаар дээш чыглыр, олар-биле кады дойлазын дээш кыс дуңмаларын база кыйгырып аар чаңчылдыг чүве-дир. 5 Дойлаашкын үези эрте берген санында-ла, Иов оолдарын келдиртип алгаш, оларны ыдыктап-арыглап турган ^e. «Мээң оолдарым бачыт үүлгедип, боттарының сеткил-чүрээнде Бурганны бак сөглепкен бооп чадавас» деп бодап, Иов эртен эрте тургаш, оларның саны-биле бүрүн өрттедир өргүлдер салып турган ^f. Ол ынчаар үргүлчү кылып келген.

Буруудадыкчының Иовту нүгүлдээни

6 Бир-ле хүн Дээрги-Бурган-Чаяакчының оолдары ^{▼▼ Бурганның оолдары – «Дээрниң чурттакчылары» дээни ол (Э. д. 6:2; Ыд. ыр. 88:7 көр).} Ооң мурнунга турар дээш чедип келген ^h, оларның аразынга буруудадыкчы ^{▼▼ Азы: «Удурланыкчы эрлик» (1 Чыл. 21:1; Зах. 3:1; Ажыд. 12:9-10 көр).} турган. 7 Дээрги-Чаяакчы оон: «Сен кайыын келдиң?» – деп айтырган.

Буруудадыкчы: «Мен чер-делегейни эргип кезип чордум» – деп харыылаан ^j.

8 Дээрги-Чаяакчы буруудадыкчыга: «Мээң чалчам Иовту эскердиң бе? Чер кырында өске ындыг кижи чок – ол кем-буруу чок, чөптүг, Бургандан коргар болгаш бачыттан хая көрнүп чоруур кижи чүве» – дээн.

9 Буруудадыкчы Дээрги-Чаяакчыга: «Иов Бургандан хей черге коргар деп бе? 10 Сен ооң бодун, өг-бүлезин база кошкул-хөреңгизин бүгү талазындан камгалап турбаан сен бе? Ооң холунуң ажыл-херээнге ачы-буян хайырлаан сен ^k, ооң кодан-кодан малдары чер кырында өзүп-көвүдеп-ле турар-дыр. 11 Ынчалза-даа ооң бар-ла кошкул-хөреңгизинге Бодуңнуң холуң-биле дээптер болзуңза ^l, ол Сени арныңга албан бак сөглээр» – дээн.

12 Дээрги-Чаяакчы буруудадыкчыга: «Ындыг бе? Ооң бар-ла кошкул-хөреңгизи сээң холуңче кирзин. Чүгле ооң бодунга дегбе» – дээн.

Буруудадыкчы Дээрги-Чаяакчыдан ыңай чорупкан.

13 Бир-ле хүн, Иовтуң оолдар, кыстары улуг акызының бажыңынга найырлап-дойлап, арага-дары чооглап турда, 14 Иовка шапкынчы кижи келгеш: «Шарылар чер аңдарып турду, а элчигеннер чанынга оъттап турду. 15 Хенертен Шева чурттуглар ^m халдап келгеш, оларны сүрүп аппарды, а силерниң ажылчыннарыңарны хылыш-биле кыра шанчып каапты. Силерге дыңнадып болур чаңгыс мен дириг арттым!» – дээн.

16 Ол төндүр чугаалаваанда-ла, өске шапкынчы чедип келгеш: «Бурганның оду дээрден баткаш ⁿ, өшкү-хой болгаш ажылчыннарыңарны өрттедип каапты. Силерге дыңнадып болур чаңгыс мен дириг арттым!» – дээн.

17 Ол төндүр чугаалаваанда-ла, база бир кижи чедип келгеш: «Халдей аймактан үш бөлүк халдап ^o, тевелерже хөме келгеш, оларны сүрүп аппарды, а ажылчыннарыңарны хылыш-биле кыра шанчып кагды. Силерге дыңнадып болур чаңгыс мен дириг арттым» – дээн.

18 Ол төндүр чугаалаваанда-ла, оон өске кижи чедип келгеш: «Силерниң оолдар, кыстарыңар улуг акызының бажыңынга найырлап-дойлап, арага-дары чооглап турда, 19 ээн кургаг ховудан коргунчуг шуурган хадып келгеш, ол бажыңның дөрт азыын силгиптерге, бажың аныяктар кырынче кээп дүштү, олар өлүп калды. Силерге дыңнадып болур чаңгыс мен дириг арттым» – дээн.

20 Иов ынчан туруп келгеш, качыгдалдан хевин ора тыртып ^p, бажын чүлүп каапкаш, черже кээп дүжүп, Бурганга мөгейген. 21 Ол мынча дээн: «Иемниң иштинден делегейже чанагаш үнүп келген мен, чер-иемче дедир чанагаш кире бээр мен ^q. Дээрги-Чаяакчы берген-дир, Дээрги-Чаяакчы дедир ап алган-дыр, Ооң ады алгаг-йөрээлдиг болзун ^r!»

22 Ол бүгү болуп турза-даа, Иов черле бачыт үүлгетпээн, Бурган дугайында багай чүве чугаалаваан.