Job 12 | TyvTUV | STEP | Иов мынча деп харыылаан:

‏ Job 12

Иовтуң чугаазы: мерген угаан биле күчү-күш – Бурганда

1 Иов мынча деп харыылаан:

2 «Силер чок болзуңарза, мерген угаан турбас,
ындыг кончуг кижилер-дир силер!
3 А менде база, силерде дег, угаан бар,
силерден чүм-биле-даа дорайтаваан мен.
Силерниң чугаалап турар бүгү чүвеңерни кым билбезил!
4 Ооң мурнунда Бурганны кыйгырарымга,
Ол харыылап-даа турган болза ^a,
мен ам эш-өөрүмге кочу-шоот апардым ^b,
мен, актыг, кем-буруу чок кижи,
кочу-шоотка кирдим.
5 Амыр-шөлээн улус айыылга таварышканнарны бодалында бак көөр,
быжыг туруштуг улус тендиш дээннерни кыжырыыр ^{▼▼ Бо шүлүктүң утказы эки билдинмес. Болгу дег өске утказы мындыг: «Амыр-шөлээн улус чырыткыже бодалында сагыш салбас, а ону тендиш деп турарларга белеткеп каан».}.
6 А дээрбечилерниң аалдары амыр-менди,
Бурганны килеңнедип турарлар тайбың чуртталгалыг –
Ооң холу оларны камгалап турар ^d.

7 Дириг амытаннардан айтыр – тайылбырлап бээрлер,
дээрниң куштары сеңээ чугаалап бээр;
8 черден билип ал – ол тайылбырлап бээр,
далайның балыктары сеңээ медээлеп бээр.
9 Дээрги-Чаяакчының холу ынчалдыр кылып каанын
оларның кайызы билбезил?
10 Ооң холунда – бүгү дириг амытанның тыны,
кижи бүрүзүнүң тыныжы ^e.
11 Дылдың аъш-чем амданын шенээри дег,
кулак сөстерни ылгап дыңнап турар эвес бе? ^f

12 Мерген угаан – кырганнарда бе,
узун назын угаан-сарыылга чедирер бе? ^g
13 Мерген угаан биле күчү-күш – Бурганда,
арга-сүме биле угаан-сарыыл – Бурганда!
14 Ооң үреп каан чүвези катап тургустунмас ^h.
Ооң хоругдап каан кижизи хосталып шыдавас ⁱ.
15 Ол сугларны тырттылдырыптарга, соглуп каарлар,
а аксыптарга, чер кырын хөме аптарлар.
16 Күчү-күш, мерген угаан Ооң-биле кээр,
мегечи-даа, мегелеттирген-даа кижи Ооң эргезинде.
17 Ол дээди дүжүметтерни бодал чок кылып ^{▼▼ Азы: «Үптеттиреринче албадап».},
черниң шииткекчилерин – мелегей улус кылып каар ^k;
18 хааннарның эрге-дужаалын дүжүрүп ^l,
оларның белин чалчаның союндаа-биле шарып каар;
19 Бурганның бараалгакчыларын бодал чок кылып*,
шыдалдыг улусту чыттыр шааптар;
20 бүзүрелдиг улустуң чугаазы үнмес кылып,
ирейлерниң угаанын ышкындырып каар;
21 ызыгууртаннарны бак ат-биле бүргеп ^m,
күчүлүг улустуң курун чежип, кошкадып каар.

22 Бурган дүмбейниң ханызын ажыдып,
караңгыны чырыкче үндүрүп турар ⁿ;
23 чоннарны көвүдедип ^o база чок кылып,
аймактарны тарадыр көжүрүп база бөлүп турар;
24 чоннуң баштыңнарының угаанын баларадып,
орук-чирик чок, ээн черге азып-тояарынче албадап турар ^p.
25 Оларны караңгыда, чырык чокта суйбандырып чорудуп ^q,
эзирик улус дег, тендиңейндир кылаштадыр ^r».