‏ Job 14

Өлүм бүгү улусту дүрген сүрүп чедер

1«О, херээженден төрүттүнген кижи! ^a Ооң назыны кыска, качыгдал-биле пөккен болур ^b.
2Чечек ышкаш частып келгеш, оңуп каар,
хөлеге ышкаш ыңай болгаш, чиде хона бээр ^c.
3Сен ындыг кижиже топтап көрүп тур сен бе?
Сен мээң-биле чаргылдажыр деп тур сен бе?!
4 Арыг эвес чүүлден арыг чүүлдү кым боттандырарыл? ^d
Кым-даа эвес!
5Кижиниң назынын доктаадып каан-дыр,
Сен ооң чурттаар айларын санап кааш,
ооң ажа баспас кызыгаарын салып каан болганыңда,
6көрүжүңнү оон чайладып ^e, аңаа дыштан хайырла,
хөлечик дег, ол бодунуң ажыл хүнүн төндүрзүн ^f.

7Ыяшка безин идегел турар болгай:
ону ужуруп-даа каарга, ол дирлип кээр,
чаш өзүмнер катап үнүп кээр.
8Чер иштинге ооң дазылдары кырып калган,
төжээ довурак-биле шыптынып, өлү берген-даа болза,
9сугнуң амданын апкаш, ол ногаарарып,
чаа тараан ыяш дег, будукталып эгелээр.
10А кижи өлүп каарга, күжү ону кааптар,
ооң тыны үстүп каарга, ол ам кайдал?
11Хөлдүң суунуң тырттына бээри дег,
хемниң соглуп, кургап каары дег ^g,
12кижи база чыдыпканда, туруп келбес,
дээрлер чиде бербээн шаанда ^h, одунмас –
уйгузу сергеп, тура халывас.
13О, Сен мени өлүглер оранынче дүжүрүпкеш ⁱ,
Сээң килеңиң соксагыже, чажырып турган болзуңза!
Оон мени сактып кээр хуусааңны
доктаадып каан болзуңза!
14Өлген кижи дирлип кээр бе? ^j
Күш-ажыл албанының бүгү хүннеринде ^k
дыштаныр үемни манаар ийик мен.
15Сен ынчан кыйгырар ийик сен, а мен харыылаар ийик мен ^l,
чүге дээрге Бодуңнуң чаяалгаңны чоктаар сен.
16Сен ынчан мээң базымнарымны санаар ийик сен ^m,
а бачыттарымны истеп тыварын соксадыр ийик сен.
17Мээң кем-буруумну дүрүп шыгжап, таңмалап,
үүлгеткен херектеримни дуглай чугайлап каар ийик сен.

18Ынчалза-даа дагның үүрмектелип, бустуру дег,
хаяның туружундан шимчеп-чылары дег,
19сугнуң даштарны чуй шаап, үрээри дег,
үерлээш, хөрзүннү арыда шавары дег,
кижи амытанның идегелин Сен ынчаар узуткаар-дыр сен.
20Сен ону төнчүзүнге чедир кызагдаар сен, ол чоруй баар;
ооң арын-шырайын өскерткеш, ыңай чорудуптар сен.
21Ажы-төлүнүң хүндүледип чоруурун-даа ол кижи билбес ⁿ,
оларны хомудадып-даа турар болза, ол эскербес.
22Чүгле ооң мага-бодун бодунуң аарышкызы хинчектээр,
ооң сеткили боду дээш качыгдаар».