‏ Job 10

Бурганның Иовка амыр-дыш көргүспестээни

1«Чуртталгам меңээ ческинчиг апарды ^a, хомудалымны хосталгаже салыптайн,
качыгдаан сеткилимден ажыы-биле чугаалаайн.
2Бурганга чугаалаайн: мени буруулуг дивейн көр.
Мээң-биле чүге чаргылдажып турарыңны тайылбырлам ^b.
3Холуңнуң чаяалгазын кызагдап, бак көөрү,
бузуттугларның бодалдарын чүүлдүгзүнери Сеңээ тааржыр-дыр бе?
4Сээң карактарың – өлүр салымныг кижилернии дег бе,
оларның көөрү дег кылдыр көөр-дүр сен бе? ^c
5Сээң хүннериң кижи амытанның хүннери дег бе,
Сээң чылдарың – бөдүүн кижинии дег бе?
6Чүге Сен мээң буруумну дилеп тып тур сен,
бачыдымны илерекседип тур сен?
7Буруу чогум Сеңээ билдингир болгай ^d.
Мени кым-даа Сээң холуңдан камгалап шыдаар эвес ^e.

8Сээң холдарың мени хевирлеп, бүрүнү-биле кылып каан ^f,
а ам мени узуткаар деп тур сен бе?
9Сактып келем, Сен мени дойдан тудуп турдуң,
а ам довурак-доозунче эгидериң ол бе? ^g
10Сен мени иемниң иштинге ботталып турумда ^h, сүт дег төпкеш,
оон ээжегей ышкаш хоюдуп каан сен;
11эът, кешти меңээ кедирип,
сөөктер, сиирлер-биле тудуштуруп каан сен.
12Амыдырал биле энерелди меңээ хайырлааш,
сагыш човаашкының-биле амы-тынымны камгалап келдиң.

13А Сээң чүрээңге өске чүүл чаштып турган,
Сээң чүнү бодап турганыңны билир мен.
14Бачыт үүлгетсимзе, Сен мени истеп тывар сен,
кем-буруум дээш кеземче чок арттырбас сен.
15Буруулуг болзумза, ат болур мен!
Актыг-даа болзумза, бажым көдүрүп шыдавас мен:
мээң адым шуут баксырап кагды,
хилинчек менче сиңе берди ▼

▼ Азы: «Мээң хилинчээмче көрүп көр».

.
16Бажым көдүрүп кээримге-ле ▼

▼ Азы: «Хилинчээм өзүп-көвүдеп тур».

,
арзылаң дег халдап кээр-дир сен,
коргунчуг күжүң-биле катап-катап мени согар-дыр сен.
17Меңээ удур херечилелди катап-катап кылып,
килеңиңни меңээ удур улам-на күштелдирип,
чаа-чаа аг-шеригни меңээ удур көдүрүп-ле тур сен ^k.

18Сен мени чүге иемниң иштинден ужулдуң?
Ол үеде өлү бээрим кай, мени кым-даа көрбес ийик ^l;
19кажан-даа чурттаваан боорум кай,
иемниң иштинден-не чевегже аппарып кааптары кай!
20Мээң кыска назыным ^m төнер четкен-дир.
Мени каапкаш барам ⁿ, сеткилим бичии-даа болза өөрүзүн –
21– 22караңгы кара, өлүмнүң хөлегези бүргээн,
дүмбей караңгы оранче ^o, аайлаттынмаан черже
эглиш чок чоруур бетинде өөрүзүн ^p».