Job 24 | TyvTUV | STEP | «Чүге Күчүлүг Бурган шииткел үелери доктаатпааныл? Чүге Ону билир улус Ооң хөделир хүннерин көрбезил?

‏ Job 24

Бурган бак улусту доктаатпайн турар

1 «Чүге Күчүлүг Бурган шииткел үелери доктаатпааныл? Чүге Ону билир улус Ооң хөделир хүннерин көрбезил?
2 Бузуттуглар чер кызыгаары демдеглээн даштар чылдырып ^a,
оорлап алган кодан малын боттарыныынга немеп ап турар-дыр;
3 өскүстерниң элчигенин сүрүп аппарып,
дулгуяк херээженниң шарызын долаага ап аар-дыр;
4 ядыы кижини оруктан дүжүр идиптер-дир ^b,
чер кырында бүгү түреңги улус чаштынар ужурга таваржыр-дыр ^c.
5 Ээн ховуда черлик элчигеннер ышкаш,
ядыылар ажык-тывышче үнүп,
аъш-чем дилеп чоруп каар,
хову оларны ажы-төлү-биле катай чемгерип турар;
6 олар хары улустуң шөлүнден дүжүт мажактап ап ^{▼▼ Азы: «Хову-шөлдүң оът-сигенин ажаап».},
бузуттугларның виноградының артыын чыып ап турар;
7 хеви чок болгаш, чанагаш удуп чыдып аарлар,
соокта шугланыптар чүвези чок ^e;
8 дагларга чаъска өдүп турарлар,
чаглак чогундан чалым-хаяже сыңнырлар.
9 Бузуттуглар ядыы кижиниң төлүн өре дээш долаага ап,
адазы чок төлдү эмзирип турар иезинден хунаап аппарып турар.
10 Ядыылар хеп чок болгаш, чанагаш чоруп турар,
хары кижиниң тараа моожаларын дажып тургаш, боттары аш артар;
11 оливадан ханалар аразынга ^{▼▼ Бо сөстерниң утказы эки билдинмес. Болгу дег өске утказы мындыг: «Дээрбе дажы-биле».} үс сыскырып,
оңгарга виноград сыскырып тура, суксаарлар.
12 Хоорайда өлүп чыдарлар човууртап,
балыглатканнар дуза дилеп кыйгырып турар,
а Бурган ону херекке албас-тыр ^g.

13 Чырыкка удур тура халаан ^h,
Ооң оруктарын билбес,
Ооң кокпаларын истевес улус бар.
14 Өлүрүкчү кижи эртенги имиртиңде туруп келгеш,
түреңги күжүрнү, ядамыкты өлүрүп каар,
а дүне када оорланыр.
15 Самыын кижи имир дүжерин манаар ⁱ;
ол „Мени кым-даа көрбес“деп бодаар,
арнын чажырып аар.
16 Оорлар дүне када өске улус бажыңнарынче кирер,
а хүндүс чаштына бээр.
Ындыглар чырыкты биликсевес.
17 Оларның шуптузунга дүмбей караңгы эртен дег,
олар дүмбейниң коргуушкуннары-биле таныжар.

18 Бузуттугларны агым суг чииги-биле аппаар,
оларның хувааглыг чери каргаттырган,
бүгү улус оларның виноградының шөлүнден хая көрнүр ^{▼▼ Бо шүлүктерниң утказы эки билдинмес. Чамдык шинчээчилерниң бодалы-биле олар Иовтуң эвес, а ооң бир эжиниң чугаазы бооп турар.}.
19 Кааңнаашкында, изигде
хар суу бусталып, чиде бээр –
бачыттыгларны өлүглер ораны ынчалдыр сыырыптар.
20 Төрээн иези оларны уттуптар,
курт оларны амданнанып чиир,
олар дугайында сактыышкын артпас ^k –
бузуттуг-бак чорук ыяш дег сыйлып каар.
21 Бурган ажы-төл чок, төл төрүвес салымныг херээженни болгаш
эки салым эдилевээн дулгуяк херээженни карактап чоруур ^{▼▼ Азы: «Бузуттуг-бак кижи ажы-төл чок, төл төрүвес салымныг херээженни дарлап, дулгуяк херээженге эки хамаарылга көргүспээн».}.
22 А күштүглерни Бодунуң күжү-биле узуткаашкынче сөөртүр,
олар туруп-даа келзе, дириг артар бүзүрели чок болур.
23 Бурган оларга айыыл чок чорукту, чөленгиишти хайырлаза-даа,
Ооң караа оларның оруктарынче көрүп турар.
24 Хензиг өйде көдүрлүрлер – бир көөрге, чок боорлар ^m:
кээп дүжерлер, бүгү улус дег өлүп каарлар,
тараа баштары дег кестирип аарлар.

25 Ындыг эвес деп бе? Кым мээң мегем тударыл,
кым мээң чугаамны чүү-даа эвес кылып каарыл?»