hУ. ч. 24:12; Ыд. ыр. 61:13
nЫд. ыр. 138:12
Job 34
Бурганда чөптүг эвес шииткел чок
1Элиуй чугаазын уламчылаан: 2«О, мерген угаанныглар, мээң чугаамны дыңнаңар,сарыылдыглар, кичээнгейден салыңар.
3Дылдың аъш-чемниң амданын шенеп чылгаары дег,
кулак сөстерни ылгап дыңнап турар болгай a.
4Чөптүг шилилгеден аравыска кылыылы,
эки чүве деп чүл дээрзин шиитпирлээли.
5Иов мынча дээр-дир: „Мен шынныг мен,
Бурган меңээ чөптүг шииткел үндүрбеди b;
6мен шынныг-даа болзумза, мегечи кижи дирттим ▼
▼ Бо домактың утказы эки билдинмес. Өске бурунгу сөзүглелде «Ол мээң шынныым дугайымда мегелеп турду» деп бижээн.
,кем-буруу чок-даа болзумза, эмнеттинмес кылдыр балыглаттым“.
7Иов ышкаш өске ындыг кижи бар бе?
Ол дорамчылап кочулаан сөстерни суг дег ижиптер-дир d;
8 хоойлу-дүрүм сагывас улус-биле катчып аар-дыр,
бузуттуглар-биле кады чоруур-дур e.
9Чүге дээрге Иов: „Бир эвес кижи Бурганга тааржыр болза,
аңаа кандыг ажык турарыл?“– дээр-дир f.
10Ынчангаш мени дыңнаңар, угаанныг улус:
Бурганда шынныг эвес чүве турбас,
Күчүлүг Бурганда чөптүг эвес шииткел чок g.
11Кижини Ол ажыл-херектерин ёзугаар аажылаар,
аңаа кеземчени чогууру-биле онаар h.
12Ылап шын бо-дур: Бурган бузут кылбас,
Күчүлүг Бурган чөптүг шииткелди хажытпас i.
13Кым Аңаа черни чагырар кылдыр хүлээдип бергенил,
кым Ону бүгү делегейниң бажынга салып кааныл?
14Бир эвес Ооң сеткил-чүрээнге ындыг сагыш кирип,
Ол Бодунуң Сүлдези, тыныжын дедир ап аар болза,
15кандыг-даа амытан өлүп каар ийик,
кижи доозун-довуракче эглип кээр ийик j.
16Угаанныг болзуңза, мени дыңна,
мээң чугаа-сөзүмче кичээнгейден сал.
17Бир эвес Бурган шынныг шииткелге хөңнү чок турган болза,
Ол чагырып шыдаар бе?
Чөптүг болгаш Күчү-күштүг Бурганны
буруудадып болур бе?
18Хааннарны Ол: „Бак кулугурлар!“– дээр,
нояннарны Ол: „Бузуттуг хейлер!“– дээр.
19Ол чагырыкчыларны тала-дугай тыртпас,
ат-сураглыг кижини ядыы кижиден дээре деп санавас,
олар шупту – Ооң холунуң чаяалгазы-ла болгай k.
20Олар хенертен, дүне када өлүп каар;
чон хөлзеп үнерге, олар чиде бээр.
Күштүг-шыырак улус кижи холу дегбээнде-ле, узуткаттырып аар l.
21Бурган кижиниң оруктарын хайгаарап,
бүгү базымнарын көрүп турар m.
22Бузуттуг-бак улус чаштына бээр хире
дүмбей, муңгаш караңгы чер чок n.
23Бурганның мурнунга кижиниң шииттирер дээш чедип кээри
Аңаа херек чок –
24Бурган күштүг-шыырак улусту истелге чокка чылча шапкаш o,
оларның орнунга өскелерни көдүрүп турар;
25оларның ажыл-херектерин Ол билир болгаш,
чаңгыс дүне чылча базып каар.
26Бурган оларны улуска көзүлдүр,
херектеннерни дег согар –
27Оон ойталааны дээш,
Ооң бүгү оруктарын билип алыксавааны дээш кезедир.
28Чүге дээрге ядыыларның алгы-кышкызы Аңаа четкен-дир,
дарлатканнарның уё-човуурун Ол дыңнап каан-дыр p.
29А бир эвес Ол ыыт чок артар болза –
кым Ону буруудадырыл?
Бир эвес арнын чажырар болза –
кым Ону көөрүл?
Чон-биле-даа, чаңгыс кижи-биле-даа ындыг болур –
30Бургандан ойталаан кижи хааннавазын дээш,
улусту какпа-дузакка туттурбазын дээш, ындыг болур.
31Бурганга мынча дээри эки эвес бе:
„Мен кеземче алдым – моон соңгаар бачыт үүлгетпес мен;
32көрбейн турар чүвемни меңээ көргүзүп көрем,
бак чүве кылган болзумза, моон соңгаар кылбас мен“.
33Чүү деп бодаар сен, бурууң билинмес болзуңза,
Ол сеңээ шаңнал бээр деп бе?
Шилилгени мен эвес, сен кылыр ужурлуг сен,
билир чүвең бар болза, чугаалап бер.
34Сарыылдыг улус база
мени дыңнап турар мерген угаанныг кижи:
35„Иов билбес чүвезин чугаалап тур,
ооң сөстери шуут бодал чок-тур“– дээр q.
36Бак хейлер дег харыылап турары дээш,
Иов шылгалданы төнчүзүнге чедир эртсин:
37бачыдынга ол үймээнни немеп алган-дыр,
бисти кочулап, адыш часкап r,
Бурганга удур чугаа-сөзүн көвүдедип турар-дыр».
Copyright information for
TyvTUV