‏ Job 21

Иовтуң чугаазы: Бурган бузуттугларны кезетпейн турар

1Иов мынча деп харыылаан:

2«Мээң сөстеримни кичээнгейлиг дыңнаңар,
оода ооң-биле хөңнүм чазаңар.
3Чугаалап турумда, шыдажып көрүңер,
а ыыттавайн баарымга, кочулап болур силер ^a.
4Мен кижиге хомудап тур мен бе?
Менде хорадаар чылдак чок бе?
5Менче көргеш, аңгадай бериңер,
холуңар-биле аксыңар дуглап алыңар ^b.

6Мону бодап келгеш-ле, сеткилим хөлзээр-дир,
мага-бодум сириңейнип эгелээр-дир:
7бузуттуг-бак улус чүге үр чурттаарыл,
кыраан тудум, оларның күш-шыдалы чүге улгадырыл? ^c
8Ажы-төлү олардан чарылбас,
үре-салгалын көрүп чоруурлар.
9Оларның аалдарынче коргунчуг айыыл халдавас,
Бурган мергези-биле оларга кыжанмайн турар.
10Бугалары инектерни боозадыптарга,
шупту чаш төлдүг болур, кайызы-даа ара салбас.
11Бузуттугларның ажы-төлү, хураганнар дег,
хөглүг чүгүржүп ойнаар,
чаш уруглары самнап шурап турар;
12хөгжүм херекселдеринге үдеткеш, ырлажып,
ойнап-хөглеп турарлар.
13Ол улус чуртталгазын аас-кежиктиг эрттирип,
өлүглер оранынче сагыш амыр кирип турар.
14А Бурганга олар: „Ыңай бар! ^d
Сээң оруктарыңны билип аар хөңнүвүс чогул.
15Бурган деп кымыл ол, чүге Аңаа бараан болур бис,
Аңаа мөргээн ажыы чүл?“– дижир-дир ^e.
16Олар боттары аас-кежиин эдилеп турар эвес бе? ▼

▼ Азы: «Ынчалза-даа оларның аас-кежии боттарындан хамаарышпас».

Бузуттугларның бодалдары менден ырап чорзун! ^g

17Ындыгларның чырыткызы болганчок өжүп турар бе? ^h
Айыыл-халап оларны удаа-дараа таварыыр бе?
Бурган килеңнээш, оларны хилинчекке чыгаар бе?
18Олар хатка сывыртаткан тараа саваңы дег,
казыргыга тарай шаптырган тараа дүгү дег бе? ⁱ
19Бурган кеземчени оларның үре-салгалынга арттырып каан бе? ^j
Бузуттугнуң бодун Ол кезеткен болза! – демгизи ону билип алзын;
20өлүмүн бодунуң караа-биле көрүп кагзын,
Күчүлүг Бурганның килеңин аас дизин ^k.
21Чүге дээрге кижи өлген соонда,
ооң чуртталгазының хуусаазы төнүп каарга,
ук-салгалынче сагыш салыр эвес.

22Бурганны канчап билигге өөредирил ^l,
Ол дээди күштерни-даа шиидер-дир ^m.
23Бир кижи күш-шыдалы четчип-бышкан үезинде
амыр-шөлээн, сеткили ханган өлүп каар;
24ооң мага-боду улуг-чаагай,
мөчү-сөөгүн чилиг долган.
25А өске кижи сагыш-сеткили качыгдап,
аас-кежик амзап көрбейн өлүп каар.
26Олар ийилээн черге чыдып аар,
курттар ийилдирзинге чыпшына бээр.

27Чүнү бодап турарыңарны-даа,
меңээ удур оптуг аргаңарны-даа билир мен.
28Силер: „Ноянның оран-савазы ам кайыл,
бузуттуглар чурттап турган бажың кайыл?“– дээр-дир силер.
29Аян-чорукчулардан айтырбааныңар ол бе,
оларның херечилээнин дыңнавааныңар ол бе:
30бузуттуг кижи айыыл-халап хүнүнде дириг-менди артар ⁿ,
Бурганның килеңиниң хүнү ону оюп эрте бээр!
31Кым ындыг кижиге шынны дорту-биле чугаалаарыл,
ооң үүлгеткен херектери дээш кеземче онаарыл? ^o
32Ону хүндүткел-биле аппарып ажаагаш,
чевээнге таңныыл тургузуп каар-дыр.
33Хөөрнүң довураа аңаа чымчак кавай болур,
мөөң чон ооң соондан эдерип чоруур,
ооң мурнунда бар чыдарлар эмге-тикчок.

34Ынчаарга хоозун аргалалыңарның меңээ херээ чүл?
Харыы сөстериңер бүрүнү-биле меге-дир!»