Job 41
1Левиафанның a мурнунга чөгелиң төнер; ооң чүгле хевирин көргеш, кээп дүжер сен.2Ону хөлзедиптер болзуңза, ол каржы-дошкун-на! ▼
▼ Азы: «Ону хөлзедиптер кандыг-бир калчаа кижи бар бе?»
А кым Мээң мурнумга туруп шыдаарыл? ▼
▼ Өске бурунгу сөзүглелде «Ооң мурнунга кым туруп шыдаарыл?» деп бижээн.
3Меңээ удур туржуптар кижи бар бе, ону эки аажылаар мен.
Чырык черде бүгү чүве – Мээңии-дир! d
4Левиафанның мага-бодунуң кезектериниң, оларның күчү-күжүнүң,
кайгамчык тургузуунуң дугайында ыыттавайн барбас мен.
5Кым ооң хевин ушта тыртып шыдаарыл,
ооң ийи каът куяк шывыын өттүр шанчарыл? ▼
▼ Бо домактың утказы эки билдинмес. Болгу дег өске утказы мындыг: «Кым олче ийи каът чүгенниг чоокшулай бээрил?»
6Кым ооң аксының хаалгазын ажыдып шыдаарыл?
Ооң дээрбектелчек диштериниң коргунчуун!
7Ооң өндүр-чаагай одуругланчак дозуг-камгалалдарын,
таңма-биле дег, адырлыр аргажок кылдыр кожуп каан;
8оларны сырый каттыштырган –
аразындан агаар безин эртпес;
9бирээзин өскезинге чыпшыр идип каан –
аңгылаары болдунмас кылдыр тудуштурган.
10Левиафан азырыптарга, чаңнык кызаш дээр,
ооң карактары даң хаяазының херелдери дег;
11ооң аксындан чаштанчы оттар кызаңнап,
тарадыр ужуп турар.
12Ооң думчуунуң үттеринден ыш-бус,
одаг кырында хайынган паштан дег, бургураан;
13ооң тыныжы көстер одун өөскүткен,
аксындан чалбыыш чалынналган.
14Ооң мойнунда күш чажыртынган,
коргуушкун ооң мурнунда маңнап чоруур.
15Ооң эът-бодун быжыг кылдыр тудуштуруп каан –
шуткуп каан дег, чайгылыш дивес;
16ооң чүрээ даш дег,
дээрбе дажы дег кадыг.
17Ол туруп кээрге, күштүг-шыырактар безин ▼
▼ Азы: «Бурганнар безин».
корга бээр,ооң халдаашкынын дозуп шыдавайн аткаарлап эгелээр.
18Аңаа хылыш күш четпес,
узун-чолдак чыдалар, согун-даа аңаа дыынмас;
19демирни ол сиген деп,
хүлерни – ирик ыяш деп санаар.
20Ча-согун ону дезеринче албадавас,
шывадаан даштар аңаа тараа тогланчызы дег болур.
21Моңну ол тараа сывы деп санаар,
чыданың сыгыды аңаа каттырынчыг.
22Ооң хырны – чидиг бузундулар дег,
ол малгашты кежи-биле илииртээр.
23Левиафан далайны пашта суг дег бургурадып,
хайынган үс дег мылдырадыптар.
24Ооң соонга чырып турар ис артып каар,
сактырга, суг кыры агара берген дег боор.
25Чер кырында аңаа дөмей дириг амытан чок:
ону коргуш чок кылдыр чаяап каан;
26бүгү улуургак чүвеже ол тиилелгелиг көөр,
ол – чоргаар бүгү дириг амытаннарның хааны».
Copyright information for
TyvTUV