‏ Job 39

1«Хаяларга чуңмаларның төрүүр үезин билир сен бе ^a, ивилерниң төрүп турарын көрген сен бе?
2Оларның каш ай боос чоруурун санаан сен бе,
кажан төрүүрүн билир сен бе?
3Олар ынчан олура аарак, чаш төлүн төрүп,
боттарының хилинчээнден адырлып аар;
4оларның төлдери хову-шөлге күш кирип, өзүп-доругар,
а оон аваларын кажан кезээде каапкаш баар.

5Черлик элчигенге кым хосталга бергенил,
ооң дужаан кым чежип кааныл?
6Мен ону ховуга чурттадып каан мен,
кужурлуг чурттаар чер кылып берген мен.
7Хоорайның хөлзээзинин ол кыжырыыр,
сүрүкчүнүң алгы-кышкызын дыңнап көрбээн;
8ол дагларга оъттап чоруур,
ногаан оът-сиген дилеп тып алыксаар.

9Черлик буга сеңээ бараан болуксаар бе,
сээң мал чемгерер чериңге хонар бе?
10Сээң шөлүңнү аңдарзын дээш,
ону андазынга кожуп шыдаар сен бе?
11Ооң аажок улуг күжүнге идегээр сен бе,
бодуңнуң ажылыңны аңаа бүзүрээр сен бе?
12Ол ээп келгеш, сээң тарааңны
шаңга чыып бээр деп ынаныр сен бе?

13Страус куш чалгыннарын өөрүшкүлүг часкап турар,
ынчалза-даа ооң чалгыннары шиленниң чүглери-биле деңнешпес.
14Кыс страус чуургаларын элезинге чылыдыр салып кааш,
оларын каапкаш баар;
15кандыг-бир кижиниң буду чуура базып,
черлик аң-мең таптап кааптарын бодавас.
16Ол бодунуң төлдеринге, өскениинге дег, каржы ^b,
ооң күжениишкини хей боорундан сезинмес,
17чүге дээрге Бурган аңаа мерген угаан бербээн,
угаанныг кылдыр чаяап кагбаан.
18Ынчалза-даа ол куш көдүрүлгеш, маңнап ыңай болза,
аъттыг кижини белени-биле ажып каар.

19Аътка күштү сен берип,
ооң мойнун чел-биле шып каан сен бе?
20Ону шартылаа дег халып-шураар кылып каан сен бе?
Ооң хаарыктаары коргунчуг ^c.
21Аът өөрүп, черни дуюу-биле казып тур,
бар шаа-биле тулчуушкунче чүткүп тур;
22айыылды ол коргуш чогу-биле шоодар,
хылыштан-даа дезип маңнавас;
23ооң быктында саадак шыңгыраан,
узун, кыска чыдалар кылаңнашкан.
24Ол хөлзээн чүткүлүнден довурак чип,
труба этсирге ^d, чаңгыс черге туруп шыдавас,
25ооң үнүн дыңнааш-ла, киштептер,
баштыңнарның алгы-кышкызын, аг-шеригниң кыйгызын,
тулчуушкун даажын ырактан эндевес.

26Хартыганың кылыйтыр ужуп,
чалгыннарын мурнуу чүкче хере салыры –
сээң мерген угааның ачызында бе?
27Эзирниң кылыйтыр ужуп үнгеш,
бедик черге уя тудуп аары –
сээң сөзүң ёзугаар бе?
28Ол куш хаяда чурттап, хонуп турар,
ооң шивээзи – дагның чалымы;
29оортан ол олчазын харап көөр,
ооң карактары дыка ырадыр көрүп турар.
30Эзир төлдеринге хан ижиртир,
өлүрүп алган олчазынче ужар».

31Дээрги-Чаяакчы Иовка оон ыңай мынча дээн:

32«Бо маргыжыкчы Күчүлүг Бурган-биле чөрүжүп турар де?! ^e
Бурганны чемелеп турар кижи Аңаа харыы тутсун!»

Иовтуң Бурганга бирги харыызы

33Иов Дээрги-Чаяакчыга мынча деп харыылаан:

34«Мен чөгенчиг-дир мен. Сеңээ чүү деп харыылаайн?
Аксымны холум-биле дуглаайн ^f.
35Бир катап чугаалаан мен – ам харыылап шыдавас мен,
оон база катап чугаалаан мен – ам ыыттавас мен».