‏ Job 16

Иовтуң чугаазы: Бурган-даа, кижилер-даа менден хая көрнү берген

1Иов мынча деп харыылаан:

2«Мен ол ышкаш чүүлдү хөйү-биле дыңнаан мен;
силер шупту аргалал эвес, човалаң эккелдиңер!
3Хоозун чугааның төнчүзү бар бе? ^a
Ынчаар харыылаарынче сени чүү албадап тур?
4Силер мээң орнумга турган болзуңарза,
мен база силер ышкаш чугаалаар ийик мен –
силерге удур чалчырап,
бажымны чемелелдиг чаяр ийик мен;
5силерни аксы-сөзүм-биле „быжыктырып“,
эрним шимчеткеним-биле „аргалаар“ийик мен.

6Чугааланырымга-даа, аарышкым намдавас,
ыыттавазымга-даа, оожургавас.
7Бурган мээң чилчиимни шуут үстү,
чоок кижилеримни чок кылып каапты ^b.
8Меңээ удур херечилел кылдыр Ооң холу мени тудуп алган,
арып баксырааным база меңээ удур херечи бооп,
мени арнымга чемелеп тур.
9Дайзыным менче кезе кайгап тур,
Ол килеңнеп, өжээргээш, мени үзерлеп-чазарлап,
диштерин менче кыжырадып тур ^c.
10Улус мени чидиг дылы-биле дорамчылап тур ^d,
базымчалап, чаагымче дажып тур ^e,
меңээ удур шупту каттыжып алдылар.
11Бурган мени бак улуска хүлээдип берген,
бузуттугларның холунче киир октапкан.
12Мен дүвүрел чок турдум, а Ол мени чуура шаапкан,
мойнумдан сегирип алгаш, буза шаап,
Бодунуң согуннарынга кара кылдыр тургузуп алган ^f.
13Ооң согуннары кайыын-даа ужуп кээп тур;
Ол мээң бүүректеримни кээргел чок өттүр адып,
өдүмнү черже төп тур ^g;
14күштүг дайынчы дег, менче хөме халдап,
улай-улай балыглап-ла тур.

15Мен качыгдалдың хевин кедип алдым,
алдар-адым довуракка боражып чыдыр.
16Ыы-сыыдан арным кыза берди,
карактарымны дүмбей дуглап тур.
17А мээң холдарым шын эвес чорук кылбаан,
мээң мөргүлүм арыг!

18О, чер, мээң ханымны чажырба,
мээң алгы-кышкым уттундуруп, чиде бербезин!
19А ам безин дээрде мээң Херечим бар ^h,
Ол меңээ өрүтен болчуп кээр.
20Эш-өөрүм мени кочулап тур,
а караам чажы Бурганның мурнунда аккан.
21Ийи кижи аразында херекти дег,
Бурган биле кижиниң аразында чаргыны чарып болур турган болза!
22Санныг чылдарым эрте бээр болгай,
эглип келбес орукче чоруй баар мен».