Job 29
Иовтуң түңнел чугаазы: ооң биеэги аас-кежии
1Иов бодунуң чугаазын уламчылаан: 2«О, эрткен үемни эгидип алган болзумза,Бурганның мени камгалап чорааны хүннерни;
3ынчан Ооң чырыткызы мээң кырымга чырып турган a,
Ооң чырыы мени дүмбей өттүр эдертип аппаар турган!
4О, биеэги четчип-бышкан хүннеримни!
Ынчан Бурган-биле найыралым аалымны камгалап,
5Күчүлүг Бурган мени ынчан кагбаан турган,
а ажы-төлүм мени хүрээлеп турган b;
6ынчан оруумга сүт агып чыткан c,
хаялар меңээ олива үзүн аксып берип турган.
7Мен ынчан хоорай хаалгазынче баргаш,
төп шөлде олудумга саадаптар турдум –
8мени көрүп кааш, аныяктар орук чайлап бээр,
а кырганнар көдүрлүп келгеш, турар турган.
9Даргалар чүве чугаалаарындан тырттынып,
аксын адыжы-биле дуглап аар турган;
10ат-сураглыгларның үнү үнместеп,
дылы таалайынга чыпшына бээр турган d.
11Мени дыңнааннар „амыр-чыргалдыг сен“дээр,
мени көргеннер – мактаар турган чүве,
12чүге дээрге ыглап-сыктаан түреңги кижини,
деткимче чок өскүстү камгалап турган мен e.
13Өлүп чыткан кижи мени йөрээп турган,
дулгуяк херээженниң чүрээ
мээң ачымда өөрүп-байырлап турган;
14шынныг чорукту хеп дег,
чөптүг чорукту тон биле бөрт дег кедип чораан мен f.
15Согурларга карак бооп,
аскак-бүскектерге буттар бооп турган мен;
16ядыыларга ада бооп g,
танывазым-даа кижиниң чаргызын чаржып берип турган мен;
17бузуттуг-бак улустуң азыг-диштерин сый шанчып,
оларның аксында олчазын ушта тыртып турган мен h.
18Бодап кээримге, бодумнуң уямга мөчүүр ышкаш бооп,
чуртталгам хүннери элезин дег
эмге-тикчок кылдыр сагындырар турду;
19дазылдарым сугга чедип турар,
будуктарымга шалың хонуп аар,
20алдар-хүндүм элеп читпес,
күш-шыдалым хере тыртып каан ча дег кылдыр
сагындырар турду.
21Улус мени ыыт чок дыңнап,
арга-сүмемни манап аар турду;
22мээң сөстерим оларны суггарар,
чугаам төнерге, немээр чүвези чок боор турду.
23Чаъсты ышкаш, мээң чугаамны манаар,
часкы чайыкты дег, аксы-биле дозуп аар турдулар i;
24оларга хүлүмзүрүүрүмге, бүзүреп чадап каар ▼
▼ Азы: «Бүзүрелин чидирген улуска хүлүмзүрүүр турдум».
,арын-шырайым чырып кээрге, өөрүүр турдулар.
25Мен оларга орук айтып, баштыңы бооп турдум,
бодунуң шерииниң аразында хаан дег,
качыгдааннарга аргалакчы дег чурттап чордум».
Copyright information for
TyvTUV