‏ Job 33

Бурган кижи амытандан өндүр бедик

1«Ындыг болганда, мээң чугааларымны дыңна, Иов, мээң бүгү сөстеримче кичээнгейден сал!
2Дыңна-ла, аксымны бөгүн ажыдып тур мен,
өк-дылым чугаалап эгеледи.
3Мээң сөстерим ак сагыштан үнүп турар,
аксым арыг билиг чугаалап турар.
4Бурганның Сүлдези мени чаяап каан,
Күчүлүг Бурганның тыныжы мени тынгарып каан ^a.

5А сен, шыдаар болзуңза, меңээ харыыла,
белеткенип алгаш, меңээ удурлан.
6Бурганның мурнунга мен сен дег мен –
ол-ла дойдан мени база кылып каан ^b.
7Менден коргуушкунуң сени хөлзетпес,
мээң холум сеңээ аар болбас ^c.

8Сээң чугааңны мээң кулаам дыңнап каан,
сээң үнүң меңээ дыңналып турду:
9„Мен арыг мен, бачыт үүлгетпээн мен,
кем-буруу, бузут-багым чок! ^d
10А Бурган меңээ удур бир-ле чылдак дилеп тып,
мени Бодунуң дайзыны деп санаар-дыр ^e.
11Ол мээң будумну кинчилеп каан,
мээң оруумну базым санай харагалзап турар ^f“.

12А мээң сеңээ харыым бо-дур: сээңии шын эвес-тир,
Бурган кижи амытандан өндүр бедик болгай!
13Сен Ооң-биле чүү дээш маргыжар сен ^g,
канчап: „Кижиге кандыг-даа харыы бербейн тур“– дээр сен? ▼

▼ Азы: «Ол Бодунуң бүгү ажыл-херектери дээш харыы тутпас болгай».

14Бурган катап-катап-даа чугаалаарга,
кижи билип албас-тыр.
15Уйгу-дүште, дүнеки көстүүшкүннерде,
улус ханы уйгуга алзыпканда,
орун-дөжээнге удумзурап чыдырда ⁱ –
16Бурган оларның кулаан ажыдып ^j,
сагындырыглар-биле коргудар.
17Кижини үүлгедиглеринден чайладыр дээш,
улусту улуургаар чоруктан адырар дээш;
18 тамыже кээп дүжерин болдурбас дээш,
хылыштан кырлып каарын болдурбас дээш,
ынчаар кылып турар.
19Азы кижи дөжекке чыдырда, ону аарыг-биле,
сөөктериниң соксаал чок аарышкызы-биле билиндирер ^k;
20ынчан ол кижи чемден хөңнү калыр,
амданныг аъш-чем аңаа ческинчиг боор ^l;
21ооң эът-боду каракка көзүлдүр эстип-шүглүр,
мурнунда билдирбес турган сөөктери көстүп кээр;
22ооң амы-тыны чевегже кирер деп баар,
өлүглер оранынче чоокшулап-ла олурар.

23Ынчалза-даа дээрниң төлээзи –
кижилерге дорт орукту айтып берип турар болчукчу,
муң төлээниң бирээзи – ол кижиниң талазында болза ^m,
24төлээ олче ээ көрнүп:
„Ону хостап салывыт, ол чевегже кирбезин,
мен ол дээш төлевир тып алдым“– дээр ⁿ;
25ынчан ооң мага-боду аныяанда турганы дег апаар ^o,
ооң чалыы үези эглип кээр;
26ынчан ооң мөргүлү Бурганга таарымчалыг болур,
Бурганның шырай-арныңче көрүп алгаш ^p, ол өөрүп-байырлаарга,
Бурган ону чөптүг чоруу дээш шаңнаар ▼

▼ Азы: «Ооң чөптүг чоруун эгидип бээр».

.
27Ынчан ол кижи улус мурнунга келгеш, мынча дээр:
„Бачыт үүлгеттим, эки чүүлдү хажыттым,
ынчалза-даа Ол мени үүлгедиглерим дээш кезетпеди;
28Ол мээң амы-тынымны чевегже кирбес кылып ^r,
чуртталгамда чырыкка таалаар-дыр мен!“

29Бурган ол бүгүнү кижи дээш кылып турар –
ийи-даа катап, үш-даа катап,
30ооң амы-тынын чевегден чайладып,
амылыглар оранының чырыы аңаа чырызын дээш,
кылып турар ^s.
31Кичээнгейиң менче угла, Иов, мени дыңна,
чугаалап турумда, ыыттава.
32Бир эвес чугаалаар чүвең бар болза – харыыла,
мен сээң шынныыңны өөрүшкүлүг хүлээп көөр мен.
33А чок болза – мени дыңна;
ыыттавайн көр, мен сеңээ мерген угаанны башкылаайн».