Job 37 | TyvTUV | STEP | «Ол бүгүден мээң чүрээм согуу тиккиңейнип, хөректен ушта халый бер чазып тур.

‏ Job 37

Кижилер Бурганче чедип шыдавас

1 «Ол бүгүден мээң чүрээм согуу тиккиңейнип, хөректен ушта халый бер чазып тур.
2 Дыңнаңар, Ооң аажок дыңзыг үнүн дыңнаңар,
Ооң аксындан диңмирээшкиннер киңгиреп тур!
3 Бүгү дээр адаанда Ол чыжырадыр дагжап тур,
чаңныктар чер-делегейниң ужу-кыдыында чедип тур ^a.
4 Ооң үнү чаңныктар соондан диңмиреп ^b,
өндүрү-биле чыжырт кыннып тур.
Ол Бодунуң үнүн кошкатпас-тыр,
бүгү улус ону дыңнап тур.
5 Бурганның үнүнүң диңмирээри кайгамчык-тыр!
Ооң ажыл-херектери өндүр улуг – бис билип шыдавас бис ^c.

6 Харга Ол: „Черже бада бер“– дээр,
күштүг чаъс-чайыкка база дужаал бээр ^d.
7 Ол кижи бүрүзүнүң ажыл-ижин соксадып каар,
бүгү улус Ооң кылган үүле-херээн билип алзын.
8 Ынчан аң-мең үңгүрлеринче кире бээр,
ижээннеринче барып чыдып аар ^e.
9 Шуурган бодунуң чажыт ордузундан үнүп кээр,
күштүг хаттар соокту эккээр ^{▼▼ Азы: «Мурнуу чүктен шуурган үнүп кээр, соңгу чүктен хаттар соокту эккээр».};
10 Бурганның тыныжы дошту тывылдырар,
хостуг аккан суг доңа бээр ^g.
11 Ол булуттарны суг-биле долдуруп,
кызаңнааштарын булуттардан шывадаар.
12 Булуттар Бурганның күзел-соруун боттандырып,
ээргииштелип, көжүп-шимчеп турар,
бүгү чер-делегейни эргилдир
Ооң дужааган чүвезин күүседип турар ^h;
13 олар Бурганның чаяап каан черинче чедип кээп,
бирде кеземчени, бирде энерелди эккеп турар ⁱ.

14 Иов, бо бүгүнү дыңнап, доктаап көр,
Бурганның кайгамчык херектериниң дугайында бодан!
15 Бурганның булуттарны канчаар башкарып турарын,
Бодунуң булудун чаңнык-биле канчаар чырыдарын билир сен бе?
16 Булуттарның турум салдап чоруурун билир сен бе?
Ооң билии четче-долу ^j, ажыл-херектери кайгамчык!
17 Изиг хат черни даамчырадыптарга,
бодунуң хевинден изиргенип турар анаа кижи-дир сен –
18 шуткуп каан хүлер көрүнчүк дег кадыг-быжыг дээрлерни
Бурганга дузалап, чада салган сен бе? ^k
19 Аңаа чүнү чугаалаарын биске өөредип каг,
бүдүүлүк, караңгы-дыр бис ^l, чаргывыс илередип шыдавас-тыр бис!
20 Бурган-биле чугаалажыр деп турарымны Аңаа дамчыдар бе?
Кым бодунга өлүм күзээр боор?!
21 Булуттарны хат тарадыр сывырыптарга,
дээрге оларны өттүр чырып кээр хүнче
кым удур көрүп шыдаарыл? ^{▼▼ Азы: «Ам булуттар өттүр чырык көзүлбейн тур, ынчалза-даа хат хадып эрткеш, оларны арыглап кааптар».}
22 Соңгу чүктен алдынналчак чайын чырып кээр,
Бурганның коргунчуг өндүр чырыы ол-дур.
23 Күчүлүг Бурганче чедип шыдавас бис,
Ооң күчү-күжү өндүр улуг,
Ооң чөптүг шииткели долу, Ол кымны-даа дарлавас.
24 Ынчангаш улус Оон коргуп чорзун ⁿ;
Ол мерген угаанныг дирткеннерже сагыш салбас».