‏ Job 31

Иовтуң түңнел чугаазы: ооң кем-буруу чогу

1«Аныяк кысче туралап көрбес бооп карактарым-биле дугуржуп алган мен ^a.
2Кижиге өрү дээрде Бургандан кандыг үүле,
бедик кудайда Күчүлүг Бургандан кандыг үлүг-хуу онааттынганыл? ^b
3Бачыт үүлгедикчизинге өлүм-чидим,
бузуттуг хейге – узуткаашкын онаап каан эвес чүве бе?
4Бурган мээң оруктарымны көрбейн турар бе,
мээң шупту базымнарымны санавайн турар бе? ^c

5Мен меге-биле чурттап чораан мен бе,
авыяас-опче буттарым далажып турган бе?
6Мени чөптүг чоруктуң деңзизинче салып кагзын ^d,
Бурган мээң кем-буруу чогумну билип алзын!
7Бир эвес базымнарым шын оруктан өскээр барып,
чүрээм көрүжүм аайы-биле барып,
холум хирге боражып турган болза,
8тарып каан дүжүдүмнү өске улус ажаап чизин ^e,
өзүмнеримни дазылы-биле тура тыртып каапсын!
9Бир эвес чүрээм өске кижи кадайынга хандыкшып,
туралааш, ооң бажыңының чанынга кедеп орган болзумза ^f,
10мээң кадайым өске кижиниң тараазын дээрбелезин,
ооң-биле өске эрлер хойгашсын ^g.
11Чүге дээрге ындыг чорук – бужар үүлгедиг-дир,
шиидер ужурлуг кемниг херек-тир;
12ол дээрге Тамыже дүжүрүп, хүлдендир чиптер,
бар-ла чүвемни чүү-даа арттырбайн өрттедиптер от-тур ^h.

13Бир эвес меңээ хомудалдыг чалчаларымның
чаргылдажыр эргезин кызагдаан болзумза,
14Бурган шииткел кылып туруп кээрге, канчаптар мен,
менден харыы негээрге, чүү дээр мен?
15Мени ием иштинге чаяап каан Бурган
оларны база чаяап каан эвес бе?
Шуптувусту уруг савазынга чаңгыс Чаяакчы ботталдырып каан! ⁱ
16Ядамыктың дилээн күүседиринден ойталаан мен бе,
дулгуяк херээженниң карактарының одун өжүрүп каан мен бе?
17Хлевимни чааскаан чип олурган мен бе,
өскүс кижи-биле үлешпээн мен бе? ^j
18Чок, аныяамдан-на өскүс кижиге ада дег чордум,
чажымдан-на дулгуяк херээженче сагыш салып келдим ^k.
19Бир эвес чанагаш доңуп өлүп чыдар кижиже
азы хеп чок ядыы кижиже тоомча чок көрген болзумза;
20ону хоюм дүгү-биле чылыглаваан болзумза,
ол мени йөрээвээн болза ^l;
21шииткел черинге деткимче алыр мен деп билир болгаш,
өскүс кижиже холум көдүрген болзумза ^m –
22мээң эктим оорга сөөгүнден адырлып калзын,
холум шенээнден сыйлып калзын!
23Бургандан кээр кеземчеден коргуп турар мен,
Ооң өндүр бедииниң мурнунга ындыг чүүлдер кылып диттикпес мен.

24Бир эвес мен алдынга ынанып,
эртинеге: „Сен – мээң чөленгиижим сен“– деп турган болзумза ⁿ;
25бир эвес байлаамның эгээртинмезинге,
холум хөйнү чыып алганынга өөрүп турган болзумза ^o;
26чырык хүннү көргеш,
чайынналып көжүп чоруур айны көргеш, мөгейип,
27сеткил-чүрээмниң ханызында дуурайлаттырып,
оларга хүндүлел көргүзүп турган болзумза ^p –
28шиидер ужурлуг кемниг херектер үүлгеткеним ол,
Дээди Өрүкү Бургандан ойталааным ол болур ийик.

29Дайзынымның буурааны дээш өөрүп,
ооң айыыл-халавы дээш байырлап турган мен бе? ^q
30Чок, дайзыным өлүр кылдыр каргыш салып,
аксым-биле бачыт үүлгетпээн мен ^r.
31Мээң аалымның улузу кажан-даа:
„Ооң эът-чемин тоттур чигген болза!“– дишпээн.
32Чорукчулар даштыгаа хонуп көрбээн,
эжиим оларга үргүлчү ажык турган ^s.
33Өске улус дег, бачыдымны чажырыпкан мен бе,
бузут-багымны чажырып, хойлап алган мен бе? ^t
34Мөөң чондан корткаш,
чаңгыс чер чурттугларымның бак көөрүнден сезингеш,
ыыт чок барып, дашкаар үнмейн олурган мен бе?

35О, мени оода кандыг-бир кижи дыңнаан болза!
Мээң адым салган хомудалым бо-дур – Күчүлүг Бурган харыылазын! ^u
Негекчим дүрүг саазынга буруудадыышкынын бижизин –
36мен ол дүрүгнү эктимге салып аар ийик мен,
алдар-хүндүнүң дээрбээ дег, бажымга кедип аар ийик мен.
37Базымнарым санын Бурганга ажыдып берип,
ызыгууртан кижи дег бажым көдүрүп, Олче чоокшулаар ийик мен.
38Бир эвес черим меңээ удур алгырып,
шөлде андазын истери бачыттарымдан ыглап-сыктап турар болза;
39бир эвес мен ооң дүжүдүн халаска чип,
тараачыннарны кызып-кыйып турган болзумза,
40кызыл-тас орнунга тенниг оотпак,
арбай орнунга – бок үнүш өзүп үнзүн! ^v»

Иовтуң чугаа сөзү мооң-биле төнген.