Job 22 | TyvTUV | STEP | Теман чурттуг Элифаз мынча деп харыылаан:

‏ Job 22

Элифазтың чугаазы: Иовтуң буруузу аажок улуг

1 Теман чурттуг Элифаз ^a мынча деп харыылаан:

2 «Бурганга кижиниң ажыы бар бе?
Эң угаанныг кижи безин Аңаа кандыг дузалыгыл? ^{▼▼ Азы: «Кижиниң угаанныы чүгле бодунга дузалыг».}
3 Сээң чөптүг-шынныг чорууңдан Бурганга кандыг өөрүшкү турарыл? ^c
Оруктарың кем-буруу чогу Аңаа ажыктыг бе?

4 Бурган сени Оон коргарың дээш чемелээр бе,
сээң-биле ол дээш чаргылдажыр бе?
5 Ындыг эвес! Сээң бузут-багың аажок улуг-дур,
кемниг херектериң төнчү чогу ол-дур.
6 Ха-дуңмаңдан долааны хереглевейн-даа тургаш, негеп ^d,
улустуң эң сөөлгү хевин уштуп ап турдуң;
7 кагып-суксаан кижиге суг ижиртпедиң,
аштаан кижиге аъш-чем бээринден ойталадың ^e.
8 Черни күш-шыдалдыг кижи ээлеп алган-дыр!
Ында хүндүткелдиг кижи чурттап турар-дыр! ^{▼▼ Азы: «Черни күш-шыдалдыг улуска үлеп бердиң, аңаа хүндүткелдиг улусту чурттадып кагдың».}
9 Дулгуяк херээженнерни хол куруг чорудуп,
өскүстерни дарлап турдуң ^g.

10 Ынчангаш Бурган сени долгандыр какпа-дузак салып каан ^h,
хенертен келген коргуушкун сени девидеткен;
11 карактарың караңгы дуглап,
элбек суглар сени хөме апкан ⁱ.

12 Бурган бедик дээрде чурттап турар эвес бе?
Сылдыстарже көрүп көр, оларның бедиин! ^j
13 А сен: „Бурган чүнү билирил? ^k
Дүмбей өттүр Ол улусту шиидип шыдаар бе?
14 Булуттар Ону чажырып алган, Ол бисти көрбейн,
чүгле дээрниң дээвиирин кырлап чоруп турар-дыр“– дээр-дир сен.
15 Таанда-ла сен бузуттуг-бак улустуң изеп кааны
эрте-бурунгу орукту истевишаан сен бе?
16 Олар өйү келбээнде узуткаттырып алган ^l,
оларны шапкын агым аппарган болгай.
17 Олар Бурганга: „Ыңай бар! ^m
Бурган бисти канчаптарыл? ^{▼▼ Өске бурунгу сөзүглелде «А Бурган оларны канчап турарыл?» деп бижээн.}“– деп турган.
18 А Бурган оларның бажыңнарын эт-хөреңги-биле долдуруп турган.
Бузуттугларның бодалдары менден ырап чорзун! ^o

19 Чөптүг-шынныг улус оларның буураанын көргеш, өөрүүр,
кем-буруу чок кижи оларны кыжырып ^p:
20 „Бистиң дайзыннарывыс кырдырып алды.
От оларның эт-хөреңгизин артынчы чокка чипти!“– дижир.

21 Бурган-биле эптежип ал – тайбыңчыыр сен,
ачы-буян сеңээ ынчан чедип кээр.
22 Ооң аксындан үнген сургаалды хүлээп ал ^q,
Ооң сөстерин чүрээңге кадагала.
23 Күчүлүг Бурганче эглип келзиңзе, чедиишкинниг болур сен;
чүгле аалыңдан бузут-бакты үндүр сывырывыт ^r,
24 алдынны довурак деп сана,
Офирниң арыг алдынын хем сайы деп сана; ^s
25 Күчүлүг Бурган сээң алдының апарзын,
Ол сеңээ кылаңнааш мөңгүн апарзын –
26 ынчан Күчүлүг Бурганга хамааржырың дээш таалал алыр сен ^t,
Ооң мурнунга арыг арын-нүүрлүг туруп шыдаар сен;
27 Сээң мөргүлүңнү Ол дыңнап каар,
а сен даңгырактарың күүседир сен ^u;
28 канчалдыр бодап алган сен, ынчалдыр боттаныр,
сээң орууңга чырык чырып кээр ^v.
29 Базындырган кижи турар болза, „Көдүрүп көрем!“дээриңге,
куду көрдүрген улусту Ол камгалаар.
30 Буруулуг кижини безин Бурган камгалаар,
чүге дээрге сээң холуң арыг апарган-дыр ^w».