Job 28 | TyvTUV | STEP | «Ийет, мөңгүн казар уургай бар, алдын арыглап, эзилдирер суугу бар.

‏ Job 28

Мерген угаан дилээшкини

1 «Ийет, мөңгүн казар уургай бар, алдын арыглап, эзилдирер суугу бар.
2 Демирни черден казып тывар,
чести даштан эзилдирер.
3 Казыкчылар дүмбейни чырыдып тургаш,
эртине даш дилеп,
эң ханы караңгы черлерже кирип турар;
4 кижи буду баспаан черге
өдүглер казып, ынаар ханылап киргеш,
улустан ыракта хендирлерде чайганып турарлар.
5 Черниң кырында тараа өзүп үнүп турар, а ооң адаан
от-биле хайылдырып каапкан дег:
6 ооң даштарында сапфирлер чыдымы бар,
үүрелчек борбак алдын база ында чыдар.
7 Ынаар чедер орукту эзир куш хайгыылдап билбээн,
хартыганың караа көрүп билип албаан;
8 чоргаар аң аңаа базып чорбаан,
арзылаң аңаа кылаштаваан.
9 А кижи кадыг хая-дашче холун көдүрүп,
дагларны дөзүнден тура тыртып турар;
10 чалым-хаяга өдүглер оя шаап аар,
эртине даштарны ооң караа көрүп каар.
11 Кижи хемнерниң ханы дүвүн ажыдып турар ^{▼▼ Бо домактың утказы эки билдинмес. Өске бурунгу сөзүглелде «Хемнерниң агымын бооптар» деп бижээн.},
чажыт чүүлдү чырыкче үндүрүптер.

12 А мерген угаанны кайыын тып аарыл,
угаан-сарыыл кайда турарыл? ^b
13 Кижи амытан ооң үнезин билбес,
дириглер оранынга ^c кижи ону тыппас.
14 Дүп чок ээрем: „Ол менде чок“– дээр,
далай: „Менде база чок“– дээр.
15 Ону арыг алдын-биле-даа садып ап шыдавас сен,
ооң өртээ кылдыр мөңгүн-даа деңзилеп берип шыдавас сен ^d;
16 ону Офирден эккелген алдын-биле ^e,
эртине даштар – оникс, сапфир-биле садып ап шыдавас сен;
17 ооң өртээ алдын болгаш шил-биле ^{▼▼ Эрте-бурунгу делегейге шил болза кончуг ховар, улуг үнелиг чүүл турган.} доктааттынмас,
ону улуг үнелиг сава-биле орнап албас.

18 Кораллдар, эртине-шуру дугайында чугаалап-даа канчаар,
мерген угаанны тып аары рубиннер тыварындан-даа берге ^g;
19 Ооң өртээ Эфиопияның топаз даштары-биле деңнеттинмес,
ону арыг алдын-биле садып ап шыдавас сен.

20 Мерген угаан кайыын чедип кээрил?
Угаан-сарыыл кайда турарыл?
21 Ол бүгү дириг амытаннар караандан чажыртынган,
дээрниң куштарындан безин ол чажыртынган.
22 Тамы база Өлүм:
„Ооң дугайында чүгле улус чугаазы дыңнаан бис“– дээр.

23 Угаан-сарыылче чедер орук чүгле Бурганга билдингир,
ооң кайда турарын чүгле Ол билир;
24 Бурган чер-делегейниң ужу-кыдыынга чедир көрүп турар,
чырык черде бүгү чүве база Аңаа көскү.
25 Кажан Ол хатты күш киирип,
сугларның кызыгаарын тургузуп тура,
26 кажан чаъстарга дүрүм доктаадып,
чаңнык-диңмирээшкинге орук айтып тура ^h –
27 ынчан Ол мерген угаанны көрүп кааш, ону үнелээн,
ону доктааткаш, шенеп көрген ⁱ.
28 А кижи төрелгетенге Бурган мынча дээн:
„Дээргиден коргары – мерген угаан ылап ол-дур ^j,
бузуттан чайлаары ^k – угаан-сарыыл ол-дур“».