‏ Job 20

Софарның чугаазы: бак кижиге Бургандан кандыг үүле-салым кээрил

1Наама чурттуг Софар ^a мынча деп харыылаан:

2«Дүвүренчиг бодалдарым харыыла деп албадап тур,
хөлзээшкиним мени амыратпастады.
3Мени дора көрген чемелелди дыңнап тур мен –
угаан-сарыылым мени харыыла деп тур.

4Шаг шаандан бээр, Бурган чер кырынга
кижини чурттадып каандан бээр ^b
кандыг турганын билбес эвес сен –
5бузуттуг-бак кижиниң хөглээшкини үр болбас,
Бурганны тоовас кижиниң өөрүшкүзү бичии када болур.
6Ооң улуургаа кудай-дээрге чедер-даа болза,
ол бажы-биле булуттарга үзер-даа болза ^c,
7бодунуң мыяа ышкаш, кезээ мөңгеде чиде бээр ^d,
ооң мурнунда ону көрген улус: „Ол кайыл?“дижир.
8Дүш ышкаш, ол ужуп чоруй баргаш, тывылбас,
дүнеки көстүүшкүн дег, чиде бээр ^e;
9ону көрүп турган кижи оон ыңай көрбес,
чурттаан чери база ону оон ыңай көрбес ^f.
10Ооң ажы-төлү ядыылар мурнунга чашпаалаар,
ол бодунуң холу-биле чыып алган байлаан эгидип бээр.
11Мага-бодунда сиңген аныяк күш-шыдалы
ооң-биле кады довуракче хөмдүне бээр.

12Бузут ындыг кижиниң аксынга амданныг,
ол ону дылының адаанга чажырып аар ^g,
13ону камнап, үндүр октавайн,
аксының иштинге кадагалаар болза,
14ындыг аъш-чем ооң иштинге
чылан хораны бооп хуула бээр.
15Ол сыырыпкан байлаан кузуптар –
Бурган ону ооң иштинден ушта соп аар.
16Ол чылан хораны сорар,
чыланның дылы ону өлүр шап каар.
17Ол эки чүүлдерни – агым сугларны,
ары чигири биле сүт аккан хемнерни көрбес.
18Байып алган чүвезин ол амзавайн эгидип бээр,
садыглаашкындан алган олча-ажыы ону өөртпес.
19Чүге дээрге ядамыктарны дарлаар, каапкаш баар,
бодунуң тутпааны бажыңнарны ээлеп аар турган-дыр.

20Бак кижиниң хырны тодарын билбес,
алыксак-чиксээ кызыгаар билбес ▼

▼ Азы: «Бай-байлаа ону камгалавас».

.
21Ооң чазый аксындан кым-даа камгаланып шыдаваан,
ынчангаш ооң аас-кежии уламчылавас.
22Бай-шыдалдыг чурттап олурда, ону айыыл-халап таварыыр,
хомудалдыг бүгү улустуң холу олче көдүрлүр ▼

▼ Азы: «Хай-халаптың бүгү күжү олче хөме кээр».

.
23Ол хырнын долдур дыгып аарга,
Бурган Бодунуң кыптыккан килеңин олче ыдар,
ооң мага-бодунче согуушкунун чайык дег кудар.
24Бир эвес ол демир хылыштан дезе бээр-даа болза,
хүлер согун олче кадалыр;
25согун ооң ооргазындан үнүп кээр,
кылаңайнып, өдүнүң хавын өде бээр ^j –
ынчан ону коргуушкуннар хөме аптар!
26Дүмбей караңгы чаштып алгаш, ону манап турар,
ону кижи холу кывыспаан от чиптер ^k,
ооң аалында арткан бүгү чүвени өрттедиптер.
27Дээр ооң кем-буруузун ажыдыптар,
чер аңаа удур херечилээр.
28Ооң бажыңында бүгү байлаан хунаап аппаар,
Бурганның килеңиниң хүнүнде ол байлак чиде бээр.

29Бузуттуг-бак кижиге Бургандан келген үүле-салым ^l,
Ооң доктаатканы үлүг ол-дур!»