Job 38 | TyvTUV | STEP | Ынчан Дээрги-Чаяакчы Иовка шуурган иштинден мынча деп харыылаан :

‏ Job 38

Бурганның бирги чугаазы: дириг бойдустуң Чагырыкчызы кымыл?

1 Ынчан Дээрги-Чаяакчы Иовка шуурган иштинден мынча деп харыылаан ^a:

2 «Билиг чок сөстер-биле ^b Мээң бодалымны
карартыр хире кым сен сен?
3 Ёзулуг эр дег, куржанып белеткенип ал;
Мен айтырайн, а сен Меңээ харыыла ^c.

4 Мен чер-делегейни үндезилеп турумда, сен каяа турдуң? ^d
Билир болзуңза, харыыла.
5 Билир-ле боор сен аа: ооң хемчээлин кым айтып кагжык,
хемчээр хендирни ооң кырынга кым хере тыртчык?
6 Ооң үндезиннери чүү чүведе туттунуп турарыл,
ооң тавааның дажын кым салганыл? ^e
7 Ол үеде эртенги сылдыстар өөрүп-байырлап,
Бурганның бүгү оолдары ^f өөрүшкүлүг алгыржып турган болгай.

8 А далай төрүттүнгеш, аттыгып үнерге,
кым ону хаалга-биле хаап кааныл? ^g
9 Мен ону булуттар-биле шуглап,
дүмбей-биле ораап каан мен;
10 ооң кызыгаарын доктаадып,
дээктерлиг хаалганы тургузуп каан мен;
11 „Маңаа четкеш, оон ыңай барбас сен,
сээң турамык чалгыгларың маңаа доктаар“– дээн мен.

12 Сен кажан-бир шагда эртенге дужаал берген сен бе,
даңга турар чер айыткан сен бе?
13 Даң черниң ужу-кыдыын хөме апкаш,
бузуттугларны черден дүжүр силгипсин деп айыткан сен бе?
14 Даң хаяазының ачызында черниң хевири
таңмага бастырган дой дег өскерлип,
шокар хеп дег апаар.
15 А бузуттуглардан чырыкты хунаап аар ^h,
күчүлелдиң холун сыйып каар.

16 Далайның үнген дөстеринге четкен сен бе,
аажок ханы ээремниң дүвүнге кылаштаан сен бе?
17 Өлүглер оранының эжиктери сеңээ көскү апарган бе,
дүмбей караңгының хаалгазын көрген сен бе?
18 Черниң делгемин эргий көрген сен бе?
Ол бүгүнү билир болзуңза, меңээ чугаалап бер.

19 Чырыктың чурттап турар черинче орук кайыл,
караңгының турар чери кайдал?
20 Сен оларның черинче барган сен бе,
бажыңынче баар орукту билир сен бе?
21 Билбейн канчаар сен! Оларның үе-чергези-дир сен –
назының ындыг узун болгай!

22 Харның дээрде шыгжамырынче кирген сен бе ⁱ,
долунуң шыгжамырларын көрген сен бе?
23 Оларны дүвүрээзинниг үеге дээш,
дайын-чаа, тулчуушкунга дээш курлавырлап каан мен ^j.
24 Кандыг орук-биле чырык аңгыланып тарап ^{▼▼ Азы: «Чаңныктар маңнажып».},
чөөн чүктүң хады чер кырында тарап турарыл?
25 Кым-на чайыктарга дээрге үттер дежип берип,
чаңнык-диңмирээшкинге орук айтып берип турарыл? ^l
26 Кым чурттакчы чок черлерни,
кижи чок ээн кургаг ховуну суглуг болдуруп ^m,
27 черлик ховуну суггарып,
ногаан оът-сигенни өстүрүп турарыл?
28 Чаъстың адазы бар бе? ⁿ
Шалыңның дамдыларын кым төрүдүп турарыл?
29 Кымның хырнындан дош үнүп турарыл ^o,
кым дээрниң хыраазын божуп турарыл? ^p
30 Ындыг өйде суглар дашталдыр доңуп,
дүп чок ээремниң кыры көжүй бээр болгай ^q.

31 Сен Үгер сылдысты кожуп каан сен бе,
Үш-Мыйгактың дужаан кошкадып шыдаар сен бе? ^r
32 Өөр сылдыстарны үезинде чырыдып үндүрүп,
Чеди-Хаанны кожа сылдыстары-биле углап башкарып шыдаар сен бе? ^s
33 Дээрлерниң дүрүмнерин билир сен бе,
черге оларның чагыргазын доктаадып шыдаар сен бе? ^t

34 Булуттарга дыңналдыр алгырып шыдаар сен бе?
Элбек суглар сени хөме алыр бе?
35 Чаңныктар сээң дужаалың ёзугаар ужуп чоруптар бе,
сеңээ: „Белен бис!“– дээр бе?
36 Кым чүректи мерген угаанныг кылып кааныл,
кижини угаан-сарыылдыг кылып кааныл? ^{▼▼ Бо домактарның утказы эки билдинмес. Болгу дег өске утказы мындыг: «Кым ибис кушту мерген угаанныг кылып кааныл, аскыр-дагаага сарыыл бергенил?»}
37 Булуттарны санаптар хире мерген угаанныг кым барыл,
дээрниң хууңун кым дүжүр октаптарыл?
38 Доозун-довурак ынчан малгаш апаар,
борбак малгаштар чыпшынчы бээр ийик.

39 Арзылаң төлдерин тоттуруп алзын дээш,
аңаа олча тудуп берген сен бе? ^v
40 Ооң төлдери үңгүрүнде чаштынып чыдар
азы чокпак үнүш аразында кедеп чыдар болгай ^w.

41 Кускуннуң төлдери чиир чүве тыппайн,
Бургандан дуза дилеп кыйгырып, ыңай-бээр ужуп чоруп турда,
кым оларга аъш-чем чорудуп бээрил? ^x»