Job 27 | TyvTUV | STEP | Иов бодунуң чугаазын уламчылаан:

eЫд. ыр. 17:42; 65:18; У. ч. 1:28; 28:9; Ин. 9:31

f Иов 20:29

h Иса. 1:22

iЫд. ыр. 77:64

j Зах. 9:3

k Ыд. ыр. 38:7; У. ч. 13:22

m Иов 8:15

nЫд. ыр. 48:18

o Иов 30:22

p Ыы. 2:15

‏ Job 27

Иов буруу чогундан ойталавас

1 Иов бодунуң чугаазын уламчылаан:

2 «Меңээ чөптүг шииткел көргүспээн ^a Бурганның ады-биле,
сеткилимни качыгдал-биле долдурган Күчүлүг Бурганның ады-биле
даңгыраглап тур мен:
3 мээң амы-тыным үзүлбээнде,
Бурганның хайырлаан тыныжы думчуум үдүнден үнмээнде ^b,
4 мээң аксымдан меге сөстер черле үнмес,
мээң дылым меге чүве чугаалавас.
5 Силернии шынныг деп кажан-даа чугаалавас мен,
дириг чорааш, буруу чогумдан ойталавас мен;
6 бодумнуң актыымдан салдыкпайн туттунар мен,
арын-нүүрүм мени чурттап эрткен үем дээш буруудатпас ^{▼▼ Азы: «Чурттап эртер үем дургузунда арын-нүүрүм мени кажан-даа буруудатпас».}.

7 Дайзыным бузуттуг кижи деп,
удурланыкчым – чөптүг эвес кижи деп санаттырзын.
8 Бурган Оон ойталаан кижиниң
амы-тынын үзүп кааптарга, төнчүзү кээрге,
ол кижи чүү чүвеге идегээрил? ^d
9 Аңаа кызагдал таваржырга,
Бурган ооң алгы-кышкызын дыңнаар бе? ^e
10 Күчүлүг Бургандан ол таалал алыр бе,
Ону үргүлчү кыйгырар бе?

11 Бурганның күштүг холунуң дугайында
мен силерге чугаалап берейн,
Күчүлүг Бурганның оруктарын чажырбаайн.
12 Ооң кадында бо бүгүнү шуптуңар көрбейн тур силер бе?
Ынчаарга чүге хоозун чүве чулчуруур силер?
13 Бузуттуг кижиге Бурганның берген хуу-салымы бо-дур ^f,
кызагдакчының Күчүлүг Бургандан алыр чүвези бо-дур ^{▼▼ Чамдык шинчээчилерниң бодалы-биле бо шүлүктер Иовтуң эвес, а ооң бир эжиниң чугаазы бооп турар.}:
14 ооң ажы-төлү өзүп-көвүдээн-даа болза, хылыш чемижи апаар ^h,
ооң үре-салгалы тоттур чемненмес;
15 а дириг артканнарының бажын
хамчык аарыг чиптер,
дулгуяк кадайлары оларның ажыын ажып ыглашпас ⁱ.
16 Ындыг кижи доозун дег хөй мөңгүннү,
дой-довурак дег эңмежок хепти чыып-даа алза ^j,
17 ооң чыып алган хевин чөптүг кижи кедер,
мөңгүнүн кем-буруу чок кижи үлүг кылдыр алыр ^k.
18 Ооң бажыңы ээремчигей дузаа дег ^{▼▼ Өске бурунгу сөзүглелде «Үзүт-ховаган дег» деп бижээн.} хээрек ^m,
таңныыл кижиниң шөлде чадыры дег быжыг эвес;
19 ол бай кижи бооп удуп чыдып аар, а оон ол-ла:
эртен караан ажыдыптарга, куруг калган боор! ⁿ
20 Коргуушкун ону үер суу дег хөме аптар,
шуурган ону дүне када хадып аппаар;
21 казыргы-хат алгаш баар,
ону турган черинден тура тыртып, хадып аппаар ^o;
22 олче кээргел чок хөме халдап келгеш,
хая көрбейн дезеринче албадаптар.
23 Улус ону көргеш, адыш часкаар
база ол каяа-даа турда, ону кыжырыыр ^p».